Փաստ ինֆո

ՊԲ նախկին հրամանատար, Արցախի նախագահի գլխավոր խորհրդական Միքայել Արզումանյանի ձերբակալման ժամկետը լրացել է, նա ազատ է արձակվել։ Այս մասին «Փաստիֆո»-ի հետ զրույցում ասաց փաստաբան Երեմ Սարգսյանը։

Ինչպես արդեն տեղեկացրել ենք՝ Միքայել Արզումանյանը ձերբակալվել է երեկ՝ ՔԿ-ում քննվող քրեական գործի շրջանակներում՝ նրա նկատմամբ կալանավորումը որպես խափանման միջոց ընտրելու միջնորդությունը քննարկելու նպատակով դատարան ներկայացնելու համար։ Միքայել Արզումանյանին մեղադրում են Շուշին «հանձնելու» մեջ, մասնավորապես, ըստ ՔԿ տարածած հաղորդագրության, գեներալ-լեյտենանտը 2020 թվականի հոկտեմբերի 30-ից մինչև նոյեմբերի 9-ը Շուշիի և հարակից շրջանների պաշտպանության կազմակերպման ընթացքում անփույթ վերաբերմունք է դրսևորել իր ծառայողական պարտականությունների նկատմամբ՝ չկատարելով և ոչ պատշաճ կատարելով դրանք, ինչը անզգուշությամբ առաջացրել է ծանր հետևանքներ։

Փաստաբան Երեմ Սարգսյանը «Փաստինֆո»-ի հետ զրույցում նշեց, որ օրենսդրական նոր կարգավորումների համաձայն՝ ձերբակալման իրավաչափության հարցը կալանքի միջնորդության հետ պետք է քննարկվի, սակայն միայն այն փաստը, որ ձերբակալման առավելագույն ժամը լրանալուց հետո անգամ նրան պահել են անազատության մեջ՝ դատարանում, քիչ հույսեր է տալիս, որ դատարանը հանկարծակի կարող է այն ոչ իրավաչափ ճանաչել։ Այժմ Արզումանյանն ազատության մեջ է, քանի որ ձերբակալման ժամկետը լրացել է, ժամը 19.00-ին դատական նիստը կվերսկվի, կքննարկվի կալանավորման միջնորդությունը։

Ինչ վերաբերում է մեղադրանքին, պաշտպանի փոխանցմամբ, Արզումանյանն իրեն բնականաբար մեղավոր չի ճանաչում։ Ավելին, մեղադրանքի բովանդակությունը կարդալիս, տեսնում ենք, որ շատ գեղեցիկ նկարագրություններ են կատարել, թե, ընդհանրապես, ամենաիդեալական իրավիճակում, ինչ պետք է արվեր, ՊԲ հրամանատարն ինչ պարտականություններ ունի՝ զորքի բարոյահոգեբանական վիճակի, նյութական ապահովման համար, բայց, ինչպես նշեց փաստաբանը, մոռանում են, որ Ջալալ Հարությունյանի վիրավորում ստանալուց հետո՝ ակամայից անակնկալ ձևով հրաման են տվել՝ Արզումանյանին ՊԲ հրամանատար նշանակելու մասին և նման դեպքերում առնվազն որոշ ժամանակ պետք է՝ այդ ամբողջ քաոսի մեջ, խուճապի մեջ տեղեկատվություն ստանալու, իրավիճակը վերականգնելու համար։

«Այն ինչ արվել է, առնվազն պարոն Արզումանյանի կողմից առավելագույնն ու անհնարինն է արվել այդ պահին և, թե ինչու են այդքան ժամանակ անց հանկարծ որոշել նման մեղադրանք առաջադրել, նման կերպով ձերբակալել, հերիք չէ՝ կալանավորման միջնորդություն ներկայացնել, պետք է առանձին վերլուծել, որը հետագայում կներկայացնեմ»,- նշեց Սարգսյանը՝ միաժամանակ համոզմունք հայտնելով, որ դատարանը կալանավորելու որոշում կկայացնի։
Հարցին՝ արդյո՞ք քավության նոխազ են փնտրում՝ պատերազմում անհաջողությունների բեռը բաշխելու համար՝ Սարգսյանը նշեց, որ այժմ զերծ կմնա նման մեկնաբանություններից, սակայն հետագայում՝ դիրքորոշում կհայտնի։

Ինչ վերաբերում է ավելի վաղ գործի շրջանակներում Արզումանյանի մասնակցությամբ իրականացված գործողություններին, ապա Սարգսյանը հայտնեց, որ Միքայել Արզումանյանը երեք անգամ հարցաքննվել է և իրականությանը չի համապատասխանում այն տեղեկությունները, թե, իբր, ծանուցում է տրվել եւ նա չի ներկայացել։ Առնվազն, նման ծանուցում չի հանձնվել, հետևաբար, հարկադրաբար բերման ենթարկելու, ձերբակալելու փաստը ճիշտ չէ և այդ գործողություններն անհիմն են։

«Թե ինչու որոշվեց, որ պետք է իրեն մեղադրանք առաջադրեն, կարծում եմ, երևի այլ անձինք և այլ տեղում են որոշում»,- նշեց փաստաբանը։
Իսկ թե ինչու էր Արզումանյանը ՀՀ եկել, որտեղ էր ձերբակալվել է, փաստաբանը նշեց՝ տեղեկություն չունի, կարծում է՝ անձնական հարցերով։

Հեղինակ՝ Իզաբել Սահակյան

Աղբյուր` Փաստինֆո