Փաստ ինֆո

Պետք է թողնենք մեր բոլոր ամբիցիաները, որպեսզի փրկենք Արցախը, ինչու չէ՝ նաեւ Հայաստանը։ Այսօր Ֆրանսիայի հրապարակում տեղի ունեցած հանրահավաքում հայտարարել է 44-օրյա պատերազմում նահատակված Հակոբ Ռոստոմյանի հայրը՝ Արա Ռոստոմյանը՝ ընդգծելով, որ զոհված զինծառայողների ծնողներով պահանջում են ձերբակալել թիվ 1 դավաճանին՝ Նիկոլ Փաշինյանին։

«Այսօր մեծ խորհուրդ կա, եւ ինձ համար դա կրկնակի է, որովհետեւ երկու սերունդ իր կյանքը զոհել է։ Առաջին սերունդն ընկերներս էին, որոնք այդ անկախության համար մի վայրկյան անգամ չվարանելով, զոհաբերեցին իրենց կյանքը։ Եվ թվում էր, թե անկախությունն արդեն 30 տարի ամրապնդված է։ Եվ ահա 2018թ. ամեն ինչ գլխիվայր շրջվեց։ Դարձյալ անկախության գլխին ամպեր կուտակվեցին եւ 2020թ. հրահրվեց պատերազմ։ Արցախը պաշտպանելու համար այս անգամ մարտի գնացին մեր տղաները։ Ու դարձյալ պահեցին Արցախի անկախությունը, որն այսօր կա, երերուն, բայց կա։

«Հիմա մտածում եմ՝ արդյո՞ք կարող ենք այսքան ժողովրդով, որ հավաքված ենք այստեղ, պահենք այդ անկախությունը։ Իհարկե՝ ոչ։ Մինչեւ յուրաքանչյուրը չգիտակցի, որ վաղը կարող է այդ վիշտն իր տուն մտնի, չենք կարող Արցախը պահել։ Դրա վառ օրինակն է, որ ամեն ամիս մի գյուղ հանձնում ենք։

Երեկ սեպտեմբերի մեկն էր՝ ուսումնական տարվա մեկնարկը։ Ծնողներն իրենց երեխաներին ուրախ տանում էին առաջին դասարան, ոմանք նույնիսկ չէին գիտակցում, որ եթե մեկ ամիս առաջ ոտքի կանգնեին, միգուցե այսօր Աղավնոյում էլ երեխաները դպրոց գնային»,- հայտարարեց հերոսի հայրը։

Նրա արձանագրմամբ՝ այսօր Հայաստանն էլ կարող ենք կորցնել։ «Թուրքն այսօր արդեն Վեդիում քեֆ է անում, վաղն էլ կարող է Արարատում անի, մյուս օրն էլ՝ Տավուշում։ Ու կասեն՝ հա, ի՞նչ է եղել որ։

Այսինքն՝ մեզ կամաց-կամաց սովորեցնում են, որ հաշտվենք դրա հետ»,- նկատել է Ա.Ռոստոմյանը։

Աղբյուր` Փաստինֆո