Փաստ ինֆո

Երեկ Բրյուսելում կայացած Փաշինյան-Ալիև-Միշել եռակողմ հանդիպման մասին շատ կցկտուր տեղեկություններ կան, եղածից էլ կարելի է ենթադրել, որ Հայաստանի համար օգտակար կամ մեր կենսական շահերը սպասարկող որևէ որոշում չի եղել, դրա համար էլ կատերգորիկ փակ է տեղեկատվությունը: «Փաստինֆո»-ի հետ զրույցում նկատել է «Հայրենիք» կուսակցության խորհրդի անդամ Խաչիկ Գալստյանը։

«Կառավարության խողովակները կցկտուր, սուղ տեղեկությունից բացի որևէ բանի մասին չեն խոսում, եթե թեկուզ մի փոքր դիրքային առաջխաղացում լիներ բանակցային օրակարգում, ապա ֆեյսբուքում իշխանությանը գովաբանող տեքստերի հեղեղ կլիներ»,-ասաց Գալստյանը:
Ըստ նրա՝ այս ամենը թույլ է տալիս ենթադրելու, որ հերթական անգամ հայ ժողովրդի թիկունքում, փակ դռների հետևում իշխանությունները, Ալիևի հետ միասին, ձեռք են բերել նոր դավադիր համաձայնություններ:

Վերլուծելով հանդիպման վերաբերյալ կողմերի պաշտոնական հաղորդագրությունները՝ Խաչիկ Գալստյանը նկատում է՝ «խաղաղության օրակարգը», ինչի մասին այսքան խոսում են, վերջին հանդիպման ընթացքում արդեն առարկայացվել է և կոնկրետ հանձնախմբեր աշխատելու են դրա վրա.

«Չեմ բացառում, որ ինչպես մեկ գիշերում կնքեց նոյեմբերի 9-ի խայտառակ հայտարարությունը, այս անգամ էլ մի գիշերվա մեջ խաղաղության պայմանագիր ստորագրի»,- ասաց զրուցակիցը:

Երեկվա հանդիպումից հետո ԵԽ նախագահ Շառլ Միշելը հայտարարել է, որ պայմանավորվածություն է ձեռք բերվել Սահմանազատման և սահմանային անվտանգության հարցերի հանձնաժողովի հաջորդ հանդիպումը անցկացնել Բրյուսելում:

Խաչիկ Գալստյանը հիշեցնում է ՝ ռուսական կողմը բազմաթիվ անգամներ ասել է, որ սահմանագծման և սահմանազատման քարտեզները պահում են իրենց արխիվներում, ուստի անհասկանալի է՝ ինչպես են եվրոպացիները ներգրավում այս աշխատանքներին.

«Ես չեմ կարծում, որ նման կոշտ մրցակցության պայմաններում ռուսները այդ քարտեզները «բանտիկով» եվրոպացիներին կտրամադրեն, որպեսզի նրանք էլ գան ու Կովկասում սահմաններ գծեն, այդպես չի լինում, սա անթույլատրելի է: Մեր իշխանությունները խոշոր խաղացողների հակասությունների համատեքստում փորձում են կրակից շագանակներ հանել»,-ասաց Գալստյանը:

Իսկ թե արդյո՞ք մեր իշխանությունները չեն հասկանում աշխարհաքաղաքական նման խաղերի վատ հետևանքները՝ զրուցակիցը նշում է՝ նրանց հիմնական շարժառիթը իշխանությունը հնարավորինս երկար պահելն է, իսկ թե ո՞վ կլինի սրա երաշխավորը՝եվրոպացիները, թուրքերը, թե ռուսները, իրենց համար նշանակություն չունի.

«Ով իրենց իշխանության մնալու երաշխիք կտա, նրա ասածն էլ կանեն, իրենք թուրք-եվրոպական կամ ռուսական երաշխիքների հետևից գնալով՝ նրանք մոռացել են, որ հայկական պետության շահերը պետք է պաշտպանեն»,-եզրափակեց Խաչիկ Գալստյանը:

Աղբյուր` Փաստինֆո