Փաստ ինֆո

«Ամենեւին զարմանալի չէ, որ գործող իշխանության դրածո ՄԻՊ-ը հովանավորում է սեռական փոքրամասնություններին։ Այս ամենը տեղավորվում է իշխանության գաղափարախոսության շրջանակներում, իրենք, ըստ էության, բազմաթիվ անգամ հայտարարել են եւ, ամենակարեւորը, գործնականում ցույց են տվել, որ իրենք ավանդական արժեհամակարգերին գերադասում են այլընտրանքային, ոչ ավանդական համակարգերը՝ կլինեն առհասարակ, փոքրամասնությունները, կլինեն ընտանեկան արժեքները կամ, օրինակ, ազգային եկեղեցին», - «Փաստինֆո»-ի հետ զրույցում նման կարծիք հայտնեց քաղտեխնոլոգ Վիգեն Հակոբյանը՝ անդրադառնալով ՄԻՊ-ի կողմից ԼԳՏԲ համայնքին ցուցաբերված հովանավորչության մասին վկայող դրվագին, որը վերջին օրերին լայնորեն քննարկվում է հասարակական շրջանակներում։

Նշենք, որ Հայաստանում Շվեդիայի դեսպանությունը հաղորդագրություն էր տարածել «Իրավունքի կողմ» իրավապաշտպան ՀԿ-ի կողմից Երեւանում նոր գրասենյակի բացման վերաբերյալ, որտեղ ԼԳԲՏՔ համայնքը, նրանց ընտանիքի անդամները եւ համայնքի աջակիցները կարող են իրավաբանական եւ հոգեբանական աջակցություն ստանալ:Հրապարակված լուսանկարներում հայտնի տրանսգենդեր Լիլիթն է, ՀՀ-ում Շվեդիայի եւ Նիդեռլանդների դեսպանները, ինչպես նաեւ Մարդու իրավունքների պաշտպան Քրիստինե Գրիգորյանը։ Հաղորդագրության համաձայն, դեսպանները ներկա էին գրասենյակի բացման արարողությանը՝ ի նշան նախաձեռնության աջակցության: Հիշեցնենք, խոսքը նույն տրանսգենդեր կնոջ մասին է, որը 2019 թվականի մարդին Հայաստանի պատմության մեջ առաջին անգամ ԱԺ ամբիոնից հայտարարեց իր տրանսգենդեր լինելու մասին։

Վիգեն Հակոբյանի խոսքով, իրականում խնդիրն այն չէ, որ գործող իշխանությունը հավասարության նշան է դնում հիշատակված արժեհամակարգերի եւ ավանդականի միջեւ այլ այն, որ տվյալ դեպքում, խոսքը գնում է առաջնահերթության մասին՝ գործող իշխանության գաղափարախոսության մեջ դա գերադասելի է։ «Ժամանակին հիշում ենք, թե ինչպես պետական ֆինանսավորում ստացավ տրանսգենդերի մասին պատմող կասկածելի ֆիլմը, բայց դադարեցվեց հայրենասիրական, դաստիարակչական նշանակության նախագծի ֆինանսավորումը, հիշում ենք, թե ինչ անհասկանալի որակի ներկայացումներ էին ֆինանսավորվում, որոնք ցուցադրվում էին մետրոյի հրապարակներում, բայց դադարեցվում էր կրթական եւ ռազմահայրենասիրական նշանակության նախագծի ֆինանսավորումը։ Ամենաբարձր ամբիոններում հայտնվում էին սեռական փոքրամասնությունների ներկայացուցիչները եւ այստեղ, իրականում, զարմանալի ոչինչ չկա, որովհետեւ, իրենց իշխանություն կոչող այս խումբը դրա մասին բազմիցս հրապարակային խոսել է։ Գիտեք, տարբեր մակարդակներում, ուղղակի կամ անուղղակի հանրային քննարկման առարկա էր դարձվում նաեւ նույն մարիխուանայի ազատ օգտագործման հարցը։ Այսինքն, այդ «Օվերտոնի պատուհանը» մինչեւ վերջ է բացվել եւ դա վերաբերում է այս ամենին։ Այդ գրասենյակի բացումը, որին պետական համապատասխան պաշտոնյան է մասնակցել, այդ սերիայից է եւ պետք է որպես օրինաչափություն դիտարկել»,-ասաց քաղտեխնոլոգը։

