Փաստ ինֆո

Մինսկի խմբի ձեւաչափի փոփոխության մասին Նիկոլ Փաշինյանը հայտարարել է դեռեւս 2018թվականին՝ լինելով վարչապետի թեկնածու։ Նման հայտարարությամբ է հանդես եկել Լեհաստանում նախկին դեսպան Էդգար Ղազարյանը՝ ֆեյսբուքյան ուղիղ եթերում ներկայացնելով այն փաստերը, որոնք վկայում են այն, որ հենց Փաշինյանն է բերել պատերազմը։

«2018թ., այսպես ասած, սիրո եւ համերաշխության հեղափոխությունից հետո Նիկոլ Փաշինյանը խոստումներ տվեց եւ հայտարարեց, որ այդ հեղափոխությունը ոչ միայն վտանգ չի պարունակում, այլեւ նորանոր հնարավորություններ է բացում Արցախի ժողովրդի եւ Արցախի համար։ Ղարաբաղյան հիմնախնդրի խաղաղ, միջազգային իրավունքի վրա կարգավորման գործընթացում կարծրատիպերը մեզ համար պարտադիր չեն։ Կենսական է Արցախի ժողովրդի իր ճակատագիրն ինքնուրույն որոշելու միջազգային ճանաչումը։ Հարկ եմ համարում ընդգծել, որ բանակցությունները չեն կարող լիարժեք եւ արդյունավետ համարվել, քանի դեռ դրան չի մասնակցում հակամարտության լիարժեք կողմերից մեկը՝ Արցախի ղեկավարությունը, ինչը նախատեսված Մինսկի խմբի 92թ. մանդատով»,- վարչապետ Փաշինյանի 2018թ. արված հայտարարությունից մեջբերեց Լեհաստանում ՀՀ նախկին դեսպան Էդգար Ղազարյանը։
Բանախոսը շեշտեց, որ դա այդ հայտարարության վտանգավոր մասն է, որովհետեւ Մինսկի խումբը հայկական կողմից բանակցային գործընթացում, որպես պաշտոնական բանակցող, մշտապես ճանաչել է բացառապես Հայաստանի ղեկավարին՝ ՀՀ նախագահին, իսկ սահմանադրական փոփոխություններից հետո՝ ՀՀ վարչապետին։

«Նիկոլ Փաշինյանը դեռ վարչապետի թեկնածու եղած ժամանակ հայտարարում է Մինսկի խմբի ձեւաչափի փոփոխության մասին։ Եվ վարչապետ ընտրվելու հաջորդ օրը՝ 2018թ. մայիսի 9-ին, մեկնում է Արցախ, այնտեղ հրավիրում է մեծ մամուլի ասուլիս։ Այդ ասուլիսին նա ասում է, որ պետք է բանակցային ձեւաչափի փոփոխություն, այն է՝ Արցախը պետք է լինի բանակցային կողմ։ Եվ քանի որ դա ասում էր արդեն ընտրված վարչապետը, անմիջապես հետեւեց Ադրբեջանի արձագանքը, որ իրենց համար դա անթույլատերլի է, ԵԱՀԿ Մինսկի խմբի համանախագահների հայտարարությունները, որ այս փուլում բանակցային ձեւաչափի փոփոխությունն անթույլատրելի է եւ իրենք դա չեն նախատեսում։ Հայտարարություններ արեցին նաեւ մի շարք միջազգային կազմակերպություններ, այդ թվում՝ ԵՄ արտաքին քաղաքականության հարցերով հանձնակատարը։ Այսինքն՝ մերկապարանոց դատարկախոսություն, որն ընդամենը հարված էր Մինսկի խմբին, որի գործունեությունից մինչ օրս դժգոհում էր բացառապես Ադրբեջանը»,- նկատել է նախկին դեսպանը՝ արձանագրելով, որ Մինսկի խումբը տապալվել է հայկական կողմի նախաձեռնությամբ՝ Ալիեւի ցանկությամբ։

Մանրամասները՝ տեսանյութում

Աղբյուր` Փաստինֆո