Փաստ ինֆո

ՀՅԴ ԳՄ անդամ, ԱԺ նախկին պատգամավոր Սուրեն Մանուկյանին կալանավորելու մասին որոշման դեմ վերաքննիչ բողոք կներկայացվի։ Այս մասին «Փաստինֆո»-ի հետ զրույցում ասաց պաշտպան Սերգեյ Ոսկանյանը։

Ինչպես արդեն տեղեկացրել ենք՝ Սուրեն Մանուկյանը ձերբակալվել, ապա կալանավորվել է «Ազատ դեմոկրատներ» կուսակցության նախագահ Խաչատուր Քոքոբելյանի հոր առևանգման գործով։ Ընդ որում, ինչպես հետագայում պարզվել է, ՝ Սուրեն Մանուկյանը ձերբակալման օրը հրավիրվել էր ՀՀ քննչական կոմիտե, որպես տուժող քննչական գործողության մասնակցելու համար, սակայն ճանապարհին, այսօրվա իրավապահ մարմիններին բնորոշ բեմականացմամբ, բռնության գործադրմամբ ձերբակալվել էր՝ անձի առևանգման կասկածանքով։

Սուրեն Մանուկյանին մեղադրանք է առաջադրվել՝ ՀՀ քրեական օրենսգրքի 191 հոդվածի 2-րդ մասի 5-րդ կետով՝ խմբի կազմում անձի առևանգման հատկանիշներով։

Երևանի ընդհանուր իրավասության դատարանը՝ դատավոր Տաթևիկ Մուրադյանի նախագահությամբ, բավարարել էր Սուրեն Մանուկյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։

Պաշտպան Սերգեյ Ոսկանյանը «Փաստինֆո»-ի հետ զրույցում նշեց, որ դատարանը կալանքի հիմքում դրել է հիմնականում ազատության մեջ մնալու պարագայում ապացուցման գործընթացին խոչընդոտելու վտանգը, մասնավորապես, քանի որ գործով դեռևս իբրև չպարզված անձինք կան, Մանուկյանը, մնալով ազատության մեջ, իբրև կարող է խոչընդոտել։ Մյուս հիմքերը՝ թաքնվելու, փախուստի դիմելու վտանգը՝ դատարանը չի արձանագրել։ Պաշտպանը կալանավորման որոշման դեմ բողոք կներկայացնի՝ վիճարկելով ինչպես հիմնավոր կասկածի, այնպես էլ՝ կալանավորման հիմքի մասով։

Ինչ վերաբերում է Մանուկյանի մասնակցությամբ քննչական գործողություններին, փաստաբանը տեղեկացրեց, որ կալանավորվելուց հետո Մանուկյանի մասնակցությամբ որևէ գործողություն չի իրականացվել՝ ոչ ճանաչման ներկայացնել, ոչ ցուցմունք, ոչ առերեսում։ Մինչև կալանավորումը կասկածանքի շուրջ Մանուկյանը դիրքորոշում է հայտնել ՝ նշելով, որ կասկածանքն իր հետ կապ չունի, դեպքի հետ առնչություն չունի, իսկ մեղադրյալի կարգավիճակով ցուցմունք տալուց հրաժարվել է, նշել՝ մեղքը չի ընդունում։

Անդրադառնալով ՔԿ տարածած հաղորդագրությանը, տեսանյութին՝ փաստաբանը նշեց, որ այն պարունակում է անմեղության կանխավարկածը խախտելու և այլ ուղղությամբ տանելու տարրեր, իբրև տուժող Քոքոբելյանը ճանաչել է Սուրեն Մանուկյանին, մինչդեռ, նման գործողություն չի կատարվել։
«Եթե այդ մարդը հարցաքննության ընթացքում որպես հանցանք կատարողի մատնանշեր Սուրեն Մանուկյանին, մենք պետք է համարվենք իր ցուցմունքին հակասող ցուցմունք տված անձ, այսինքն՝ մոտ ապագայում պետք է առերեսվենք կամ պետք է առերեսված լինեինք, բայց ոչ առերեսվել ենք, ոչ էլ՝ ծանուցագիր, հրավեր ենք ստացել առերեսվելու համար։ Որպես տուժող, բնականաբար, պետք է ցուցմունք տա։ Ենթադրում եմ՝ կամ ցուցմունք չի տվել, կամ էլ ցուցմունք է տվել, բայց իր ներկայացրած հանգամանքները չեն հակասում մեր հայտնած հանգամանքների հետ»,- նշեց փաստաբանը՝ հավելելով, որ առաջիկայում պատրաստվում է միջնորդություններ ներկայացնել՝ իրենց դեմ ցուցմունք տված անձանց հետ առերեսվելու, դեպքի վայրի զննություններին մասնակից լինելու վերաբերյալ. «Տեսնենք՝ այդ վերացական ապացույցներն ինչով է պայմանավորված, ինչպես է հավաքվել»։

Ոսկանյանի համզոմամբ՝ դեպքն իսկապես դեռևս բացահայտված չէ, պարզ չէ, թե ենթադրյալ արարքն ով է կատարել, բայց քանի որ ՔԿ-ն ունի որոշակի տվյալներ, արձանագրված շարժ, տեղորոշած վայրեր, ինչը ներկայացվում է որպես բացարձակ ճշմարտություն, այդպես մատուցվում է հանրությունը, և, միգուցե ՔԿ-ին ձեռտու է այդ գործելաոճը, սակայն պետք չէ մոռանալ, որ անմեղության կանմխավարկածի ուժով Սուրեն Մանուկյանը պարտավոր չէ ապացուցել իր անմեղությունը, պետությունը՝ ի դեմս ՔԿ-ի՝ պետք է ապացուցի մեղավորությունը։

«Հիմա կիսատ-պռատ, ճշտված-չճշտված հանգամանքներ են ներկայացվում, դա մատուցվում այնպիսի երանգներով, որ դա ընդունվում է որպես բացարձակ ճշմարտություն։ Ամեն դեպքում, անկախ գործի ելքից, յուրաքանչյուրն իր հասանելիք մասով՝ իր կողմից հնչեցված արտահայտությունների և կատարված որակումների համար պետք է պատասխանատու լինել»,- նշեց փաստաբանը՝ հավելելով, որ ստեղծվել է իրավիճակ, որ պաշտպանության կողմը պահում է իր պարտականությունները՝ չհրապարակելով նախաքննության գաղտնիք պարունակող տեղեկություններ, իսկ մյուս կողմից՝ հրապարակվում է չճշտված տվյալներ, ներկայացվում որպես բացարձակ ճշմարտություն, ինչն անընդունելի է։

Հեղինակ՝ Իզաբել Սահակյան

Աղբյուր` Փաստինֆո