Փաստ ինֆո

Շրջափակման մեջ անորոշ վիճակում նստած էինք, հակառակորդը կրակում էր՝ որ ուղղությամբ էլ փորձում էինք հեռանալ։ Շրջափակման մեջ գտնվելու ընթացքում ենք իմացել, որ Հադրութն արդեն հակառակորդի տիրապետության տակ է։ Այս մասին այսօր դատական նիստում պատմել ուսումնական վաշտի հրամանատար Հայկազ Գրիգորյանը։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Ջոն Հայրապետյանի նախագահությամբ, ընթանում է պատերազմի ընթացքում մարտադաշտն ինքնակամ լքելու մեջ մեղադրվող հրամանատար Իշխան Վահանյանի գործով դատական նիստը, որի շրջանակներում որպես վկա ցուցմունք է տվել վաշտի հրամանատար Հայկազ Գրիգորյանը։

Նշենք, որ մինչ դատական նիստի մեկնարկը դատարանում բավականին լարված իրավիճակ էր։ Խնդիրն այն է, որ անհետ կորած զինծառայողների հարազատ համարվող Արսեն Ղուկասյանը փորձել է ձեռնափայտով մուտք գործել դատարան, ինչն արգելված է, վերջինս հայտարարել է, թե իբրև հաշմանդամություն ունի, սակայն մինչ այս պահը նրա մոտ երբևէ ձեռնափայտ չի եղել, ինչն էլ չի վրիպել կարգադրիչների աչքից։ Վերջինս, ի վերջո, դատարան է մուտք գործել առանց ձեռնափայտի՝ հայտարարելով, թե անիծում է բոլոր այն մարդկանց, որոնք իրենց դեմ են։

Դատական նիստի ընթացքում հարցաքննության ժամանակ ուսումնական վաշտի հրամանատար Հայկազ Գրիգորյանը պատմեց, որ Իշխան Վահանյանի հետ ծառայողական հարաբերություններ ունի, մինչ Խուռհատ սար մեկնելը՝ եղել են Հադրութում։ Խուռհատ սարի վրա եղել են բազմաթիվ վիրավորներ, օգնություն էին ցուցաբերում, այդ ժամանակ՝ լսել է, որ Վահանյանը հայտարարել է իր վիրավորվելու մասին, նստել է վիրավորների մեքենան ու հեռացել։ Դրանից հետո փորձել են հեռախոսազանգի միջոցով կապի դուրս գալ վերադասի հետ, քանի որ կապի միջոց չեն ունեցել հրամանատարության հետ։ Հակառակորդը կրակել է, թույլ չեն տվել դուրս գալ շրջափակումից, 60-65 զնծառայողների հետ կարողացել են դուրս գալ։ Հայկազ Գրիգորյանը, նշենք, որ ուսումնական դասակի հրամանատար էր, ինչը ենթադրում էր, որ վաշտում հիմնականում նորակոչիկներ էին։ Պատասխանելով հարցին՝ արդյո՞ք նորակոչիկները մարտական պատրաստություն անցել էին, տիրապետել են հմտություններին՝ Հայկազ Գրիգորյանը պատճառաբանեց, թե կորոնավիրուսի համավարակի շրջանում էր, նորակոչիկները պատրաստություն չեն անցել, երդմնակալության արարողությունն է եղել, ինչին արձագանքելով զոհված զինծառայողների ծնողներից մեկը նշեց՝ «Երդումով չեն պաշտպանվում»։ Իսկ, թե ով է հրաման տվել՝ զենքին չտիրապետող, անգամ՝ զենք քանդել-հավաքել չկարողացող նորակոչիկներին մարտադաշտ տանել՝ վկան պատասխանեց՝ գումարտակի հրամանատարը։

Շրջափակման մեջ գտնվելիս հետքաշման հրաման է եղել, իսկ թե ում կողմից՝ վկան չգիտեր։ Նա պատմեց, թե տեղեկություն էր ստացվել, որ հրադադար է, սակայն այդ «հրադադարի» ժամանակ ավելի ծանր մարտեր են եղել, հրետանակոծում էին, աժիոտաժ էր, չէր լինում հասկանալ՝ ինչ է կատարվում՝ կողքից հարձակում, դիմացից՝ հարձակում, թիկունքից՝ հարձակում։

Հադրութի զորամասում ևս հարձակում էր, թշնամին հրետակոծում էր, Հադրութի զորամասից այդ ժամանակ զոհ չի եղել։ Տուժողների իրավահաջորդների ներկայացուցիչ, փաստաբան Գուրգեն Գրիգորյանը հայտարարեց՝ Հադրութի զորամասում մնացած 37 զինծառայողները խնդրել էին հարվածել իրենց, որպեսզի թշնամուն ևս հարված հասցվի։

Հիշեցնենք, որ Իշխան Վահանյանին մեղադրանք է առաջադրվել ՀՀ քրեական օրենսգրքի 356-րդ հոդվածի (հրամանը չկատարելը) 3-րդ մասով և 380-րդ հոդվածի (մարտադաշտն ինքնակամ լքելը կամ զենքով գործելուց հրաժարվելը) 1-ին մասով: Նրա նկատմամբ որպես խափանման միջոց էր ընտրվել կալանավորումը։ Ըստ ՔԿ-ի՝ Վահանյանը, Ադրբեջանի Հանրապետության կողմից Արցախի Հանրապետության դեմ սանձազերծված ագրեսիվ պատերազմի և 2020թ. սեպտեմբերի 27-ին հայտարարված ռազմական դրության ժամանակ զբաղեցնելով ԱՀ պաշտպանության բանակի զորամասերից մեկի ուսումնական գումարտակի հրամանատարի պաշտոնը, հանդիսանալով իր ենթակա անձնակազմի պետը, մարտական գործողությունների ընթացքում չի կատարել իր անմիջական պետի հրամանը, ինչպես նաև ինքնակամ լքել է մարտադաշտը, որի արդյունքում զորամասի ուսումնական գումարտակի անձնակազմից զոհվել, տարբեր աստիճանի մարմնական վնասվածքներ են ստացել և գերեվարվել պարտադիր ժամկետային զինծառայողներ՝ այդ կերպ առաջացնելով ծանր հետևանքներ: Նշենք, որ այս պահին այս գործով անցնող միակ մեղադրյալը Իշխան Վահանյանն է։ Քրեական գործն ի սկզբանե մակագրվել էր Սյունիքի մարզի ընդհանուր իրավասության դատարանի դատավոր Լ․ Սեփխանյանին, սակայն հետագայում գործի ընդդատությունը փոխվել է՝ պայմանավորված միջադեպով։ Գործն այժմ Երևանի ընդհանուր իրավասության դատարանի դատավոր Ջոն Հայրապետյանի վարույթում է։

Հեղինակ՝ Իզաբել Սահակյան

Աղբյուր` Փաստինֆո