Փաստ ինֆո

Արցախի անկախության մասին այսօր որեւէ բան ասելը փարիսեցիություն կլինի, որովհետեւ այսօր ոչ միայն չկա այդ անկախությունը, այլեւ ինքը՝ Արցախը, այսօր հարաբերականորեն է Արցախ :

«Փաստինֆո»-ի հետ զրույցում այս մասին ասաց հասարակական գործիչ, բանասիրական գիտությունների թեկնածու Սփյուռքի նախկին փոխնախարար  Սերժ Սրապիոնյանը՝ անդրադառնալով Արցախի Հանրապետության անկախության օրվա խորհրդին:

«Եթե, ըստ մամուլի, Արցախի նախագահ կոչվածը Շուշիում հանդիպում է ադրբեջանցիների հետ եւ ինչ-որ հարցեր է քննարկում, եթե շատ բացահայտ մարդկանց ասում են՝ թշնամուն հանձնվող Բերձորում տները մի՛ ոչնչացրեք, գույքը մի՛ ոչնչացրեք, նշանակում է՝ տեղի է ունեցել ստորագույնը: Այսօր մամուլում մի խայտառակ լուր աչքովս ընկավ, թե Սուսի ու Աղավնոյի տները վաճառվել են 200 միլիոն դրամով՝ 10-ը միլիոնը բնակչությանը տալու պայմանով: Դուք հասկանու՞մ եք , թե ինչ է կատարվում, ես չեմ հիշում փողով հայրենիք վաճառող որեւէ ժողովուրդ, որի ղեկավարն այդ ժողովրդից լինի եւ երկիրը վաճառի: Արցախը վաճառել են»,-ասաց Սերժ Սրապիոնյանը՝ հավելելով, որ տուն կառուցելիս ամենակարեւորը հիմքի առաջին շարն է:

Սերժ Սրապիոնյանը համոզված է՝ երբ տունը կառուցում էինք, հիմքը սխալ ենք դրել, ինչն էլ հասցրել է ներկա վիճակին եւ այն փաստին, որ հասարակությունը չկարողացավ գնահատել Արցախի անկախությունը: «Սխալն այն է, որ այդ ժամանակ Հայաստանում նույն էյֆորիայով եւ ամբոխային ոգեւորությամբ օտարերկրյա գործակալ բերվեց, փաստաթուղթ հրապարկվեց, որ նա համագործակցում է Իսրայելի հատուկ ծառայությունների հետ, նրա կոչումը հրապարակվեց: Ես իրավունք ունեմ այդպես կարծելու: Ղեկին նստած էր Լեւոն Տեր-Պետրոսյանը եւ այսօր հասկանում ենք, որ նա հնարավոր բոլոր քայլերին գնացել է, որ այն ժամանակ մեր հաղթանակը կատարյալ չլիներ»,-համոզմունք է հայտնում Սրապիոնյանը:

Նա նկատում է՝ հասարակության կողմից ոչ միանշանակ ընկալվեց այն, որ Հայաստանի ղեկավարները Արցախից էին: Ըստ Սրապիոնյանի, այդկերպ, ժամանակին փորձ է արվել Արցախը հանձնելու խաղաքարտը , այսպես ասած, գցել հենց արցախցիների գրպանը, ինչը, սակայն, ժամանակին չստացվեց: «Այդ ղեկավարները ՄԱԿ-ի ամբիոնից, միջազգային այլ հարթակներից շատ հստակ իրենց դիրքորոշումը հայտնում էին, որ Արցախը Ադրբեջանի կազմում չի կարող լինել: Նրանք գնում էին այն տարբերակով, որը մենք համարում էինք փոխզիջում: Այս ամենի առանցքում Արցախի դե ֆակտո անկախությունն էր դրված, մենք հույս ունեինք, որ Արցախի անկախության ճանաչումից հետո հանրաքվեով այն կմիավորվի մայր Հայաստանի հետ, բայց ես վստահ եմ, որ դա հանգիստ չէր տալիս ո՛չ Լեւոն Տեր-Պետրոսյանին, ո՛չ նրա տերերին , ո՛չ էլ այս դրածոյին, ուստի նրանք հնարավոր ամեն բան արեցին, որ Արցախը հանձնվի, իսկ դա անարյուն չէր կարող լինել»:

