Փաստ ինֆո

Քաշաթաղից բռնի տեղահանված բազմաթիվ քաղաքացիներ այսօր առավոտից կրկին հավաքվել են Կառավարության շենքի դիմաց։ Բողոքի ակցիայի մասնակիցները ՀՀ և Արցախի իշխանություններից պահանջում են ապահովել իրենց տներով կամ փոխհատուցման ծրագիրը վերանայել, որպեսզի հնարավոր լինի տրվող գումարով բնակարան ձեռք բերել։

«15 շահառուի արդեն տվել են սերտիֆիկատ, նրանցից մեկն է ընդամենը կարողացել գումար ավելացնել և տուն գնել գյուղում։ Մնացածները երեք ամսից ավել է՝ չեն կարողանում ոչ գումար գտնել, ոչ բնակարան գնել այդ գումարի սահմանում։ Մեր պահանջը մեկն է. մենք տուն ենք կորցրել, բարի եղեք մեզ տնով ապահովել։ Ձեր առաջարկած ծրագիրը չի աշխատում, դա պարզ երևում է»,-լրագրողների հետ զրույցում ասաց Քաշաթաղից տեղահանվածներից մեկը։

Բողոքի ակցիայի մեկ այլ մասնակից էլ ասում է՝ մարդիկ արդեն շատ երկար ժամանակ է, որ անորոշ վիճակում են։ Խնդիրները շատ են՝ տան վարձերը բարձր են, մի կերպ են գոյատևում, իսկ բնակվարձերի ծրագրից էլ, որ մեկնարկել է, իբր, հուլիսից, դեռ որևէ մեկը չի օգտվել։

«Բնակարանային փոխհատուցման համար ասել են մինչև 10 մլն են տալիս։ Քանի հոգի փորձել են տուն գնել էդ գումարով, չի ստացվել։ Դեռ չեմ խոսում այն մասին, որ մարդիկ 30 տարի տուն են պահել, երեխա են պահել, սահման են պահել, հարկ են մուծել։ Ես գրեթե համոզված են, որ Հայաստանի բնակչության մեծ մասին այս ամենը չի էլ հետաքրքրում։ Մինչև արհավիրքը չի հասնում քո դռանը, չես տեսնում, բայց այսօր այդ թխկոցը լսելի է ՀՀ-ում ամենուր։ Էսօր թուրքն ամեն տեղ է, վախենում եմ գան Մասիվ հասնեն, նույն ձևով անտարբեր մնան Կենտրոնում»,-ասում է նա։

Վերջինս նաև նշում է՝ մինչև հիմա չի հաջողվել իրենց հուզող խնդիրները՝ այդ թվում կարգավիճակի հարցը, անմիջապես Փաշինյանի կամ Արայիկ Հարությունյանի մոտ բարձրաձայնել։ Ասում է՝ ամեն անգամ 3-4-րդ դասի չինովնիկների են ուղարկում, որոնք ոչ մի բան չեն կարող անել։

Աղբյուր` Փաստինֆո