Փաստ ինֆո

Մանկաբույժ Կարինե Առաքելյանը մեղադրվում է իրացման նպատակով առանձնապես խոշոր չափի՝ 4.91 գրամ քաշով թմրամիջոց ապօրինի ձեռք բերելու և պահելու մեջ։ Թմրանյութը հայտնաբերվել է կնոջ տանն իրականացված երկրորդ խուզարկության ժամանակ՝ կնոջ պայուսակում, որը գտնվել է ներքնակի տակ։ Իսկ թե ինչպես է այն հայտնվել իր պայուսակում՝ Առաքելյանը որևէ հստակ բացատրություն տալ չի կարողացել։ Առաջին խուզարկության ժամանակ՝ 2017թ.-ին, Առաքելյանի որդին՝ Հայկ Համբարձումյանը, ներկայացրել է տանն առկա թմրանյութերը, ինչից հետո իրավապահները ձերբակալել են նրան, այժմ Երևանի ընդհանուր իրավասության դատարանի վարույթում քննվող քրեական գործերից մեկով Հայկ Համբարձումյանը ևս ունի ամբաստանյալի կարգավիճակ։ Մայր եւ որդի միմյանց վերաբերյալ ցուցմունք չեն տվել՝ օգտվելով մերձավորի դեմ ցուցմունք չտալու իրենց իրավունքից։

Մանկաբույժ Կարինե Առաքելյանի վերաբերյալ գործը դատարանում է 2018թ.-ից։ Երեք տարի տևած քննությունից հետո Երևանի ընդհանուր իրավասության դատարանը՝ դատավոր Արման Հովհաննիսյանի նախագահությամբ, արդարացման դատական ակտ է կայացրել՝ անձի մեղավորությունն ապացուցված չլինելու հիմքով։ Բանն այն է, որ քրեական գործով Կարինե Առաքելյանի մեղավորությունը հաստատող այլ տվալներ, բացի խուզարկության ընթացքում հայտնաբերված թմրանյութից, ձեռք չի բերվել. Առաքելյանի դեմ ցուցմունք տված անձինք չկան, ՕՀՄ արդյունքներ առկա չեն, փորձաքննություն է իրականացվել՝ մեզի և մազի փորձանմուշների, որում հայտնաբերվել է կանաբինոիդների խմբին պատկանող թմրալկալոիդներ, սակայն փորձագետի կողմից արձանագրվել է, որ հնարավոր են նաև իրավիճակներ, որ անձի մազի կամ մեզի նմուշում հայտնաբերվեն թմրամիջոցներ այն դեպքում, երբ փակ տարածության մեջ վերջինը մեկ ժամից ոչ պակաս գտնվում է թմրամիջոց գործածող մեկ այլ անձի հետ:

Բացի այդ՝ առաջին ատյանի դատարանը գտել է, որ թմրամիջոցի մասին չբարձրաձայնելը կարող է կապված լինել վախի, զգուշավորության, մերձավոր ազգականին որևէ վնաս չհասցնելու ձգտման և այլ նպատակների հետ, քանի որ չի բացառվում, որ Կարինե Առաքելյանի մահճակալի ներքնակի տակ հայտնաբերված թմրամիջոցը նույնպես պատկանում է վերջինի որդի, թմրամիջոցների ապօրինի շրջանառության վերաբերյալ քննվող քրեական գործով քրեական հետապնդման ենթարկվող Հայկ Համբարձումյանին՝ հաշվի առնելով հատկապես այն հանգամանքը, որ երկու խուզարկություններով հայտնաբերված թմրամիջոցները նույն տեսակին են դասվում:

Առաջին ատյանի դատարանը եկել է եզրահանգման, որ Առաքելյանի մեղավորությունը չի հաստատվում, հակառակ մոտեցումը կասկածելի է, և նման հետևությունը հիմնականում հիմնված կլինի ենթադրությունների վրա:
Դատախազը վերաքննիչ բողոք է ներկայացրել արդարացման դատական ակտի դեմ, որը Վերաքննիչ քրեական դատարանը՝ դատավոր Մհեր Արղամանյանի նախագահությամբ, կազմով դատավորներ՝ Լուսինե Աբգարյանի, Ալեքսանդր Ազարյանի, բավարարել է՝ մեղավոր ճանաչելով Առաքելյանին և դատապարտելով ազտազրկման՝ 7 տարի ժամկետով։ Դատավճռի դեմ վճռաբեկ բողոք է ներկայացրել պաշտպանության կողմը, որը դեռևս վարույթ չի ընդունվել։

«Փաստինֆո»-ի թղթակցի հաղորդմամբ՝ այսօր Վճռաբեկ դատարանի շենքի մոտ բողոքի ակցիա են իրականացրել Առաքելյանը, նրա ընտանիքի անդամները՝ պահանջելով արդարություն։ Նրանք գտնում են՝ Վերաքննիչ դատարանի որոշումն անհիմն է, կայացվել է ենթադրությունների հիման վրա։ Ընդ որում, որոշումը թեև կայացվել է կոլեգիալ կազմով, բայց նրանք շեշտադրում են դատավոր Մհեր Արղամանյանի ազդեցությունը։ Լրագրողների հետ զրույցում Կարինե Առաքելյանը պնդում է՝ չկա փաստական տվյալ, որը ապացուցում է իր մեղավորությունը, իսկ թե ինչ հանգամանքներում է հայտնաբերվել թմրանյութը, Առաքելյանը նշեց՝ տեղյակ չէ, թե ինչպես է թմրանյութը հայտնաբերվել իր ննջարանում, թմրանյութը հայտնաբերվել է որդու ձերբակալումից երկու ամիս անց։ Առաքելյանն ընդգծեց՝ ինքը մանկաբույժ է, երեխաների, նրանց ծնողների հետ է շփվում, վերաքննիչ դատարանը գրչի մեկ հարվածում խեղում է իր ճակատագիրը։

Հեղինակ՝ Իզաբել Սահակյան

Աղբյուր` Փաստինֆո