Փաստ ինֆո

Գլխավոր դատախազն ընդամենը երկու օր ժամանակ ունի Նիկոլ Փաշինյանին ձերբակալելու և Դավթյանների ընտանիքի վրայից դավաճանների պիտակը հանելու համար։ Միևնույնն է, ինքը դատապարտվելու է, որովհետև այս դավաճանությանն օժանդակել է, բայց այսօր պետք է անի այդ քալը՝ ձերբակալի։ Այս մասին Գլխավոր դատախազության շենքի մոտ բողոքի ակցիայի ընթացքում ասաց պատերազմում զոհված Մխիթար Գալեյանի հայրը՝ Գարիկ Գալեյանը։

«Փաշինյանը վաղը մեկնում է Բրյուսել՝ հանդիպման, բայց չենք ուզում, նա չպետք է ներկայացնի հայ ժողովրդին, նա դրա իրավունքը չունի։ Մենք պահանջում ենք, որ գլխավոր դատախազը կանխի նրա գործողությունները, այն էլ՝ որքան հնարավոր է շուտ։ Ես նորածին որդուս սիրելուց կոմպլեքսավորվում եմ, որովհետև վաղը մեծանալու և ասելու է՝ պապ, որ ապերին սպանեցին՝ ով պատասխան տվեց, ասելու եմ՝ պատասխան չտվեցին, որովհետև երկրի գլխավոր դատախազը դավաճան էր, ոստիկանապետը, գեներալիտետը դավաճան էր, ասելու է՝ բա որ դավաճան է, ինչու եղբորս ուղարկեցիք բանակ»,- նշեց Գալեյանը՝ հավելելով, որ վաղը Փաշինյանը ինչ-որ այլ փաստաթուղթ կստորագրի, որի հետևանքով կսկենք Հայաստանից տարածքները տալ։

Նրա խոսքով՝ գլխավոր դատախազն իր արարքով իր ընտանիքի անդամների վրայից դավաճանի պիտակը պետք է հանի, գործի, հաշվի, որ, եթե տեղից վեր է կենում և քայլում, ունի ողնաշար, թող իր այդ ողնաշարը գոնե մեկ անգամ ազգի համար օգտագործի, իսկ եթե նա արձակուրդում է, թող իրեն փոխարինող ողնաշարովն անի։

«Եթե սատանան էլ դուրս գա այս իշխանության դեմ պայքարելու, ես կանգնելու եմ նրա կողքը, որովհետեւ եթե վաղը իմ երեխան հարցնի, թե ով պատասխան տվեց ապերի մահվան համար, ես պատմելու բան չեմ ունենալու:

Ես չեմ կարծում, որ դատախազությունում բոլորը Արթուր Դավթյանի նման անողնաշար են: Քանի որ Արթուր Դավթյանը ցուցում է տվել հարցաքննել Նիկոլ Փաշինյանին, բայց քննչական կոմիտեն արհամարհում է, կամ էլ վերցրել հանցակազմի բացակայությամբ մերժել է դավաճանությունը»,-ասաց Գարիկ Գալեյանը:

Աղբյուր` Փաստինֆո