Փաստ ինֆո

Սյունիքի մարզի ընդհանուր իրավասության դատարանի դատավոր Անահիտ Թումանյանը հայցադիմում է ներկայացրել Վարչական դատարան՝ ընդդեմ Կոռուպցիայի կանխարգելման հանձնաժողովի՝ պահանջելով, որ իր ամուսնու՝ Գարիկ Յավրումյանի վերաբերյալ քննված քրեական գործից բխող, Հանձնաժողովի հաստատած փաստերի փոխարեն վերջինիս կողմից քրեորեն պատժելի արարքներ՝ այդ թվում կոռուպցիոն բնույթի կատարված չլինելը հաստատեն:

Վարչական դատարանը՝ դատավոր Գևորգ Սոսյանի նախագահությամբ, կազմով դատավորներ՝ Կարեն Զարիկյանի, Սամվել Հովակիմյանի, վարույթ է ընդունել գործը, որը կքննվի գրավոր ընթացակարգով։

Դատարանը պատասխանողից՝ Կոռուպցիայի կանխարգելման հանձնաժողովից կպահանջի հայցի առարկային վերաբերող վարչական վարույթի բոլոր նյութերը։

Դատարանը գործի վերաբերյալ որոշումը կհրապարակի սեպտեմբերի 2-ին, ժամը՝ 11:00-ին։

Նշենք, որ դատավոր Անահիտ Թումանյանի վարույթում է գտնվել «Զանգեզուր Մայնինգ»-ն ընդդեմ Զանգեզուրի պղնձամոլիբդենային կոմբինատ»-ի գործը, որով դատավորի նկատմամբ ճնշումներ են իրականացվել։

Մասնավորապես, նրան ոչ միայն սպառնում էին պատժիչ գործողություններով, այլև՝ անձնական բնույթի տեսագրության հանրայնացմամբ։ Թեև կոռուպցիոն գործարքի և ԶՄՊԿ-ի փոքր բաժնետերի ձեռքից բիզնեսը խլելու մասին տվյալները ցցուն են, այդուհանդերձ, դատարանը հուլիսի 26-ին հրապարակել է որոշումը՝ մերժելով «Զանգեզուր Մայնինգ»-ի հայցը՝ գործարքներն անվավեր ճանաչելու և անվավերության հետևանքներ կիրառելու պահանջի մասին։ Ընդ որում, պարզվում է, որ Թումանյանը վճիռը հրապարակելիս այնքան լարված է եղել, որ վրիպակներ է թույլ տվել, ինչն ուղղել է վճռի հրապարակումից օրեր անց՝ օգոստոսի 18-ին՝ մեկ այլ որոշմամբ։

Ենթադրվում է, որ ոչ միայն նրա նկատմամբ են անմիջական ճնշումներ կիրառվել ու կիրառվում, այլ նաեւ ընտանիքի անդամների միջոցով։

Աղբյուր` Փաստինֆո