Փաստ ինֆո

Օտարերկրյա դիվանագետների այցն Ադրբեջանի կողմից օկուպացված տարածքներ լեգիտիմացնում է Ադրբեջանի ագրեսիան։ «Փաստինֆո»-ի հետ զրույցում  հայտարարել է Արցախի ԱԳ նախարար Դավիթ Բաբայանը՝ անդրադառնալով օտարերկրյա մի խումբ դիվանագետների այցին՝ Ադրբեջանի կողմից օկուպացված Շուշի և Ֆիզուլի քաղաքներ:

«Մենք շատ վատ ենք ընդունում, երբ տարբեր երկրների դիվանագետներ այցելում են Արցախի օկուպացված տարածքներ, սրանք ինչ-որ տեղ լեգիտիմացնում են Ադրբեջանի ագրեսիան, ինչի մասին բազմիցս խոսել ենք, բայց մենք չպետք է հիստերիկ պահվածք ցուցաբերենք, սա աշխարհաքաղաքականություն է:  Մենք պետք է արձանագրենք, որ դա անթույլատրելի է, չենք ընդունում, բայց որևէ մեկից չնեղանանք, հասկանանք, որ սա նաև ինդիկատոր է՝ով, ինչ շահեր ունի այս տարածաշրջանում»,- նշել է Դավիթ Բաբայանը:

Նրա՝ խոսքով՝ կան երկրներ, որոնք այցելում են ոչ թե որովհետև հակահայկական դրսևորում ունեն, այլ որպեսզի տեղում ծանոթանան իրավիճակին, երկրներ էլ կան, որ Արցախի օկուպացված տարածքներ են այցելում՝ ցույց տալու իրենց ադրբեջանամետ լինելը, ինչպես օրինակ՝ Թուրքիա, Պակիստանը.

«Պետք է վերլուծենք, համապատասխան հետևությունններ անենք և ըստ այդմ քայլեր ձեռնարկենք, պարտադիր չէ, որ այդ քայլերը լինեն էմոցիոնալ և հրապարակային, պարզապես մենք մեզ համար ուղեգիծ պետք է  որոշենք »,-ասաց Բաբայանը:

Նշենք, որ  օկուպացված տարածքներ այցելելու Ադրբեջանի հրավերը չէին ընդունել միայն ԱՄՆ-ի ու Ֆրանսիայի դիվանագետները, ինչը մեծ հիստերիա էր առաջացրել Ադրբեջանում:

Արցախի ԱԳ նախարարը ողջունել է ԱՄՆ-ի և Ֆրանսիայի դեսպանների այս քայլեը, միևնույն ժամանակ ընդգծում՝ Ադրբեջանը որպես պատրվակ օգտագործում է սա, որպեսզի տապալի ԵԱՀԿ ՄԽ  ձևաչափը, իսկ այդ ձևաչափում Արցախը դե յուրե և դե ֆակտո ֆիքսված է որպես հակամարտության  և բանակցային կողմը, հետևաբար, եթե Ադրբեջանը ոչնչացնում է գործընթացը, նա լուրջ հարված է հասցնում Արցախի սուբյեկտայնությանը

Դավիթ Բաբայանի դիտարկմամբ՝ Ադրբեջանը նաև կարող է միջանկյալ քայլեր ձեռնարկի, որպեսզի Թուրքիային մտցնի ԵԱՀԿ ՄԽ համանախագահություն ՝ որպես կոմպենսացիա իր հիստերիկ և ագրեսիվ պահվածքի դիմաց.

«Շատ սառնասրտորեն պետք է այս ամենին վերաբերվենք ու ճիշտ քայլեր ձեռնարկենք»,-ընդգծել է Արցախի ԱԳ նախարարը:

Աղբյուր` Փաստինֆո