Փաստ ինֆո

Տնտեսվարողները ծանուցվում են հարակից տարածքների պարտադիր բարեկարգման մասին։ Այս մասին հայտնում է Երևանի քաղաքապետարանի լրատվության վարչությունը։

Երևանի ավագանու որոշմամբ տնտեսվարողներն իրենց հարակից ընդհանուր օգտագործման տարածքները պարտադիր կերպով պետք է մաքուր և բարեկարգ պահեն, ապահովեն սահմանված նորմերը: Քաղաքում գործող տնտեսվարողներից 4403-ը արդեն ծանուցվել ու ստացել է զգուշացման թերթիկ: Կծանուցվեն նաև համայնքային ենթակայության հիմնարկները:

Աշխատանքային հերթական խորհրդակցության ժամանակ քաղաքապետ Հրաչյա Սարգսյանը հանձնարարել է հնարավորին կարճ ժամկետում ավարտել գործընթացն ու քայլեր ձեռնարկել՝ տարածքները պատշաճ տեսքի բերելու համար:

Բացօթյա ապօրինի առևտուրը կանխարգելելու նպատակով քաղաքապետարանը շարունակում է ուժեցացված ստուգայցերը: Նախորդ երկու շաբաթում կազմվել է 57 արձանագրություն, ընթացքում է 80 վարչական վարույթ:

Երևանյան լիճ թափվող կոյուղաջրերի խնդիրը լուծելու նպատակով համայնքը մտադիր է Հրազդան գետի երկայնքով նոր կոյուղագիծ կառուցել: Հայտարարվել է նախագծի ճշգրտման մրցույթ: Միաժամանակ հանձնարարվել է Ջրային կոմիտեի հետ քննարկել Աերացիայի կեղտաջրերի մաքրման կայանի գործարկման հնարավորությունը:

Վերակառուցվում և արդիականացվում է Աշտարակի խճուղու արտաքին լուսավորության ցանցը: Բոլոր մալուխները կտեղափոխվեն դիտահորեր: Սկսվել է հողանցման նախապատաստումը, որից հետո կտեղադրվի 125 նոր հենասյուն:

Ազատության հրապարակի լուսավորության ցանցը ևս կարդիականացվի: Առաջիկայում կհայտարարվի նախագծային մրցույթ:

«Կասկադ» համալիրի վերին հատվածում՝ անավարտ շինարարության տեղում, ճարտարապետական աշխատանքներ իրականացնելու համար համայնքը տևական ժամանակ բանակցություններ է վարում: Այժմ ձեռք են բերվել որոշակի պայմանավորվածություններ: Առաջիկայում ծրագրի իրականացման առնությամբ կլինեն առավել մանրամասն քննարկումներ:

Համայնքային և դպրոցական գրադարաններն ամեն տարի իրենց ծախսերում պետք է առանձին տողով միջոցներ նախատեսեն գրքերի ձեռքբերման համար: Մանկապարտեզները նույնպես կհամալրվեն ուսուցողական և զարգացնող գրքերով: Ստեփանակերտում գործող Շուշիի գրադարանը համալրելու նպատակով ևս համատեղ աշխատանքներ կտարվեն:

Զուգահեռաբար, գրադարաններից պետք է դուրս գրվի հնամաշ, արդիականությունը կորցրած գրականությունը:

Գրադարանների աշխատանքն առավել արդյունավետ դարձնելու համար ընթերցողների և հրատարակիչներ մասնակցությամբ հանդիպումներ կկազմակերպվեն:

Աղբյուր` Փաստինֆո