Փաստ ինֆո

Հայաստանի պետական տնտեսագիտական համալսարանի ղեկավարությունը որոշել է դասախոս, տնտեսագիտության թեկնածու, դոցենտ, քաղաքական և հասարակական գործիչ Էդգար Ղազարյանին ազատել աշխատանքից: Տեղեկությունը «Փաստինֆո»-ի հետ զրույցում հաստատեց Էդգար Ղազարյանը՝ նշելով, որ ամեն տարի իր հետ աշխատանքային պայմանագիր էր կնքվում, այս տարի պայմանագրի ժամկետը լրացել է և նոր պայմանագիր չի կնքվել։

«2018թ ՀՊՏՀ-ում հայտարարվել է մրցույթ՝ դասախոսների ընտրության համար, ես դիմել եմ, հաղթել մրցույթում և ինձ հետ կնքել են պայմանագիր, բայց հետո, չգիտես ինչու, մրցույթի արդյունքները չեղարկվել է գիտխորհրդի կողմից։ Ինձ հետ կնքվել է մեկ տարվա աշխատանքային պայմանագիր։ 2021թ հայտարարվել է դոցենտի պաշտոնի համար մրցույթ, դիմել էի այդ մրցույթին, Կառավարման ֆակուլտետի խորհրդում դրել են քվեարկության, ԱԺ ընտրության հաջորդ օրն էր, իմ թեկնածության օգտին քվեարկել են՝ 0 կողմ, 15՝ դեմ։ Դրանից հետո իմ աշխատանքային պայմանագիրը մեկ տարվա՝ այս տարի հուլիսին ավարտվեց։ Ամեն տարի ինձ հետ այդ աշխատանքային պայմանագիրը երկարացվել է, նույն ծանրաբեռնվածությամբ ես պայմանագիր էի կնքում, շարունակում իմ աշխատանքը, իսկ այս տարի, երբ դասատախտակները հրապարակեցին, տեսա, որ իմ անունն այնտեղ չկա, ինձ հետ համալսարանը, փաստորեն, խզել է համագործակցությունը»,- նշեց Ղազարյանը՝ հավելելով, որ չեն ցանկանում համագործակցել և դա այն դեպքում, երբ ինքը 20 տարի անընդմեջ, բացառությամբ, Լեհաստանում ՀՀ դեսպան եղած ժամանակ, դասավանդել է Տնտեսագիտական համալսարանում, վեց տարի եղել է Համալսարանի գիտխորհրդի և ռեկտորատի անդամ, մասնաճյուղի տնօրեն, ֆակուլտետի դեկան և հիմա ակնհայտ քաղաքական պատճառներով նման պրիմիտիվ բան են իրականացրել։

Ղազարյանի խոսքով՝ Համալսարանում այնպիսի դասընթացներ կան, օրինակ, մագիստրատուրայում, որոնք ինքն է հեղինակել, իրենից առաջ ոչ ոք չի դասավանդել, հիմա այդ դասընթացները՝ իր հեղինակած՝ իրենից վերցրել են և տվել ուրիշին, միայն թե իրեն չտան։
«Դիտավորությամբ արված պրիմիտիվ քայլ է։ Ես 1998թ համալսարանն ավարտել եմ, ընդունվել՝ ասպիրանտուրա, 1999թվականից դասավանդում եմ՝ ասպիրանտուրայի երկրորդ կուրսից»,- նշեց Ղազարյանը։

Ինչ վերաբերում է իր նկատմամբ հետապնդումներին, Ղազարյանը նշեց, որ ոչինչ այս պահի դրությամբ իրեն հայտնի չէ, թե ինչ են նախապատրաստում, ինչ ապօրինություն են նախապատրաստում։

«Գիտեմ, որ ժամանակին գնացել են Եղեգնաձորում իմ պաշտոնավարման շրջանի թղթեր ուսումնասիրել, ոչինչ չեն հայտնաբերել բնականաբար։ Դե որտեղից պետք է հայտնաբերեն, պետք է լինի, որ հայտնաբերեն, էդպես քոռ ու փոշման հետ են եկել։ Իմ՝ մարզպետի պաշտոնում պաշտոնավարման՝ մի արդյունք գոյություն ունի, որը հայտնաբերել պետք չէ, նախագահականում կա այդ տեղեկությունը՝ պարգևատրել Էդգար Ղազարյանին «Հայրենիքին մատուցած ծառայությունների համար» երկրորդ աստիճանի մեդալով ,- եզրափակեց Ղազարյանը։

Աղբյուր` Փաստինֆո