Փաստ ինֆո

Այսօր այնպիսի իրավիճակում ենք, որ պետք է կարողանանք մի կողմ դնել քաղաքական հակասություններն ու տարըմբռնումները և համատեղել ջանքերը՝ Արցախը փրկելու համար։ Դա շատ լավ գիտակցելով՝ մեր համախոհներին, կուսակիցներին հորդորել ենք միանալ «Հանուն Արցախի պաշտպանության» շարժմանը, որը բոլոր նախադրյալներն ունի՝ վերածվելու համահայկական շարժման։ Այդ մասին «Փաստինֆո»-ի հետ զրույցում ասաց Արցախի ԱԺ «Արդարություն» խմբակցության ղեկավար Դավիթ Գալստյանը։

«Այսօր մեր առջև ծառացած մարտահրավերները կարող ենք հաղթահարել բացառապես համահայկական համախմբման միջոցով։ Այդ ճանապարհին շատ կարևոր է նեղ քաղաքական, կուսակցական շահերը մի կողմ թողնելը։ Այսօր բոլորս պետք է մտածենք ոչ թե քաղաքական դիվիդենտներ շահելու մասին, այլ հայրենիքի պաշտպանությանն ուղղված հստակ քայլեր անենք։ Վերջերս որոշ ուժեր՝ մասնավորապես «Միասնական հայրենիք»-ը մեղադրանքեր է հնչեցրել մեր հասցեին՝ այդպես ավելի խորացնելով հասարակության պառակտումը։ Եթե նրանց նպատակը, իրոք, քաղաքական դիվիդենտներ շահելը չէ, ապա հորդորում եմ, որ իրենք էլ, իրենց համախոհներն էլ միանան «Հանուն Արցախի պաշտպանության» շարժմանը և գործնական քայլերով, այլ ոչ թե՝ հայտարարություններով, ցույց տան, որ հայրենիքի պաշտպանությունն ամեն ինչից վեր է»,-ասաց Գալստյանը և հավելեց, որ շարժումը իրենց քաղաքական ուժի նախաձեռնությունը չէ, ուղղակի, գիտակցելով դրա կարևորությունը, կուսակցության բազմաթիվ անդամներ միացել են շարժմանը։

Պատգամավորի խորին համոզմամբ՝ Արցախի պաշտպանությունը միայն Արցախում ապրող մեր հայրենակիցների ուժերով հնարավոր չէ իրականացնել, ինչը հստակ գիտակցում են նաև շարժման գաղափարի շուրջ համախմբած բոլոր մարդիկ՝ Արցախում, Հայաստանում, Սփյուռքում։

Գալստյանն ասում է՝ վերջին մեկ շաբաթվա ընթացքում շարժման անդամներն ակտիվ հանդիպումներ են ունեցել հասարակական-քաղաքական տարբեր շրջանակների, հասարակական կազմակերպությունների, կոլեկտիվների հետ և ստացել դրական ազդակներ։

«Սա վերկուսակցական շարժում է, նպատակն էլ Արցախի պաշտպանությունն է։ Մենք ևս վայր ենք դրել կուսակցական դրոշը և միավորվել Արցախի դրոշի ներքո։ Այս շարժմամբ փորձ է արվում ցույց տալ, որ հայ ժողովուրդը հաջողություններ է ունեցել միայն այն ժամանակ, երբ միասնական է եղել։ Պետք է հստակ ուղի գծել և շարժվել այդ ուղով, որպեսզի Արցախն իրոք կարողանանք փրկել, որպեսզի հնարավոր լինի կանխել Արցախի հայաթափումը։ Կամք ու վճռականություն է պետք՝ ամեն ինչ մի կողմ դնելու և Արցախի դրոշի տակ համախմբվելու համար։ Ուրախալի է, որ շարժումը դրական արձգանքներ է սկսել ստանալ նաև Հայաստանից և Սփյուռքից»-նշում է պատգամավորը։

Գալստյանը շեշտում է՝ «Հանուն Արցախի պաշտպանության» շարժումը կոչված է միավորելու հայրենանվեր մարդկանց․ այն չպետք է անհատականացվի, առաջնորդներ կարգվեն, այլ ինքնաբուխ համաժողովրդական շարժում պետք է լինի։ Շարժման մեկնարկը նախատեսվում է տալ սեպտեմբերի 2-ին՝ Արցախի Հանրապետության անկախության հռչակման օրը։

Շարժման պահանջները ևս կձևակերպվեն առաջիկայում, բայց որ գլխավոր նպատակներից մեկն Արցախի իշխանությունների որոշումների կայացման գործում հանրության կարծիքն ու կամքն առանցքային դարձնելն է լինելու, Գալստյանը, վստահ է․

«Արցախի իշխանություններն այսօր գործում են վախի մթնոլորտում․ վախենում են Ադրբեջանի սադրանքներից, Նիկոլ Փաշինյանից։ Օրինակները, ցավոք, շատ են։ Չեն վախենում միայն ժողովրդի դիմադրությունից։ Շարժումը պետք է նպաստի, որպեսզի այն որոշումները, որոնք հայկական շահից են բխում, կյանքի կոչվեն, իսկ սպառնալիքով պարտադրված որոշումները պետք է կասեցվեն։ Հասարակության ճնշման տակ կարող են կանխվել գործընթացները, որոնք ի վնաս Արցախի են։

Երբ Արայիկ Հարությունյանը փորձում էր մեկ հարթության մեջ դնել բոլոր ուժերին՝ հայտարարելով, թե այլընտրանքային ճանապարհի վերաբերյալ բոլոր ուժերը տվել են իրենց համաձայնությունը, մեր կուսակցության համանախագահը հանրային ձևով արձագանքեց՝ շեշտելով, որ դրա վերաբերյալ մեր ուժն ու ընդդիմադիր մյուս երկու ուժերը գրավոր առաջարկություն են ներկայացրել անվտանգության խորհրդին, որն այդպես էլ չհրապարակվեց։ Ասածս այն է, որ հանրության պայքարի ոգին նման քայլերով փորձում են կոտրել, ինչն աթույլատրելի է։Պատասխանատվությունից խուսափելու փոխարեն՝ օր առաջ ջանքերը համադրել է պետք, այլապես Արցախն ամբողջությամբ կկորցնենք»,-ասում է Դավիթ Գալստյանը։

Աղբյուր` Փաստինֆո