Փաստ ինֆո

Օգոստոսի 20-ի դրությամբ Աղավնոյում մնացել էին 5 կամ 6 բնակիչ։ Մենք գյուղից դուրս ենք եկել երեկ՝ ամսի 21-ին ու, հաշվի առնելով անվտանգության հետ կապված սպառնալիքները, որոնք առկա էին, ըստ ամենայնի՝ երեկ մինչև ժամը 13։00-ն մյուսները ևս դուրս են եկել։ Այդ մասին «Փաստինֆո»-ի հետ զրույցում ասաց «Ժողովրդական համախմբում» կուսակցության նախագահ Սուրեն Պետրոսյանը, ով ընտանիքի հետ Աղավնոյում էր օգոստոսի 6-ից։

«Եթե թեկուզ մենք մնայինք ևս մեկ-երկու օր, որևէ բան չէր փոխվի։ Հայկական կողմից՝ թե՛ իշխանության, թե՛ ընդդիմության մակարդակով որևէ աջակցություն չկար Աղավնոյի բնակիչներին, որոնք պատրաստ էին պայքարի։ Նույնիսկ ձևական առարկություն կամ դիմադրություն չի եղել։ Նրանցից ոչ մեկը բնակիչների կողքին չի եղել, չի աջակցել այդ հարցում»,-ասում է Պետրոսյանը։

Աղավնոյում գտնվելու երկու շաբաթվա ընթացքում Սուրեն Պետրոսյանը Հայաստանի ու Արցախի քաղաքական տարբեր շրջանակներից գյուղ ժամանած շատ մարդկանց է հանդիպել, ու ստացած տպավորությունը, մեղծ ասած, շատ տխուր է։

«Հայաստանի և Արցախի իշխանավորներից էլ, պառլամենտական ու ոչ պառլամենտական ընդդիմությունից էլ շատերն են եկել գյուղ, բայց ամենացավալին այն է, որ բոլորն էլ փորձում էին համոզել, թե մենք այլընտրանք չունենք։ Ադրբեջանից ավելի լավ «հիմնավորում էին», թե ինչու պետք է հեռանանք, ինչու հաջողելու հնարավորություն չունենք։ Որևէ մեկը չէր դիտարկում Աղավնոն պահելու տարբերակը, անգամ չէին ասում՝ քննարկենք, վերլուծենք, տեսնենք՝ ինչ կարող է լինել, նոր եզրահանգումներ անենք։ Դա էլ չէին անում։ Բայց երբ ներկայացնում էի իմ պատկերացումները, հակափաստարկներ էի բերում, որևէ մեկը դրանից հետո չէր ասում, թե իմ ասածն անհնար է կամ արկածախնդրություն է։ Ընդամենն ասում էին՝ ինչով կարող ենք օգնել ու գնում»,-նշում է Պետրոսյանը։

Աղավնո այցելող ներկա ու նախկին քաղաքական գործիչների պնդումներին, որ խնդիրը կարող է լուծվել Երևանում կամ գոնե Ստեփանակերտում, Պետրոսյանը պատասխանում էր՝ այս պահին այստեղ է լուծվում խնդիրը և եթե Արցախն իրոք կարևոր է ձեզ համար, ուրմեն հենց այստեղ պետք է փորձենք լուծել խնդիրը։
Սուրեն Պետրոսյանի արձանագրմամբ՝ Աղավնոն չպետք է ծառայի կամ ընկալվի որևէ մեկի կողմից որպես քաղաքական դիվիդենտներ շահելու տեղ։

«Անդրանիկ Չավուշյանը մի քանի անգամ ասել է՝ ինչով կարող եմ՝ կօգնեմ, բայց մեզ մենակ են թողել։ Ինքը երբեք չի ասել, թե Աղավնոն անհնար է պահել։ Աղավնոյի բանկիչներն արել են, ինչ հնարավոր էր, ուղղակի այդ մարդկանց մենակ էին թողել։ Ու խոսքը միայն իշխանության մասին չէ, այլև քաղաքական, հասարակական այլ միավորների։ Եվ քանի որ համակարգված բնույթ չկրեց դիմադրությունը և աջակցություն չկար, չհաջոցվեց պահել»,-նշում է Պետրոսյանը։

Հիշեցնենք, որ Սուրեն Պետրոսյանը, ով մի խումբ քաղաքացիների հետ, ընտանիքով մեկնել էր Աղավնո և այնտեղից տեսաուղերձով կոչ էր անում միանալ Աղավնոյի ինքնապաշտպանությանը, գյուղից դուրս է եկել օգոստոսի 21-ին։ Աղավնոյից բռնի տեղահանված մեր հայրենակիցները, ինչպես նշում է Պետրոսյանը, հաստատվել են ՀՀ և Արցախի տարբեր բնակավայրերում՝ Տեղում, Գորիսում, Սիսիանում, Էջմիածնում, Երևանում, Ստեփանակերտում․․․

Աղբյուր` Փաստինֆո