Փաստ ինֆո

Բրյուսելում վաղը նախատեսված Փաշինյան-Ալիև-Շառլ Միշել հանդիպումից որևէ դրական ակնկալիք պետք չէ ունենալ: «Փաստինֆո»-ի հետ զրույցում նման կարծիք է հայտնել քաղաքագետ Լևոն Մնացականյանը:

«Փաշինյանի կառավարությունից հայամետ որեւէ գործողություն սպասելն ահնար է, արդեն 4 տարի է ՝ մենք տեսնում ենք, որ փորձ է արվում միայն ազգայինը վերացնել, որպեսզի ազգի դիմադրողականությունը կոտրվի, իսկ պատերազմից հետո էլ Հայաստանն ու հայ ժողովուրդը անընդհատ նահանջում են և դեռ նահանջելու են, հետևաբար, Շառլ Միշելի «թամադայությամբ» հանդիպումից սպասումներ պետք չէ ունենալ»,-ասաց Մնացականյանը:

Ըստ ադրբեջանական կողմի՝ Փաշինյան-Ալիեւ հանդիպման ժամանակ ակնկալվում է համաձայնեցնել աշխատանքային խմբի ստեղծումը, որը պետք է նախապատրաստի Ադրբեջանի ու Հայաստանի միջեւ խաղաղության պայմանագիրը:

Մեր հարցին՝ հանդիպման ընթացքում հնարավոր է որևէ նոր փաստաթուղթ ստորագրվի կամ նոր համաձայնություն ձեռք բերվի՝Լևոն Մնացականյանի պատասխանը կարճ էր՝ ոչ.

«Լինելունն արդեն եղել է 2020թ-ի նոյեմբերի 9-ին, դրանից հետո փաստաթուղթ ստորագրվի, թե չստորագրվի կարևոր չէ, պարզ տեսնում ենք, որ հայկական կողմը միայն նահանջում է»,-ասաց փորձագետը:

Զրուցակիցն ընդգծում է՝ այս պահին առավել քան անհրաժեշտ է, որ Նիկոլ Փաշինյանը հեռացվի իշխանությունից, քանի որ չհեռացվելու պարագայում իրավիճակից օգուտ քաղել չենք կարող, փոխարենը՝ միայն նահանջ ենք ունենալու.

«Այլ հարց է՝ որոշ ընդդիմադիր շրջանակներ ինչպիսի վարքագիծ են դրսևորում և շահեր են հետապնդում՝դրանից ելնելով է, որ Փաշինյանը առայժմ մնացել է իշխանության »,-հավելեց քաղաքագետը:

Ըստ նրա՝ այս պահին Հայաստանի շահերից է բխում միայն Իրանի հզորացումը, քանի որ Իրանը այժմ միակն է, որը դեմ է «Զանգեզուրի» միջանցքին և կարող է կանխել դա.

«Հայաստանը, որպես Աստծո երկիր, հերթական անգամ փրկվում է, քանի որ միջանցքի լինելիության պայմաններում Հայաստանից ոչինչ չի մնա պարզապես, մենք կտեսնենք մեծ թվով թուրքեր և ադրբեջանցիներ Հայստանում, ինչը հոգեբանական տեռորի կենթարկի մեր հանրությանը և կնպաստի հայաթափմանը »,-ասաց Լևոն Մնացականյանը՝ արձանագրելով՝ Իրան-Հայաստան-Վրաստան գիծը զերծ է պահում Ռուսաստան-Թուրքիա-Ադրբեջան դաշինքին՝ որոշակի գործընթացներ իրականացնելուց;

Նկատենք, որ վերջին շրջանում Արևմուտքը և ԵՄ-ն փորձում են Արցախի հարցով բանակցությունների նախաձեռնությունը իրենց ձեռքը վերցնել՝ հաճախակի հանդիպումներ կազմակերպելով և հեռախոսազրույցներ նախաձեռնելով:

Լևոն Մնացականյանի դիտարկմամբ՝ Արևմուտքը տարածաշրջանում իր ազդեցության մեծացման խնդիր է լուծում.

«Վերջին շրջանում մենք տեսնում ենք որ էրդողանյան և պուտինյան վարչախմբերը հաջողությամբ կարողանում են զերծ պահել Արևմուտքին տարածաշրջանում իր ազդեցության լծակներից, սա ավելի քան բնական է, որ Արևմուտքը փորձում է come back անել »,-ասաց նա:

Ինչ վերաբերում է ռուսական կողմին՝ քաղաքագետը նկատում է՝ Ռուսաստանը այս պահին Ադրբեջանին սիրաշահում է ՝ակնկալելով հետագայում Ադրբեջանին տեսնել նոր կազմավորվելիք Միութենական պետության կազմով.

«Հիմա մեր հաշվին լավություն է արվում Ադրբեջանին, բայց հետագայում Ադրբեջանն էլ պետք է հատուցի ու դուրս գա լավության տակից, որը շատ թանկ է նստելու ադրբեջանցիների վրա, քան այն ամենը ինչ մեզ հետ պատահեց: Բայց սրանից հետո լինելու է հակառակ պրոցեսը, Ադրբեջանի հաշվին սկսելու են լավություն անել հայերին: Հիմա Ադրբեջանին չաղացնում են՝ հետագայում մորթելու նկատառումներ ունենալով»,-ասաց Լևոն Մնացականյանը:

Աղբյուր` Փաստինֆո