Փաստ ինֆո

«Սուրմալու» առևտրի կենտրոնում երեկ տեղի ունեցած պայթյունի ու դրան հաջորդած հրդեհի առնչությամբ  նախաձեռնված քրեական վարույթի շրջանակներում հարցաքննվել են երկու տասնյակից ավելի անձինք։ Այս մասին «Փաստինֆո»-ի հետ զրույցում հայտնեց ՔԿ մամուլի քարտուղար Վարդան Թադևոսյանը։

Հիշեցնենք, որ օգոստոսի 14-ին, ժամը 13։23-ին Ճգնաժամային կառավարման ազգային կենտրոն ահազանգ է ստացվել, որ Երևանի Արշակունյաց 15 հասցեում գտնվող «Սուրմալու» առևտրի կենտրոնում տեղի է ունեցել պայթյուն՝ հրդեհի բռնկմամբ, եռհարկանի շինությունը մասնակի փլուզվել է։

Պայթյունից մեկ օր անց՝ հրդեհը դեռևս չի մարել։ Հրդեհաշիջման և փրկարարորոնողական աշխատանքները շարունակվում են։ ԱԻՆ փոխանցմամբ՝ պայթյունի հետևանքով զոհվել է վեց քաղաքացի, 20 անձ համարվում է անհետ կորած, ավելի քան 60 քաղաքացի՝ տուժել է։  

Պայթյունի դեպքի առթիվ նախաձեռնվել է քրեական վարույթ՝ ՀՀ ՔՕ 357-րդ հոդվածի 2-րդ մասի (Հրդեհային անվտանգության կանոնները կամ պահանջները խախտելը, որն անզգուշությամբ առաջացրել է մարդու մահ կամ այլ ծանր հետեւանք) եւ 358-րդ հոդվածի 2-րդ մասի (Դյուրավառ կամ այրիչ նյութերի պահպանման, հաշվառման, փոխադրման, առաքման կամ օգտագործման կանոնները կամ պահանջները խախտելը, որն անզգուշությամբ առաջացրել է մարդու մահ կամ այլ ծանր հետեւանք) հատկանիշներով։

ՔԿ-ից «Փաստինֆո»-ի հետ զրույցում հայտնեցին, որ վարույթի շրջանակներում երկու տասնյակից ավելի անձինք են հարցաքննվել, նշանակվել են փորձաքննություններ։  

Ինչ վերաբերում է պայթյունի առաջացման վերաբերյալ վարույթն իրականացնող մարմնի կողմից առաջ քաշվող վարկածներին, ապա  ՔԿ-ից զերծ մնացին մանրամասնելուց։

 Նշենք, որ այս պահին դեռևս շարունակվում են հրդեհաշիջման աշխատանքները, հայտնի չէ, թե ինչն է եղել պայթյունի հնարավոր պատճառը, որտեղից է եղել պայթյունը, սակայն շտապել են ընդգծել, որ ահաբեկչական ակտի մասին լինել խոսք լինել չի կարող, քանի որ նախ տեղի է ունենում որոշակի այրում, ծխագոյացում, այնուհետև պայթյուն:

Հեղինակ՝ Իզաբել Սահակյան

Աղբյուր` Փաստինֆո