Փաստ ինֆո

2018-ը մեր երեսով են տալիս մարդիկ, որոնց ներկայացրած քաղաքական ուժերը Նիկոլին էին առաջադրել։ Նիկոլին չեն ընտրել Հանրապետականը և Աղվան Վարդանյանը։ Երկակի ստանդարտներ եք կիրառում։ Այդ  այդ մասին ֆեյսբուքյան ուղիղ եթերում հայտարարել է  ՀՀԿ փոխնախագահ Արմեն Աշոտյանը։

«Սերժ Սարգսյանը միշտ կարողացել է արտաքին ու ներքին միջավայրում գտնել դաշնակիցներ, որոնց հետ համախմբվել է՝ վտանգները չեզոքացնելու համար։ 2018-ին ստեղծվեց մի իրավիճակ, երբ Սերժը ոչ Հայաստանի ներսում, ոչ Հայաստանից դուրս դաշնակիցներ չուներ, որովհետև մեր պատկերացումներն Արցախի ու Հայաստանի ապագայի մասին, ինչպես ասել է Սերժը, չէին համընկնում նրանց պատկերացումների հետ»,-շեշտել է Աշոտյանը։

Նրա արձանագրմամբ՝ Սերժ Սարգսյանի վարչապետ ընտրվելու կապակցությամբ շնորհավորական ուղերձներ են հնչեցրել աշխարհի հզոր երկրների ղեկավարները, բայց որոշ ժամանակ անց նույն այդ դերակատարները, տեսնելով, որ կարելի է պղտոր ջրում ձուկ որսալ, սկսել են աջակցել Նիկոլին։ Աշոտյանի խոսքով՝ հենց այդպես է հրապարակում մարդկանց թիվը 3-4 հազարից հանկարծակի դարձել 15, 20, 30 հազար։

«Նիկոլի միտինգները 3-4 հազարից հանկարծ դարձան 15, 20, 30 հազարանոց։ Դա ո՞նց եղավ։ Այդտեղ մի հատ ճտիկ էր միացել և դա միացել էր դրսի ուժերի կողմից, որոնք անգամ Սերժին շնորհավորելուց հետո շանս տեսան։ Սկզբից Աևմուտքի հետ ասոցացվող մարդիկ շատացան հրապարակում, աղանդավորները, հետո Ռուսաստանն էլ որոշեց հետ չմնալ։ Հատուկ ծառայությունները սկսեցին աշխատել ու ստացվեց այնպես, որ բլորը դարձան Սերժի դեմ»։

Աշոտյանի արձանագրմամբ՝ անգամ մարդիկ, որոնք Սերժ Սարգսյանի պաշտոնավարման ժամանակ հարստացել են, պաշտոն են ստացել, երես էին թեքել, ու Սերժը մնացել էր մենակ՝ մի խումբ համախոհների հետ։

«Անգամ այսօրվա ընդդիմության մեջ բազմաթիվ շրջանակներ կան, որոնք առնվազն ուրախ էին, որ Սերժը գնաց, ու զավեշտ է, երբ այսօրվա մեր պայքարի զինակից ընկերների կողմից հանկարծ նորից շրջանառվում է «Սերժն է մեղավոր» թեզը»,-ասում է Աշոտյանը։

Աղբյուր` Փաստինֆո