Փաստ ինֆո

Դատավորներ Մխիթար Պապոյանի, Դավիթ Գրիգորյանի, փաստաբան Ալեքսանդր Սիրունյանի հաղորդումների վերաբերյալ հարուցված քրեական գործով ԱԱԾ-ն արդեն երեք տարի է, ինչ նախաքննություն է իրականացնում, սակայն այնքան անճար է, որ քրեական գործով ոչ մեղադրյալ կա, ոչ էլ գործն է կարճվում։ Հայտնի է, որ դատավորները գործով տուժողի կարգավիճակում են, սակայն նրանց զրպարտողներին ԱԱԾ-ն չի համարձակվում որպես մեղադրյալ ներգրավել։

Հիշեցնենք, որ քրեական գործը հարուցվել է ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը փոխելու եւ անձնական երաշխավորություն կիրառելու մասին դատավոր Դավիթ Գրիգորյանի 2019թ մայիսի 18-ի որոշումից հետո: Նախ` փաստաբան Ալեքսանդր Սիրունյանը դատավոր Դավիթ Գրիգորյանին սոցիալական ցանցում մեղադրեց կոռուպցիայի մեջ, ինչին անմիջապես արձագանքեց դատավորն ու հաղորդում ներկայացրեց, որ ստուգեն փաստաբանի հայտնած տվյալները ու կամ իրեն մեղադրանք առաջադրեն` կաշառակերության համար, կամ փաստաբանին` սուտ մատնության:

Ինչպես գիտենք` կաշառքը չի հիմնավորվել ու դատավորին նման մեղադրանք չի առաջադրվել, բայց դատավորին վարկաբեկելու համար փաստաբանի գործողություններն գնահատական չի տրվել: Մյուս դրվագը վերաբերում է վերաքննիչ քրեական դատարանի դատավորներ Արշակ Վարդանյանին, Մխիթար Պապոյանին ու դատարանի նախագահ Վազգեն Ռշտունուն: Ֆեյսբուքյան օգտատեր Արտակ Գալստյանը, որը հայտնի է որպես «Վանոյի Արտակ», գրառում էր կատարել, թե այդ որոշումը Դավիթ Գրիգորյանի փոխարեն գրվել է դատավորներ Մխիթար Պապոյանի, Վազգեն Ռշտունու և Արշակ Վարդանյանի կողմից:

Մխիթար Պապոյանը հաղորդում էր ներկայացրել իրեն զրպարտելու վերաբերյալ, որի հիման վրա ԱԱԾ-ում հարուցվել է քրեական գործ՝ ՀՀ ՔՕ-ի 344-րդ հոդվածի 2-րդ մասով, այն է` դատավորին զրպարտելը:

«Փաստինֆո»-ն գրավոր հարցում է ուղարկել ԱԱԾ՝ պարզելու, թե, ի վերջո, գործը երեք տարի քննելուց հետո արդյո՞ք որևէ անձի մեղադրանք առաջադրվել է, թե՝ ոչ, քանի անձ է տուժող ճանաչվել, ի վերջո, ԱԱԾ-ն վերացրե՞լ է արդյոք դատավորների նկատմամբ իրականացված գաղտնալսումների և խոսակցությունների վերծանումների արդյունքում ձեռքբերված տվյալները ՝ նկատի ունենալով, որ դատարանների կողմից դրանք ոչ իրավաչափ են ճանաչվել։

ԱԱԾ-ից, սակայն, կարճ են պատասխանել՝ հրաժարվելով այլ տեղեկատվություն տրամադրել։ Ստացված պատասխանից միայն կարող ենք արձանագրել, որ գործը երեք տարի քննվում է և այն կարճելու որոշում չի կայացվել։

«Քրեական վարույթը գտնվում է նախաքննության փուլում և գրությամբ հայցվող հարցերի վերաբերյալ տեղեկատվություն չի կարող տրամադրվել՝ հիմք ընդունելով «Տեղեկատվության ազատության մասին» ՀՀ օրենքի 8-րդ հոդվածի 1-ին մասի 3-րդ կետը, քանի որ դրանք պարունակում են հրապարակման ոչ ենթակա նախնական քննության տվյալներ»,- նշել են ԱԱԾ-ից

Ավելի վաղ «Փաստինֆո»-ն հայտնել էր, որ այս գործով ԱԱԾ քննչական դեպարտամենտում շուրջ 2.5 տարի քննություն իրականացնելուց հետո դատավորներ Մխիթար Պապոյանը, Արշակ Վարդանյանը և Դավիթ Հարությունյանը տուժող են ճանաչվել, Վազգեն Ռշտունին ու Արման Հովհաննիսյանը՝ հարցաքննվել։

Ընդ որում, թեև քրեական գործը հարուցված է դատավորներին զրպարտելու մասին հաղորդման հիման վրա, օրենքի խախտմամբ օպերատիվ միջոցառումներ են իրականացվել հենց դատավորների նկատմամբ։ Գաղտնալսվել են Երևանի ընդհանուր իրավասության դատարանի դատավորներ Դավիթ Հարությունյանը, Արման Հովհաննիսյանը, Վերաքննիչ քրեական դատարանի դատավորներ Մխիթար Պապոյանը, Արշակ Վարդանյանը, այն ժամանակ դատարանի նախագահի պաշտոնը զբաղեցնող Վազգեն Ռշտունին, ինչպես նաև Սահմանադրական դատարանի դատավոր Հրայր Թովմասյանը: Դատավոր Հարությունյանն ու Արշակ Վարդանյանը վիճարկել են իրենց նկատմամբ ՕՀՄ-ներ իրականացնելու թույլտվությունները, ինչի արդյունքում արձանագրվել է դատավորների իրավունքների խախտումը, իսկ ՕՀՄ իրականացնելու արդյունքում ձեռք բերված տվյալները ճանաչվել են որպես անթույլատրելի ապացույց, և վարույթն իրականացնող մարմնի հավաստմամբ` հանվել գործից:

Հեղինակ՝ Իզաբել Սահակյան

Աղբյուր` Փաստինֆո