Փաստ ինֆո

Երևանի ավագանու 2018 թվականի ընտրություններին ընդառաջ դոմինանտ էր «ցախավելով» քաղաքապետը, քանի որ թավշյա հեղափոխության աղբի մեջ կորած և փողոցային առևտրի մեջ թաթախված Երևան ունեինք։

Ու թեպետ դեռ մայրաքաղաքային ավագանու ընտրությանը մեկ տարի կա, այնուհանդերձ, կասկած էլ կա, որ իշխանությունը կարող է ժամանակից առաջ ընկնել։ Մանավանդ, մարդիկ կան, որ ժամանակ առ ժամանակ հիշեցնում են, թե իրենք այսինչ կամ այնինչ ուժի կողմից առաջադրված քաղաքապետի թեկնածու են։

Ի դեպ, ինչպես 4 տարի առաջ, այսօր էլ աղբի մեջ կորած և փողոցային առևտրի մեջ թաթախված Երևան ունեինք։ Բայց արդեն կարծես հրահանգը տրված է՝ այս ընտրություններում դոմինանտ է լինելու փողոցային առևտրի դեմ պայքար մղող քաղաքապետը։ Ընդհուպ՝ առևտրականների՝ միրգ, բանջարեղեն ու կանաչի վաճառող ու վերավաճառողների հանդեպ բռնի ուժ կիրառելու, ապրանքը բռնագրավելու պատրաստ ոստիկանական ուժերով․․․

Եկեք վերհիշենք՝ Երևանն արևելյան բազարի վերածած փողոցային առևտուրը 2018-ի «սիրո և հանդուրժողականության» փնթի վիճակներից առաջ երկարատև և համառ պայքարի /բայց ոչ՝ բռնի ուժի / արդյունքում մեծ հաշվով վերացել էր, իսկ աղբահանության խնդիրն առավելաբար Երևանում աղբավերամշակման ծրագրի համատեքստում էր արդեն կարևորվում: Այդ ամենը չէր խանգարում, որ ԱԺ մշտական ընդդիմադիր՝ ներկա իշխանության ղեկավարը 2018-ից առաջվա իշխանություններին շարունակ մեղադրեր փողոցից առևտրականներին ծածկի տակ, քաղաքակիրթ առևտրի ճանապարհը ցույց տալու համար՝ խեղճուկրակ ժողովրդին մի կտոր հացից զրկելու պոպուլիստական մոտիվներով․․․

Փաստն այն է, որ աշխատանքային կարգի այս երկու՝ բարեխիղճ աղբահանության և բացօթյա առևտրի բացառման գործողությունները ո՛չ այս, ոչ էլ նախորդ քաղաքապետի օրոք հնարավոր չեղավ կարգավորել։ ՈՒնենք փնթի ու կեղտոտ, օրերով չմաքրվող փողոցներ, քաղաքի կենտրոնում, հակահիգիենիկ պայմաններում գետնատարած միրգ ու բանջարեղեն վաճառողներ։

Իսկ միգուցե ուղղակի չցանկացա՞ն բացօթյա առևտրականներին ծածկի տակ մտցնել։ Քանզի ակնհայտ էր՝ վերջիններս հատկապես քաղաքի կենտրոնական փողոցներում այս իշխանությունների կամոք սկսեցին գործունեություն ծավալել։ Ավելին, նրանց վաճառած ապրանքը հաճախ ավելի թանկ է լինում, քան սուպերմարկետներում է։ Չի բացառվում, որ ներքին պայմանավորվածություն է գործում, և հիմիկվանից փողոցի առևտրականների դեմ դեմոնստրատիվ, ուժային մեթոդներով, ոստիկանների միջոցով նրանց ապրանքը բռնագրավելու պատրաստակամությամբ կամ նման տեսարաններ սարքելով՝ «հաղթեն» և մի մասին առնվազն զրկեն կենտրոնում «գործ ունենալուց»։

Ինչ, ինչ, բայց տեսարանների համար խելքներն իրենցը չէ։

Կարող է նաև այլ տեսարան լինել․ այս քաղաքապետը չկարողանա վերացնել փողոցային առևտուրը, իսկ հաջորդը գա և հենց այդ դարձնի իր «ֆիշկան»։

Աղբյուր` Փաստինֆո