Փաստ ինֆո

Արցախի անկախության և ազատագրման համար հայ ժողովուրդը շատ է պայքարել, Արցախի անկախությունը հայ ժողովուրդն իր զավակների արյան գնով է ձեռք բերել:

Արցախը հայ ժողովրդի արժանապատվությունն է, մեր անցյալն է, մեր ներկան ու ապագան։ Այս մասին, «Դիմադրություն» շարժման հանրահավաքի ժամանակ ասաց Ազգային ժողովի պատգամավոր Իշխան Սաղաթելյանը։

«Բոլոր նրանք, ովքեր ասում են՝ եկեք հայրենիքի մի մասը զիջենք, որ մյուս մասը փրկենք, գլուխները պատին են տալիս։ Այս պատասխանատու օրը ես ասում եմ՝ Հայաստանը Արցախ է և վերջ, քանի որ Արցախի գլխին կանգնած աղետը նաև Հայաստանի աղետն է»,-ասաց Սաղաթելյանը:

Նրա խոսքով՝ Արցախն այսօր կանգնած է աղետի, հայաթափման և էթնիկ զտման առջև:

Սաղաթելյանն ընդգծեց՝ կա երեք կարևոր սկզբունքային պահանջ, որը պետք է ապահովել․ առաջինը՝ պետք է բացառվի որևէ լուծում, որով Արցախը կհայտնվի Ադրբեջանի կազմում, երկորդը՝ պետք է բացառվի Արցախի անկլավային վիճակը, այսինքն՝ Արցախի և Հայաստանի միջև պետք է լինի կայուն և հուսալի ցամաքային կապ և երրորդը՝ պետք է բացառվի Արցախի ապառազմականացումը, այսինքն՝ Հայաստանի Հանրապետությունն իր զինված ուժերով պետք է ապահովի կայուն անվտանգային համակարգ.

«Այս երեք պարտադիր պահանջների կատարումը կկանխի Արցախի հայաթափումը: Ցավոք, Հայաստանում չկա որևէ սյուբեկտ, որը պաշտպանում է Արցախի, Հայաստանի և հայ ժողովրդի շահերը։ Ընդորում՝ այդ սյուբեկտը չկա, ո՛չ Հայաստանում, ո՛չ Արցախում, ո՛չ էլ սփյուռքում։ Միակ սյուբեկտը, իր լավ ու վատ, թույլ և ուժեղ կողմերով «Դիմադրության» շարժումն է և այս հրապարակը, բոլոր նրանք, ովքեր իրենց գործողություններով փորձում են պառակտել շարժումը, փորձում են խոչընդոտել շարժման ընդլայնմանը, ջուր են լցնում Նիկոլի եւ Ալիեւի ջրաղացին»,-ասաց Իշխան Սաղաթելյանը։

Իր ելույթում Իշխան Սաղաթելյանը դիմեց նաև ԱԱԾ պետ Արմեն Աբազյանին, Ոստիկանության պետ Վահե Ղազարյանին, Քննչական կոմիտեի պետ Արգիշտի Քյարամյանին, Հակակոռուպցիոն կոմիտեի պետ Սասուն Խաչատրյանին, գլխավոր դատախազ Արթուր Դավթյանին և ասաց, որ այսօր նրանք են Նիկոլ Փաշինյանի իշխանության միակ պահապանը եւ հենարանը։

«Դուք անձամբ պատասխանատվություն եք կրում ամեն օր ու ժամ մեր հայրենիքի կորուստների համար, դուք եք այն մարդիկ, ովքեր հետևողական խոչընդոտել և խոչընդոտում են «Դիմադրություն» շարժման ընդլայնմանը՝ ձեր բռնաճնշումներով, բանտարկություններով, հետապնդումներով։ Ամեն օր փորձում եք ճնշել մարդկանց՝ պահելով Նիկոլի իշխանությունը ու սրանով նպաստելով մեր հայրենիքի կորստին: Դուք չեք կարող ասել, թե ծառայում ենք Հայաստանի Հանրապետությանը, դուք ծառայում եք մի դավաճան խելագարի։ Ամոթ է, վերջ տվեք այդ ճնշումներին, հավատարիմ եղեք ձեր ուսադիրներին, ձեզ մի դասեք այդ վերջացած ուսապարկերի շարքին»։

Աղբյուր` Փաստինֆո