Փաստ ինֆո

Աղավնոյից պետական կառույցներն այսօր արդեն պետական գույքն էին հանում, ապահով վայր տեղափոխում, որ թշնամու ձեռքը չընկնի։ Գիտեն՝ թուրքը Աղավնո, Բերձոր մտնելուն պես հիմնահատակ ոչնչացնելու է այն ամենը, ինչը հնարավոր է։ Հայկական Աղավնոյի դատարկման աննկարագրելի պատկերին ականատես եղած,Արցախի Աժ «Արդարություն» խմբակցության ղեկավար Դավիթ Գալստյանը ցավով փաստում է՝ պետական մակարդակով որոշում է կայացված, որ Աղավնոն, Բերձորն ու Ներքին Սուսը հանձնվում են թշնամուն։

«Լաչինի միջանցքը, արդեն պարզ է, որ հանձնում են՝ չնայած չկա որևէ փաստաթուղթ,  որով ամրագրված է, որ մեզ հրամցվող նոր ճանապարհը  գործելու է միջանցքի տրամաբանությամբ։ Բազմիցս շեշտել ենք, որ նոյեմբերի 9-ի փաստաթղթի համաձայն՝ Շուշին շրջանցող երթուղին պետք է անցնի Լաչինի միջանցքով։  Եթե այն անցներ իրոք Լաչինի միջանցքով, ապա Աղավնոյի, Բերձորի, Սուսի տարհանման անհրաժեշտությունը չէր առաջանա»,-«Փաստինֆո»-ի հետ զրույցում ասում է Աժ «Արդարություն» խմբակցության ղեկավար Դավիթ Գալստյանը։

Գալստյանը հիշեցնում է՝ երբ Արցախի նախագահը հրապարակային հայտարարել էր, թե Արցախի բոլոր քաղաքական ուժերն այդ ճանապարհին տվել են համաձայնություն, իրենց քաղաքական ուժն առաջինն է հակադարձել այդ պնդմանը։

 «Մենք ասել ենք, որ նոր ճանապարհը եթե չի անցնում Լաչինի միջանցքով, ապա դա անընդունելի է և պետք է ամեն ինչ անել, որ  հենց միջանցքով անցնի։ Հիմա փորձում են դարձյալ համոզել, թե այդ նոր ճանապարհը ևս գործելու է միջանցքային տրամաբանությամբ, բայց դա մեզ չի բավարարում։ Իշխանությունների հանդեպ վստահության մակարդակը հավասարվել է զրոյի։ Մինչև չլինի գրավոր եռակողմ փաստաթուղթ, որ  միջանցքը տեղափոխվում է նոր կառուցված ճանապարհի շուրջ, իշխանությունները պարտավոր են ատամներով պահել Աղավնոն էլ, Բերձորն էլ»,-շեշտում է Արցախի ԱԺ պատգամավորը։

Իշխանություններին  չվստահելու պատճառները, ըստ Գալստյանի, շատ են։ Որպես թարմ օրինակներ՝ Խծաբերդի, Քարագլուխ- Փառուխի դեպքերն է հիշում։ Ասում է՝ Ադրբեջանի կողմից Խծաբերդի զավթումից հետո Հայկ Խանումյանը բողոքի ակցիա էր անում, ինքն էլ, համարելով, որ պետք է պահանջատեր լինել, աջակցում էր այդ նախաձեռնությանը, բայց պաշտոն ստանալուց հետո Խանումյանը լռեց։

«Այսօր նույն Խանումյանը փորձում է մոլորության մեջ գցել հանրությանը՝ ասելով, թե նոր ճանապարհի կառուցմամբ Արավուսն անցնում է մեզ։ Դա հերթական պոպուլիստական քայլն է, ժողովրդին կեղծ բաներով կերակրելու միջոց։ Երբ եղան Փառուխ-Քարագլխի դեպքերը, Արայիկ Հարությունյանը հայտարարեց, որ մինչև ադրբեջանցիները Քարագլխից դուրս չգան, թույլ չենք տալու, որ  մեր ճանապարհներից օգտվեն։ Հիմա ինչպե՞ս հավատանք նրանց հավաստիացումներին»,-հռետորական հարց է տալիս Գալստյանը։

Որ Արցախի իշխանությունները որևէ հարցում՝ այդ թվում կադրային քաղաքականության, ինքնուրույն քաղաքականություն չեն վարում, Գալստյանը վստահ է։ Նոր երթուղու համաձայնեցումը ևս, նրա համոզմամբ, ՀՀ իշխանությունների անմիջական ազդեցությամբ ու իմացությամբ է եղել։ Իսկ որ ՀՀ ներկա իշխանությունները՝ Նիկոլ Փաշինյանի գլխավորությամբ հայտարարում են մի բան ու անում հակառակը, Գալստյանի խոսքով, ավելի քան ակնհայտ է․

«Ավելի հաճախ կյանքի են  կոչվում Փաշինյանի՝ Ալիևի հետ ձեռք բերած ծածուկ պայմանավորվածությունները, քան հնչեցված հայտարարությունները։ Հայտարարեց՝ Արցախը Հայաստան է և վերջ, տեսանք, թե ինչպես ճիշտ հակառակն արեց։  Ֆեյսբուքյան իր ասուլիսի ժամանակ ասաց, որ Բերձորից, Աղավնոյից պետք է դուրս գանք, իսկ այն, որ Կառավարության վերջին նիստին խոսում էր երթուղու պլանի համաձայնեցված չինելու մասին, կարծում եմ՝ Ալիևին ասել էր, որ ներքին լսարանի համար պետք է նման բան ասի։ Փաշինյանի՝ ոչ կառավարության նիտերին, ոչ էլ  ասուլիսներին արած հայտարարությունները որևէ բանի հիմք չեն դառնում։ Ըստ այդմ՝ եթե հասարակության ակտիվ անդամները, քաղաքական գործիչները լուռ մնան ու ճնշում չգործադրեն, որպեսզի հայկական, ադրբեջանական և ռուսական կողմերի միջև կնքվի փաստաթուղթ, որով ամրագրվի, որ նոր երթուղին գործելու է միջանցքի տրամաբանությամբ, ապա կարճ ժամանակ անց կորցնելու ենք Լաչինի միջանցքը՝ առանց այդ կարևոր երաշխիքի»,-նշում է պատգամավորը և ևս մեկ անգամ շեշտում, որ նոյեմբերի 9-ի փաստաթղթում առկա միակ հայանպաստ ամրագրումը՝ միջանցք հասկացությունը, պետք է ամեն գնով կյանքի կոչել։

Աղբյուր` Փաստինֆո