Վիգեն Հակոբյանի խոսքով, եթե անգամ ՄԻՊ-ին այդ մասին հարց տրվի, նա ուղղակի կասի, որ մեր պետական քաղաքականության հիմքում արժեքային վերանայումներ են եղել։ Մասնագետը համոզված է, որ «Օվերտոնի պատուհանը» բաց է , բայց գործընթացը վերջնականապես ավարտված չէ։ «Սա պետական քաղաքականություն է, նոր արժեհամակարգի ներդրման քայլ է, որը դրսից է պարտադրված եւ , եթե նախկինում հանրությունը բավականին ըմբոստանում էր նմանատռիպ երեւույթների դեմ, այժմ , կարծես թե, հասարակությունը բացարձակապես անտարբեր է, այնպես, ինչպես վերաբերվում է սեփական պետության անվտանգությանը, անկախությանը, սեփական երկրի հողին»,-ցավով արձանագրում է Վիգեն Հակոբյանը՝ նշելով, որ հենց սա է այդ պատուհանը բացելու հետեւանքը։

Քաղտեխնոլոգը նույն քաղաքականության շրջանակում է դիտարկում նաեւ ՄԻՊ Քրիստինե Գրիգորյանի նախաձեռնությունը՝ Սահմանադրական դատարանում վիճարկելու հանրային ծառայության առանձին տեսակների համար սահմանված՝ արհեստակցական միություններին և կրոնական կազմակերպություններին անդամակցության արգելքի սահմանադրականությունը։ Վիգեն Հակոբյանն ասում է՝ ով վճարում է, նա էլ երաժշտությունն է պատվիրում։ «Մենք այս արտահայտությունը եւ փոխաբերական , եւ ուղիղ իմաստով կարող ենք դիտարկել, որովհետեւ գիտենք, թե ինչ ֆինանսական աղբյուրների միջոցով են գործում որոշ կառույցներ, այդ թվում ՝ պետական, եւ տվյալ դեպքում, պարզապես, ՄԻՊ-ն է աչքի ընկել, սա համակարգային մոտեցում է, որի նպատակը ավանդական բոլոր արժեհամակարգերը ջնջելն է, այն ամենը ջնջելը, ինչը հային իդենտիֆիկացնում է իր արժեհամակարգի հետ, հայ լինելու հետ, նպատակն է ազգային ամրանները, կարեւոր ինստիտուտները՝ կրթությունից մինչեւ եկեղեցի, ընտանիք ու բարոյական սկզբունքներ, սվաղել, որպեսզի ստանան այն, ինչ, ըստ էության արդեն ունեն՝ պատերազմում պարտությունը եւ բնակչության այս ամորֆ ու կամզուրկ վիճակը, որովհետեւ նման հասարակությանը հեշտ է կառավարել»,-շեշտում է քաղտեխնոլոգը։

Ինչ վերաբերում է 2018 թվականի, այսպես կոչված, թավշա հեղափոխությանը սեռական ու կրոնական փոքրամասնությունների ակտիվության հարցին եւ իշխանության վարած քաղաքականությանը՝ Վիգեն Հակոբյանն ասաց, որ թերեւս միայն այդ խմբերն են ստացել այն, ինչ ակնկալել են։ «Իհարկե, այդ խմբերը 2018 թվականին չեն ի հայտ եկել, նրանք ավելի վաղ էլ են գործել եւ իրենց գործն արել են՝ քարոզչություն են իրականացրել, աշխատանք են տարել։ Այն ուժերը որոնք նրանց թիկունքին կանգնած են եղել, խոստումներ են տվել եւ այդ խմբերը, գոնե իրենք, ստացել են տրված խոստումները։ Նրանց ակնկալիքներն արդարացել են եւ հիմա մենք , ըստ էության , դրա մասին ենք խոսում»։

Քաղտեխնոլոգը նշում է, որ առհասարակ, արժեհամակարգերի պայքարն ամբողջ աշխարհում է ընթանում եւ հասարակությունը իր դիրքորոշումը հայտնում է՝ կողմ կամ դեմ է լինում կամ , գոնե , բալանսի է բերում այդ հակադրությունը։ Քանի որ Հայաստանում 2018 թվականից ու հատկապես 44-օրյա պատռերազմից հետո որեւէ հարցի շուրջ որեւէ դիրքորոշում չի հայտնում, որեւէ շրջանակի որեւէ բան չի խանգարում Հայաստանում ինչ-ինչ արժեհամակարգ ներդնել։

Աղբյուր` Փաստինֆո