Սերժ Սրապիոնյանի համոզմամբ, 44-օրյա պատերազմը պայմանավորված էր, որի նպատակն Արցախի հանձնումն էր: Սերժ Սրապիոնյանը նաեւ արձանագրում է՝ Աղավնոյի, Սուսի հանձնման ընթացքում Արցախի՝ իրեն նախագահ երեւակայող Արայիկ Հարությունյանը ընդամենը մեկ անգամ խոսեց՝ նշելով, թե Լաչինն ու Բերձորը տալու ենք, իսկ գյուղերի հարցով բանակցություններ են ընթանալու: Ըստ Սրապիոնյանի, անգամ այնպես արվեց, որ Արցախի ԱԽ քարտուղարն այնտեղ երեւա եւ նրան մեղավոր նշանակեն, քանի որ այսօր մենք ապրում ենք մեղավորներ նշանակելու ժամանակներում: «Բոլոր հնարավոր տարբերակները մտածել են՝ Արցախը դատարկելու համաոր: Հո՞ պատահական չէր, որ Ալիեւը եվրոպացի խորհրդարանականների հետ եկավ Շուշի «Խանքենդի» անունը կրող ինքնաթիռով: Ոչինչ պատահական չի արվում»:

Դիտարկմանը, թե արդյո՞ք հասարակությունն այս ամենը չի տեսնում եւ չի հասկանում, Սերժ Սրապիոնյանն արձագանքեց՝ հիշելով աղքատությունը մարդկանց գլուխներից հանելու Փաշինյանը հայտարարությունն ու ասաց, որ մեր գլխում պիտի փոխենք վերաբերմունքը եւ պետք է հասկանանք՝ այսօր երկու տեսակի թշնամու դեմ ենք պայքարում՝ արտաքին եւ ներքին: «Մենք արտաքին թշնամուն շատ լավ ենք ճանաչում, բայց ներքին թշնամուն մինչեւ ճանաչեցինք, ամեն ինչ տանուլ տվեցինք: Ես կարծում եմ, որ ճանապարհը համաժողովրդական ընդվզումն է: Ո՞նց կարողացան էներգիայի թանկացման պատճառաբանությամբ ժողովուրդ լցնել փողոցները: Եթե կարողանում են մեզ տեխնոլոգիաներով ոչնչացնել, մենք էլ պետք է կարողանանք մեզ պաշտպանելու տեխնոլոգիան գտնել»,-ասում է հասարակական գործիչը՝ հավելելով, որ ժողովրդին պետք է հասկացնել, ցույց տալ, թե ինքն անդուդի եզրի ո՞ր հատվածում է գտնվում:

«Իսկ գտնվում ենք այն հատվածում, որից մի թեթեւ քամին էլ անդունդը կգլորի: Դուք կարծում եք Վեդիի դեպքը պատահակա՞ն էր, ո՛չ, տեխնոլոգիա է, որ ժողովրդի աչքը կսովորի, որ թուրքը եկել է, դե, ոչինչ ղալմաղալ է եղել, հետո մյուս թուրքը կգա...Մենք աստօիճանաբար կսկսենք այդ մտքի հետ հաշտվել, ինչը չպետք է թույլ տալ: Այսօր Հայաստանի ու Արցախի համար գլխավոր կործանիչ ուժը հենց Հայաստանի ներսում է գտնվում»,-շեշտում է Սրապիոնյանը, որի համոզմամբ, այլ ճանապարհ չկա, քան սա գիտակցելը, եթե իսկապես, ցանկանում ենք Արցախի եւ նաեւ Հայաստանի անկախության մասին խոսել :

Աղբյուր` Փաստինֆո