Փաստ ինֆո

Երկիրն ուժեղացման տանելու փոխարեն՝ ամեն ինչ արվում է հասարակության պառակտումն ու բևեռացումն ավելի խորացնելու համար։ Իշխանությունները «բաժանիր, որ տիրես» սկզբունքով իրար հաջորդող խիստ վտանգավոր քայլեր են անում՝ հետևողականորեն ոչնչացնելով երկրի պաշտպանական, անվտանգային ռեսուրսները։ «Փաստինֆո»-ի հետ զրույցում նման տեսակետ հայտնեց հոգեբան Կարինե Նալչաջյանը՝ անդրադառնալով երեկվանից շրջանառության մեջ դրված օրինագծին, ըստ որի 60 000 դոլարի դիմաց հնարավորություն կտրվի պարտադիր ժամկետային զինծառայողին ժամանակից շուտ ազատել ծառայությունից։

«Մի կրակոցով երկու նապաստակ են որսում․ խորացնում են հասարակության՝ առանց այդ էլ զգալի բևեռացումը՝ բանակը դարձնելով աղքատների բանակ, և երկրորդ՝ բյուջե են լցնում։ Սրերն ուղղվում են նաև մտավորականության դեմ։ Ազնիվ մարդիկ դեմ չեն եղել երբևէ, որ իրենց երեխաները ծառայեն, ավելին՝ ուրախությամբ ու հպարտությամբ են ճանապարհում բանակ իրենց զավակներին, ուղղակի այդ դեպքում բևեռացումը խորանալու է։ Բացի այդ, ընտանիքներում ևս խնդիրներ են լինելու։ Դիցուք՝ մեկի ծնողը կարողանում է ազատել իր որդուն, մյուսինը՝ ոչ ու առաջին դեպքում զավակը, եթե դեռևս ձևավորված ազգային արժեհամակարգ չունի, մեղադրելու է ծնողին՝ իրեն բանակից չազատելու համար։ Ի վերջո, բարդ տարիքի հետ ենք գործ ունենում, ինքնահաստատման խնդիր են ունենում շատերը հենց այդ տարիքում»,-ասում է հոգեբանը։

Կարինե Նալչաջյանի խոսքով՝ շրջանառության մեջ դրված օրինագիծը հասարակությանը ոչ միայն հոգեբանորեն ջլատելու է ու խորացնի բևեռացումը, այլև անվտանգային նոր սպառնալիքներ է ստեղծելու․

«Այս իշխանությունների գլխում բացի փողից, առուծախից ու քանդելուց, ոչինչ չկա։ Ուզում են բյուջեն լցնել, իսկ թե ինչ են անում բյուջեի հետ, տեսանելի է բոլորիս։ Մյուս կողմից՝ նախ և առաջ թուլացնում են բանակը։ Ամեն ինչ արվում է ուժային կառույցները, պաշտպանական ռեսուրսները ոչնչացնելու համար»։
Հոգեբանի արձանագրմամբ՝ մարդիկ, ովքեր առանց իրենց հաշիվ տալու 2018 թվականին իշխանության են բերել Նիկոլ Փաշինյանին՝ չհասկանալով , որ փոս են փորում իրենց համար, այսօր իրենց իսկ փորած փոսի մեջ են հայտնվել։

Աղբյուր` Փաստինֆո