Փաստ ինֆո

Վաշտի հրամանատարը  պատասխան չունի, թե չորս հրամանատարով ինչու՞ են թողել, որ  զորքը ցաքուցրիվ լինի, ասում է՝ չեն կարողացել հավաքել զորքը։ Վաշտի հրամանատար Հայկազ Գրիգորյանը նման հայտարարությամբ է հանդես եկել հենց դատական նիստերի դահլիճում, որտեղ հարցաքննվում էր վկայի կարգավիճակով՝ պատերազմի ժամանակ մարտադաշտն ինքնակամ լքելու մեջ մեղադրվող Իշխան Վահանյանի գործով։

 «Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Ջոն Հայրապետյանի նախագահությամբ, շարունակվում է Իշխան Վահանյանի գործով դատական նիստը, որի ընթացքում հարցաքննվում են վկաները։

Վկա Հայկազ Գրիգորյանը, որը Իշխան Վահանյանի գումարտակի կազմում վաշտի հրամանատար էր, հարցաքննության ընթացքում հայտարարեց, թե պատերազմի ժամանակ գործել են պահից ելնելով, ըստ էության, պլանով չեն գործել, ավելին, վաշտի կազմում են եղել նորակոչիկներ, որոնք պատրաստություն չեն ունեցել, զինված են եղել ինքնաձիգով և ունեցել 120 փամփուշտ, իրենք չեն իմացել՝ որտեղից և ինչպես կհարձակվի հակառակորդը։ Գումարտակի հրամանատար Իշխան Վահանյանի՝ մարտադաշտը լքելուց հետո, ըստ վկայի, իրենք չորս սպա են մնացել, 200 զինծառայող է եղել, ինքը և սպաներից մեկը՝ Վազգեն Վարդանյանը, զինծառայողների մի մասին վերցրել են՝ կազմակերպել նահանջ, իսկ մյուս զինծառայողներից ինքը տեղեկություն չունի։ Ընդ որում, մյուս սպաները դասային կարգով եղել են առավել ցածր՝ դասակի հրամանատար և վկան չպարզաբանեց՝ ինչու ինքը և Վազգեն Վարդանյանը մյուսներին էլ իրենց հետ չեն վերցրել՝ որպես կոչումով ավելի բարձր սպա։

Դատավորի հարցին՝ արդյո՞ք կապի միջոց ունենալու դեպքում կարող էին նահանջի ճանապարհ հարցնել՝ վկան նշեց, որ կարող էին՝ ավելի բարենպաստ ճանապարհ գտնել։

Ընդ որում, նշված վկան և Վազգեն Վարդանյանը կարողացել են գտնել ճանապարհը և դուրս գալ, սակայն զորքի մյուս մասը, որը ճիշտ ճանապարհը չի գտել՝ կա՛մ գերեվարվել են, կա՛մ զոհվել։ Դատավորի հարցին՝ գուցե հրամանատարության բացակայության հետևանքով են իրենք սխալ ճանապարհով գնացել՝ վկան դրական պատասխանեց՝ չբացառելով։ Դատական նիստերի դահլիճում գտնվող Արսեն Ղուկասյանը հայտարարեց, որ այդ ժամանակ հեռախոսազանգով հայտնել են իրենց շրջափակումից դուրս գալու ճիշտ ճանապարհը, վկան էլ արձագանքեց՝ ինքը եղել է Վազգեն Վարդանյանի հետ, նա է հեռախոսով խոսել, ում հետ՝ չգիտի։

Թե ինչ է արել, երբ իմացել են, որ իրենց վաշտի շատ զինծառայողներ չկան՝ Հայկազ Գրիգորյանը հայտարարեց, թե տեղեկացրել են, որ նման իրավիճակ է, դիմել են ԿՄԽԿ՝ նշելով, որ պետք է մտնել, հանել զինծառայողներին, սակայն պատասխան են ստացել, որ ոչնչով իրենց չեն կարող օգնել։

Տուժողի իրավահաջորդի ներկայացուցիչը և նախագահողը հետաքրքրվեցին՝ ի  վերջո, չորս հրամանատարով, ինչ են արել, որ զորքը ցաքուցրիվ չլինի՝ Հայկազ Գրիգորյանը պատասխան չուներ, միայն պատճառաբանեց՝ խուճապը։

Հիշեցնենք, որ Իշխան Վահանյանին մեղադրանք է առաջադրվել ՀՀ քրեական օրենսգրքի 356-րդ հոդվածի (հրամանը չկատարելը) 3-րդ մասով և 380-րդ հոդվածի (մարտադաշտն ինքնակամ լքելը կամ զենքով գործելուց հրաժարվելը) 1-ին մասով: Նրա նկատմամբ որպես խափանման միջոց էր ընտրվել կալանավորումը։ Ըստ ՔԿ-ի՝ Վահանյանը, Ադրբեջանի Հանրապետության կողմից Արցախի Հանրապետության դեմ սանձազերծված ագրեսիվ պատերազմի և 2020թ. սեպտեմբերի 27-ին հայտարարված ռազմական դրության ժամանակ զբաղեցնելով ԱՀ պաշտպանության բանակի զորամասերից մեկի ուսումնական գումարտակի հրամանատարի պաշտոնը, հանդիսանալով իր ենթակա անձնակազմի պետը, մարտական գործողությունների ընթացքում չի կատարել իր անմիջական պետի հրամանը, ինչպես նաև ինքնակամ լքել է մարտադաշտը, որի արդյունքում զորամասի ուսումնական գումարտակի անձնակազմից զոհվել, տարբեր աստիճանի մարմնական վնասվածքներ են ստացել և գերեվարվել պարտադիր ժամկետային զինծառայողներ՝ այդ կերպ առաջացնելով ծանր հետևանքներ: Նշենք, որ այս պահին այս գործով անցնող միակ մեղադրյալը Իշխան Վահանյանն է։ Քրեական գործն ի սկզբանե մակագրվել էր Սյունիքի մարզի ընդհանուր իրավասության դատարանի դատավոր Լ․ Սեփխանյանին, սակայն հետագայում գործի ընդդատությունը փոխվել է՝ պայմանավորված միջադեպով։ Գործն այժմ Երևանի ընդհանուր իրավասության դատարանի դատավոր Ջոն Հայրապետյանի վարույթում է։

Հեղինակ՝ Իզաբել Սահակյան

Աղբյուր` Փաստինֆո