Փաստ ինֆո

Անձը կարող է պետության պաշտպանությանը մասնակցել նաև ոչ ֆիզիկապես զենքը ձեռքին խրամատներում անցկացնելով: Այս մասին ֆեյսբուքյան իր էջում գրում է իրավաբան Կարեն Մելիքսեթյանը։

«Ցանկացած օրենք ընդունելուց պետք է ելնել բանակին օգուտ տալու տրամաբանությունից:

Աներկբա է, որ կամավոր զինվորական ծառայության անցած, օրինակ 26 տարեկան կայացած, որոշակի մասնագիտություն և հմտություններ ունեցող երիտասարդը, մի քանի տասնյակ անգամ ավելի շատ օգուտ կտա բանակին, քան 18 տարին նոր բոլորած անփորձ պատանին:

Բանակ զորակոչելու ամբողջ հոգեբանությունը կառուցվում է միայն «բոլորը պետք է գնան և ծառայեն» արտահայտության տրամաբանության վրա, առանց որևէ վերլուծություն անելու, թե այդքան 18-20 տարեկանում ծառայած անձանց վրա բանակը որքան գումար է ծախսել և նրանցից որքան օգուտ (թեկուզև գումարային արտահայտությամբ) է ստացել բանակը (պետությունը):

Ֆիզիկապես ծառայել և չծառայելը որևէ կապ չունի սոցիալական հավասարության հետ: Պետությանը (բանակին) ծառայել ասելով պետք է հասկանալ բացառապես անձի կողմից բանակին տրված օգուտը:

Անձը կարող է պետության պաշտպանությանը մասնակցել նաև ոչ ֆիզիկապես զենքը ձեռքին խրամատներում անցկացնելով: Օրինակ, կատարի քաղաքացիական աշխատանք և իր վաստակած գումարը փոխանցի պետական բյուջե, որն էլ կարելի է որպես աշխատավարձ վճարել կամավոր զինվորական ծառայության անցնել ցանկացողներին:

Արտագնա աշխատանքի մեկնողների 90 տոկոսից ավելին երիտասարդ տղաներ են, ովքեր ՌԴ-ում առավոտից ուշ երեկո աշխատելով վաստակում են ներկայիս բանակի սպայի աշխատավարձից քիչ եկամուտ:

Անվիճելի է, որ 18 տարեկանում բանակ զորակոչված պատանին բանակին չի տալիս և չի էլ կարող գումարային արտահայտությամբ ամսական տալ սպայի աշխատավարձի չափով օգուտ:

Հետևաբար, անհրաժեշտ է պետության պաշտպանությանը մասնակցելու եղանակի ընտրություն տրվի երիտասարդներին, օրինակ՝ կամ ֆիզիկապես զորակոչվել բանակ կամ ամսական երկու սպայի աշխատավարձի չափով գումար վճարել հատուկ հաշվեհամարին, ապա՝

- բանակում ծառայող սպաների և ենթասպաների աշխատավարձը կկրկնապատվի,

- արտագնա աշխատանքի մեկնող տղամարդկանց մեծ մասն արդեն կգերադասեն ծառայության անցնելով վաստակել ավելի շատ և կայուն գումար (դա հաստատվում է նաև այն փաստով, որ բազմաթիվ անձինք ինչպիսի քայլերի էին դիմում և ներկայումս էլ ցանկանում են ծառայության անցնել ՌԴ զորամասերում),

- գումար աշխատելու ունակ երիտասարդները չեն կտրվի իրենց ուսումից ու մասնագիտությունից:

- բանակ կզորակոչվեն ֆիզիկապես և հոգեպես պետության պաշտպանությամբ զբաղվել ցանկացողներն ու իրական օգուտ տվողները, այլ ոչ թե կմտածեն, թե ինչպես «գլորեն» այդ երկու տարին, ինչը այսօր առկա է յուրաքանչյուր զինվորի հոգեբանությունում,

- անձինք կդադարեն արու զավար ունենալու հաջորդ օրվանից մտածել նրան բանակից ազատելու տարբերակների, շուտափույթ այլ պետության քաղացիություն ձեռք բերելու մասին»,- գրել է նա:

Աղբյուր` Փաստինֆո