Փաստ ինֆո

Եվրոպական խորհրդարանն ընդունել է բանաձևեր, որտեղ անդրադառնալով ադրբեջանաարցախյան հակամարտությանը, մասնավորապես արձանագրել է, ո․ր Ադրբեջանաարցախյան հակամարտությունը չի կարգավորվել։ Այս փաստն արձանագրել է քաղաքագետ Ստեփան Հասան-Ջալալյանը՝ նկատելով, որ օկուպանտ Ադրբեջանին արձագանքելով ՀՀ ԱԳՆ-ն իր պատասխանում վկայակոչեր այս կարևոր փաստաթղթերը, ոչ թե նշեր, թե Մինսկի խմբի մանդատը որևէ մեկը չի չեղարկել։

«Ադրբեջանի ԱԳՆ-ն հայտարարել է. «Մինսկի խմբի վերաբերյալ Ադրբեջանի դիրքորոշումը բազմիցս հստակ արտահայտվել է ամենաբարձր մակարդակով։ Գործնականորեն չգործող Մինսկի խմբի «վերակենդանացման» փորձերը կարող են հանգեցնել նրան, որ ԱՄՆ-ը հեռանա ադրբեջանա-հայկական հարաբերությունների կարգավորման գործընթացից։ Ղարաբաղյան հակամարտությունը կարգավորվել է, և Ղարաբաղը Ադրբեջանի անբաժանելի մասն է»։

17.02.2022թ. և 8.06.2022թ. Եվրոպական խորհրդարանն ընդունել է բանաձևեր, որտեղ անդրադառնալով ադրբեջանաարցախյան հակամարտությանը, մասնավորապես արձանագրել է հետևյալը՝

1. ԵԱՀԿ Մինսկի խումբը մնում է այս հակամարտության կարգավորման միակ միջազգայնորեն ճանաչված ձևաչափը՝ տարածքային ամբողջականության, ուժի չկիրառման, ինքնորոշման և հավասար իրավունքների և հակամարտությունների խաղաղ կարգավորման սկզբունքների հիման վրա. կոչ է անում արագ վերադառնալ իր միջնորդական դերին:

2. 44-օրյա պատերազմը հրահրել է Ադրբեջանը, ինչը հիմնովին փոխել է Հարավային Կովկասում քաղաքական, ռազմավարական և օպերատիվ իրավիճակի ստատուս քվոն՝ հանգեցնելով հազարավոր զոհերի և տասնյակ հազարավոր տեղահանվածների:

3. Ադրբեջանաարցախյան հակամարտությունը չի կարգավորվել:

4. Լեռնային Ղարաբաղը ճանաչվել է վիճելի տարածք:

Հարկ է, որ ՀՀ ԱԳՆ-ի պաշտոնական ներկայացուցիչն օկուպանտ Ադրբեջանին ուղղված իր պատասխանում վկայակոչեր այս կարևոր փաստաթղթերը, ոչ թե նշեր, թե Մինսկի խմբի մանդատը որևէ մեկը չի չեղարկել»,- նշել է քաղաքագետը։

Աղբյուր` Փաստինֆո