Փաստ ինֆո

Եթե 60 հազար դոլարով զինծառայությունից ազատվելու մասին տխրահռչակ օրինագիծը հանկարծ անցնի, ապա մարդիկ սկսելու են միմյանց ավելի շատ ատել, թշնամանքով են լցվելու իրար նկատմամբ, դիմելու են ամեն միջոցի, անգամ տունն են վաճառելու, որ փող ստեղծեն ու իրենց զավակներին բանակից ազատեն։ Եվ դա վերջնականապես ջարդելու է բանակի ողնաշարը։ «Փաստինֆո»-ի հետ զրույցում նման տեսակետ հայտնեց «Արաբո» ջոկատի հրամանատար Մանվել Եղիազարյանին։

«Փաստորեն ասում են, եթե ունես փող, կարող ես քո որդուն ազատել, իսկ եթե չունես փող, թող գնա երկու տարի սահման պահի։ Դա առանց այն էլ պառակտված հասարակությանը լրիվ է պառակտելու, մարդկանց թշնամացնելու։ Ստացվում է՝ հայրենիքի պաշտպանությունը թողնվում է միայն աղքատների վրա։ Մի կերպ պահած, մեծացրած երեխաները, եթե զգան, որ մենակ են մնացել հայրենիքը պաշտպանելու գործում, ի՞նչ ոգով պիտի կանգնեն սահմանին ու պաշտպանեն երկիրը»,-ասում է ազատամարտիկը։

Որ պատերազմ լինելու դեպքում փողով ծառայությունից ազատված հարուստները չեն կանգնելու սահմանին կանգնած աղքատի կողքին, ազատամարտիկը վստահ է և այդ հարցում գերմանացիների հետ համեմատվելու եզրեր անգամ չի տեսնում։ Ասում է՝ ունեւոր հայը չի կանգնելու աղքատ հայի կողքին, ինչպես գերմանացի կալվածատերն էր պատերազմի դաշտ մեկնում գյուղացու հետ միասին ու հավասարը հավասարի պես՝ կռվում հանուն իր երկրի պաշտպանության։

«Պետությունը պահողը՝ այդ թվում երկրի պաշտպանությունն ապահովողը, միջին խավն է։ Հարուստների համար, սովորաբար, հայրենիքը որևէ արժեք չունի, աղքատներն էլ միայնակ չեն կարող պաշտպանել երկիրը՝ առավել ևս, եթե զգան, որ միայնակ են այդ գործում, անտեսված ու ստորացված։ Միջին խավն էլ ուժեղ է, եթե հասարակական-քաղաքական ղեկավարումը նրա ձեռքում է և ոչ թե մի խումբ իշխանավորների, որոնք ասում են՝ եթե ուզում ես, կարող ես փողով ազատվել ծառայությունից։ Ես ամենևին չեմ թերագնահատում աղքատների հայրենասիրությունը, ուղղակի որքա՞ն պետք է ամուր լինի նրանց ոգին, եթե միանյակ լինեն սահմանին կանգնած»,-ասում է Եղիազարյանը։

Ազատամարտիկը վստահ է՝ այս ամենը միտումնավոր է արվում, որպեսզի հասարակությունն է՛լ ավելի պառակտվի, բանակի ողնաշարն էլ լրիվությամբ ջարդվի։

Աղբյուր` Փաստինֆո