Փաստ ինֆո

ՀՀ ոստիկանության գնդապետ Սայաթ Շիրինյանի պաշտպանները պահանջում են արդարացնել Շիրինյանին՝ առաջադրված մեղադրանքում։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Տաթևիկ Գրիգորյանի նախագահությամբ, այսօր կայացել է ՀՀ ոստիկանության պահեստազորի գնդապետ Սայաթ Շիրինյանի գործով դատական նիստը, որի ընթացքում պաշտպանության կողմը ճառով հանդես եկավ՝ պահանջելով արդարացնել Սայաթ Շիրինյանին՝ առաջադրված մեղադրանքում։

Ինքը՝ Շիրինյանը, պաշտպանական ճառում նախ զգուշացրեց՝ դատարանի դիտողությանը չարժանանալու համար կզսպի էմոցիաները, ապա շարունակեց՝ արձանագրելով, որ այս իշխանություններին ծառայող իրավապահ համակարգին միայն շոուն է հետաքրքրում։ Շիրինյանը հիշեցրեց նաև Մարտունիում «սրճեփ» գողանալու գործը, ինչը Շիրինյանի գնահատմամբ՝ ծաղր էր։

«Սրանք չկարողացան հասկանալ, որ ես հանդուգն եմ, անկոտրուն կամք ունեմ, ես չեմ վախենում սրանցից, եթե ես վախկոտ լինեի, կմնայի կծառայեի, նման հնարավորություն ունեի, բայց ինձ դա պետք չէր, ես իմ պետության, պետականության համար եմ կռիվ տալիս։ Ունեի շատ մեծ հնարավորություն՝ չգալու, քաղաքական խնդիրներին չմասնակցելու, բայց պետությունս եմ կորցնում։ Սրանք գալիս բյուրոկրատական բաների մասին են խոսում, Բերձորն առանց կրակոցի տվեց, Սոսը տվեց, Աղավնոն տվեց, բա ով մտածի այս ամենի մասին »,- նշեց Շիրինյանը, ինչին ի պատասխան նախագահող դատավորը հորդորեց խոսել գործի շրջանակներում։

Շիրինյանը նշեց, որ գործը խարխսված է հենց քաղաքական հիմքերի վրա, ինքն ամբողջ ընթացքում եղել է օրինապահ քաղաքացի, ինքն է պայքարել հանցավորության դեմ և պատահաբար ինքն է դարձել հանցագործ։ Շիրինյանը հայտնեց, որ իրեն բազմիցս են ասել՝ լռել, սակայն ինքը շարունակում է պայքարել, ինքը չի պատրաստվում տուն գնալ և իր դիմաց խոտ դնեն, թող իրավապահ համակարգը մտածեն։

«Եթե ոստիկանները, դատախազները կարող են իրենց պագոնների տակ թաքնվել, բայց երբ գալիս է դատարանը՝ Դուք հանուն ՀՀ-ի եք դատում, եթե անգամ կալանավորեք ինձ, անկեղծորեն եմ ասում՝ Ձեր հասցեին ոչինչ չեմ ասի, բայց շատ կափսոսամ, որ Դուք դրանով արդարադատությունը կթաղեք։ Եթե ես հանցագործություն կատարած լինեի, տղամարդավարի կասեի՝ այո, արել եմ, չէի ասի՝ ներողություն եմ խնդրում, իրենց ուզածը՝ 150.000 դրամը չի՞ »,- նշեց Շիրինյանը։

Դատական նիստը հետաձգվեց՝ մինչև սեպտեմբերի 13-ը։

Հիշեցնենք, որ 2020թ դեկտեմբերի 23-ին Սայաթ Շիրինյանը բերման է ենթարկվել ՀՀ ոստիկանության Արաբկիրի բաժանմունք, ապա ձերբակալվել՝ ՀՀ քրեական օրենսգրքի 226.2-րդ հոդվածի 1-ին մասի՝ բռնություն գործադրելու հրապարակային կոչեր պարունակող գրառում կատարելու կասկածանքով։ Քրեական գործի հարուցման համար հիմք է դարձել ֆեյսբուք սոցիալական ցանցում արված մեկնաբանությունը, մասնավորապես Շիրինյանը գրել էր՝ «Cусанна Авшарян, եթե ես լինեի շարժումը առաջնորդողը, ապա վստահ եղեք, մենք կգնայինք կոնկրետ քայլերի, չնայած կազմակերպիչներին չեմ քննադատում, քանզի նրանք խուսափում են արյունահեղությունից: Բայց արդեն պարզից էլ պարզ է, որ առանց արյունահեղության հնարավոր չի»։ Քրեական գործի շրջանակներում Սայաթ Շիրինյանին մեղադրանք է առաջադրվել ՀՀ քրեական օրենսգրքի 226.2-րդ հոդվածի 1-ին մասի հատկանիշներով, նրա նկատմամբ որպես խափանման միջոց է ընտրվել ստորագրությունը՝ չհեռանալու մասին։

Հեղինակ՝ Իզաբել Սահակյան

Աղբյուր` Փաստինֆո