Փաստ ինֆո

«Փեթակ» առևտրի կենտրոնը թույլ չեն տալիս բացել։ Այս պահին տնտեսվարողները, աշխատակիցները հավաքվել են՝ պահանջելով պարզաբանումներ ներկայացնել, թե ինչու թույլ չեն տալիս բացել կենտրոնը կամ հստակ օր նշել, թե երբ կարող են վերադառնալ։

Տնտեսվարողները նշում են, որ այս պայմաններում կարող են շարունակել աշխատանքները, ցանկության դեպքում կարող են ժապավենով սահմանը նշել, իրենք՝ մի փոքր հեռու շարունակեն աշխատանքները։ Նրանք պատմում են, որ իրենց տեղեկություններ են հայտնել, որ ԱԻՆ-ն արդեն համաձայնություն է տվել, սակայն հետաքննիչները թույլ չեն տալիս։

Աշխատակիցներից մեկը նշեց՝ ցավակցում են «Սուրմալու»-ի պայթյունի զոհերին, սգացել են իրենց մահը, մինչև ԱԻՆ-ի հասնելը՝ «Փեթակի» աշխատակիցներն են մոտեցել՝ մարդկանց օգնելու։

«Խոսել ենք ԱԻՆ փոխնախարարի հետ։ Ճանապարհը կարող ենք կիսել, թող իրենց տեխնիկան աշխատի, այս կեսը՝ միակողմանի ճանապարհ լինի, մտնեն «Փեթակ» տոնավաճառի մեջ։ Համաձայնությունը տվել է, հիմա ասում են՝ պետք է քննիչներն ասեն, ոստիկանությունը բարձրանա 10 մ այն կողմ, իրենք աշխատեն»,- նշեց նա՝ հավելելով, որ պտտվելու դեպքում կտեսնեն, որ քանդված շենքի ետևում բոլորն առևտուր են անում. միայն «Փեթակ» տոնավաճառը չի աշխատում։

Նա հայտնեց, որ «Փեթակ»-ում անվտանգության կանոնները պահպանվում են, իրենք նաև ստուգել են, նյութեր հեռացրել, պնդում է՝ եթե անվտանգ չլիներ, չէին ասի՝ բացեն տոնավաճառը, որ ժողովուրդն աշխատի՝ մարդկանց վտանգելով։

«Այստեղ արդեն ուրիշ բան է, ուղղակի չենք պատկերացնում՝ ինչ։ Կարող է նաև միտումնավոր լինել»,-նշեց նա՝ զերծ մնալով անուններ հայտնելուց, միայն ասաց. «Բիզնեսմեննրը պետք է աշխատեն։ Այս երկրի տերն ու տիրականն այս ժողովուրդն է։ Ֆինանսական, տնտեսական վնաս ենք կրում, այսքան բանվոր ունենք՝ օրական 5000 դրամով աշխատում են, այդ 5000 դրամը տանում էր տուն, իր երկու երեխան ուտում էր»։

Նշենք, որ «Սուրմալու» առևտրի կենտրոնում օգոստոսի 14-ին տեղի ունեցած պայթյունից հետո ԱԻՆ ծառայողները ավելի քան 1 շաբաթ է իրականացնում են որոնողափրկարարական, մաքրման և ինժեներական աշխատանքներ և հարակից փողոցը ներկա պահին փակ է անցուդարձի համար։

Աղբյուր` Փաստինֆո