Փաստ ինֆո

Ոստիկանության ծառայողների կողմից ծեծի ենթարկված պահեստազորի գնդապետը քրեական վարույթի շրջանակներում տուժող է ճանաչվել։ Այս մասին «Փաստինֆո»-ն տեղեկացավ գնդապետ Արայիկ Մուրադյանից։

Հիշեցնենք, որ դեպքը տեղի է ունեցել մայիսի 18-ին առավոտյան, երբ գնդապետը փորձել էր պաշտպանել զոհված զինծառայողի հորը, որին ոստիկանները ցանկանում էին բերման ենթարկել։

Ոստիկանները գնդապետին նախ «արա»-ով դիմել՝ պահանջելով, որ հեռանա, ապա՝ ծեծել։

«Ասացի՝ արա չի, դիմացդ գնդապետ է կանգնած, ասացին՝ մենք էլ գնդապետ չգիտեմ ինչ անող ենք, հետո ասացին՝ սրան տարեք։ Ասացի՝ սրան չէ, մի քիչ նորմալ պահեք ձեզ, սա ինչ դրսևորումներ է։ Ուղղակի մայթով ինձ համար քայլում էի, տեսա, որ զինակից ընկերս է, զոհվածի ծնող է։ Եկան, քաշքշեցին, ասացի՝ մեկ րոպե, կբացատրեք, թե ինչու եք տանում, ինչ արարք եմ արել, որ տանում եք, մայթի վրա կանգնած եմ։ Սկսեցին խփելը, հետո վերցրին մեշոկի նման շպրտեցին ավտոեմեքենան, մարմնական վնասվածքներ ստացա, մոտ մի հինգ րոպե երևի գետնի վրա խփում էին անընդհատ։ Ասացի՝ մի խփեք, դուք հո հիմար չեք, դուք եք կարգուկանոն պահողը, թե կարգուկանոն խախտողն եք։

Այդպես տարան ոստիկանական բաժանմունք, մի քանի ժամ հետո՝ բաց թողեցին»,- դեպքից հետո պատմել էր գնդապետ Մուրադյանը։

Չնայած բարձրացրած աղմուկին, այդուհանդերձ, իրավապահները չեն շտապել քրեական գործ հարուցել ու գնդապետը մայիսի 27-ին հանցագործության մասին հաղորդում է ներկայացրել ԱԱԾ, որից հետո միայն հարուցվեց քրեական գործ։

Գնդապետ Արայիկ Մուրադյանը «Փաստինֆո»-ի հետ զրույցում հայտնեց, որ քրեական գործը հարուցվել է խոշտանգման և պաշտոնեական լիազորությունների չարաշահման հատկանիշներով։ ԱԱԾ-ում նյութերի նախապատրաստման ընթացքում դատաբժշկի ուղեգիր է տրվել, որն արձանագրել է Մուրադյանի մոտ առկա մարմնական վնասվածքները, ընդ որում, թեև դեպքը տեղի էր ունեցել մայիսի 18-ին, իսկ դատաբժիշկը Մուրադյանին զննել է հունիսին՝ դեպքից օրեր անց, սակայն մարմնական վնասվածքներն, այդուհանդերձ, առկա եղել են։ Քրեական վարույթի շրջանակներում ինքը և զոհված զինծառայողի հայրը՝ Սասուն Առաքելյանին, որին ոստիկանները բերման էին ենթարկում, տուժող են ճանաչվել։

Գործն ի սկզբանե քննվում էր ԱԱԾ-ում, սակայն գործը տեղափոխվել է այլ քննչական մարմին։ Այսօր նախաքննական մարմնից կապ են հաստատել Մուրադյանի հետ՝ տեղեկացնելով, որ իր տղաները պետք է հրավիրվեն՝ վկայի կարգավիճակով հարցաքննության։

«Մինչև այսօր ոչ մի բան չկար։ Այսօր առավոտյան են զանգել։ Չգիտեմ ինչ ասացին, պատասխանեցի՝ մեկ է, նույնն եք, ուզում է՝ ԱԱԾ լինի, Ք- լինի, ՀԿԿ լինի, միևնույնն է։ Մեկ է՝ ինչ հրաման տալիս է, դա էլ կատարում եք։ Ասեցի՝ կարող եք գործը փակել, երբ ձեր հարգարժան Նիկոլոսը կգնա, էդ ժամանակ նոր գործը կբացվի։ Ինչպես է լինում, որ մարդկանց վրա գործ է հարուցվում, հետո՝ այդ նույն մարդիկ առաջխաղացում են ունենում, ինչպես է այդպես ստացվում»,- նշեց Մուրադյանը՝ հավելելով. «Եթե ընդդիմությունից լինեին, հենց նույն րոպեին «կկանդալեին», կտանեին, բայց որ մենք են՝ ձգձգում են, այս կողմ-այն կողմ են գցում»։

Մուրադյանը նշեց, որ հարցաքննության ընթացքում ինքը մատնանշել է, թե տեսագրությունում առկա որ ոստիկանն է եղել, իրեն ասել են՝ կհրավիրեն առերեսման, սակայն առ այս պահն առերեսում չի կատարվել։

Հեղինակ՝ Իզաբել Սահակյան

Աղբյուր` Փաստինֆո