Փաստ ինֆո

Ադրբեջանը 110 հետակետ է տեղադրել ՀՀ սահմանին, 5 խոշոր ռազմական կայան է կառուցել, ավելացրել է ռազմական բյուջեն։  Պետական մակարդակով ռազմական հանցագործ Ալիևը ակնհայտ հավակնություններ է ներկայացնում ՀՀ ողջ տարածքների նկատմամբ, ներառյալ Երևանը, այսինքն՝ քոչվոր, վայրենի ցեղերը, որոնք 200 տարի առաջ են հայտնվել այս տարածաշրջանում, այսօր հավակնում են մեր տանը: Այս մասին լրագրողների հետ զրույցում ասել է ԱԺ նախկին պատգամավոր Արման Աբովյանը:

Ըստ Արման Աբովյանի՝ անխուսափելի է, որ Արցախյան հիմնախնդիրը պետք է լուծվի միջազգային որևէ հեղինակավոր կառույցի հովանավորությամբ, սակայն խնդիրն այն է՝ թե այս գործընթացում ո՞րն է Հայաստանի դերը.

«Տպավորություն է, որ «երկրագնդի մեծերը» հավաքվում, ինչ-որ բան են քննարկում, բա Հայաստանը որտեղ է, պետք է այս փաստի վրա սևեռվել: Այսպես կոչված «խաղաղության դարաշրջանը» ցույց է տալիս, որ Հայաստանն իր անվտանգության բանալիները կամովին հանձնում է սրան-նրան ու ասում է՝ ես թույլ եմ, դուք որոշեք՝ ինչ է կատարվում, հետո ինձ տեղյակ կպահեք, այս տարածաշրջանում դա չափազանց վտանգավոր մտածելակերպ է»,-ասաց Աբովյանը:

Ինչ վերաբերվում է օգոստոսի 31-ին Բրյուսելում կայանալիք Նիկոլ Փաշինյան- Ալիև- Շառլ Միշել հանդիպմանը, Աբովյանը նշեց՝թե՛ Եվրոպան, թե ԱՄՆ-ն ջանք չեն խնայում, որպեսզի որևէ ձևով ներկայացված լինեն մեր տարածաշրջանում և մասնակցություն ունենան այստեղ տեղի ունեցող գործընթացներում:

Նրա կարծիքով՝ Եվրոպան անում է ամեն ինչ, որպեսզի Արցախի հարցի կարգավորման գործընթացի մոդերատորությունն իր ձեռքը վերցնի, այդ պատճառով էլ հանդիպման վայր ընտրել է Բրյուսելը:

Աղբյուր` Փաստինֆո