Փաստ ինֆո

Տարիներ շարունակ պետություն ու ազգ պահելու ծանր բեռը եկեղեցու ուսերին է եղել, մենք ժողովրդին պահել ենք առանց պետության, էլի կպահենք, բայց ցավալի է այս ամենը, եթե մեր ազգը չի կարողանում իր հավաքական կամքը դրսևորի։ Եթե մենք չենք դառնում ազգ դառնալ, ի՞նչ անի եկեղեցին: «Փաստինֆո»-ի հետ զրույցում ասել է Տավուշի մարզի Մովսես գյուղի հոգևոր սպասավոր Տեր Աբել քահանա Քարտաշյանը:

Նրա փոխանցմամբ՝ Տավուշում հանգիստ իրավիճակ է, հասարակության մոտ էլ անհանգստություն չկա:

Մեր հարցին՝ հաշվի առնելով, որ Սյունիքի և Գեղարքունիքի մի շարք բնակավայրեր անցել են թշնամու վերահսկողության տակ, արդյո՞ք մտավախություն չունի, որ Տավուշի մի քանի գյուղերը հանձնելու խոսակցությունները ավելի առարկայական կդառնան՝ Տեր Աբելն արձագանքեց.

«Ասենք թե ունեցա այդ մտավախությունը, բայց եթե մեր առաջնորդները հանձնման գործը շատ հստակ կազմակերպել են, ի՞նչ պետք է անի հասարակ ժողովուրդը, ով, ինչ կարող է անել, ոչ մեկս էլ ոչինչ չենք կարող, թե զինվորը, որը մեր անվտանգության երաշխավորն է, հրամանի տակ է և իր հրամանն է կատարում, իրեն հրամայված է այս դիրքը թողնել գնալ մյուսը, ի՞նչ կարող ենք անել:Ամբողջ Հայաստանի մասին ունեմ նման մտավախություն, դա արդեն մտավախություն էլ չեմ համարում, այլ՝ կորցնելու վտանգ, ես կորած եմ տեսնում ամեն ինչ»,-ասաց հոգևորականը:

Դիտարկմանը, որ ժողովուրդն այլևս որևէ քաղաքական ուժի չի վստահում և անորոշ վիճակում է, արդյո՞ք այս իրավիճակում հոգևորականությունը չպետք է իր ձեռքը վերցի հասարակության համախմբան գործը և առաջնորդի նրան, Տեր Աբելն ասաց.

«Ճիշտ է, ժողովուրդը ո՛չ ներկա, ո՛չ նախկին քաղաքական ուժերին չի վստահում, բայց հոգևորականների դերը մարդկանց համախմբելն է Քրիստոսի շուրջ՝ հոգեփրկության համար և ոչ մի այլ նպատակով:
Մարդիկ կիրակի օրերին մասնակցում են պատարագի, ցանկացած հայ մարդ, որն ամեն կիրակի սրտի թրթիռով սպասում է՝ երբ պետք է հանդիպի Քրիստոսին և իր խնդիրները տա Աստծուն, թեթևանա, մաքրվի և ավելի մոտենա Աստծուն, այդ բոլոր մարդիկ համախմբված են, իսկ այն մարդիկ ովքեր կարևորություն չեն տալիս, նրանք չեն համախմբվում, ինչ ուզում ես արա: Այն մարդիկ ովքեր համախմբված են Հայ առաքելական եկեղեցու շուրջ, նրանք գիտեն՝ ինչ է ազգային ծրագիր, ազգային գործը, մշակույթը, արվեստը, գիտեն՝ մեր քրիստոնեական ժառանգությունն ինչ ճոխություն ունի, ինչպես պետք է պահենք այն, բայց, ցավոք, այսօր քիչ են նման մարդիկ »,-ասաց Տեր Աբելը:

Աղբյուր` Փաստինֆո