Փաստ ինֆո

Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, ընթանում են հասարակական-քաղաքական գործիչ Ավետիք Չալաբյանի եւ Էմմա Սարգսյանի գործով դատալսումները։

«Փաստինֆո»-ի թղթակցի հաղորդմամբ՝ Ավետիք Չալաբյանը հայտարարեց՝ իրեն առաջադրված մեղադրանքը աբսուրդային է եւ այն չի ընդունում։ Նրա գնահատմամբ՝ մեղադրական եզրակացությունն, ըստ էության, անբովանդակ է, զուտ մեղադրանք է, այստեղ ապացույց չկա և հանցակազմ գոյություն չունի։

Չալաբյանն ուշադրություն հրավիրեց այն հանգամանքին, որ իրեն և Էմմա Սարգսյանին առաջադրվել է նույն մեղադրանքը, սակայն առաջին օրվանից իր և Էմմա Սարգսյանի նկատմամբ նախաքննական մարմնի, ապա՝ դատարանի վերաբերմունքն ասիմետրիկ է, Սարգսյանի նկատմամբ որպես խափանման միջոց է ընտրվել ստորագրությունը՝ չհեռանալու մասին, իսկ ինքը կալանավորված է։

Նրա խոսքով՝ Էմմա Սարգսյանին թույլատրվել է այլևս չհաճախել դատական նիստերին, իսկ ինքը ստիպված է լինում ամեն անգամ ոստիկանական ՈՒԱԶ-ով դժոխային, մահաբեր ճանապարհ անցնել՝ 1 ժամ։

«Ես ենթադրում եմ, ավելի ճիշտ դա իմ ներքին համոզմունքն է, որ դատավճիռն արդեն պատրաստ է և դրված է հարգարժան դատարանի դարակներից մեկում։ Այդ դատավճռով, նույն տրամաբանությամբ, Էմմա Սարգսյանը ստանալու է հնարավոր ամենամեղմ պատիժը, իսկ ես՝ հնարավոր ամենածանր պատիժը։ Սա դատավարություն չէ ընդդեմ Էմմա Սարգսյանի և Ավետիք Չալաբյանի, այլ դատավարություն է «Նիկոլ Փաշինյանն ընդդեմ Ավետիք Չալաբյանի»։ Էմմա Սարգսյանն այստեղ արդեն պատահական մարդ է»,-ասաց Ավետիք Չալաբյանը։

Նա առաջարկեց նաև մարդասեր լինել և Էմմա Սարգսյանի վրայից մեղադրանքն առհասարակ հանել՝ հաշվի առնելով, որ միայնակ մայր է, խնամքին ունի երեխա։ Իրեն կարող են ներգրավել որպես վկա, ինչը շատ ավելի արդար կլինի։

Նրա պաշտպան Վարազդատ Հարությունյանը բացման խոսքով հանդես եկավ՝ նշելով.

«Միջնորդություն ենք ներկայացրել՝ հարցաքննելու 2000 ուսանողի։ Ինչու՞։ Շատ պարզ։ Մենք խելագար չենք, մենք հասկանում ենք, որ 2000 ուսանողների հարցաքննելը կապրիզ չէ։ Մենք ելել ենք Ավետիք Չալաբյանին առաջադրված մեղադրանքի բովանդակությունից, որտեղ գրված է, որ այս մարդն առավոտյան արթնացել է ու որոշել 2000 հոգու նյութապես շահագրգռել։ Ուզում եմ հասկանալ՝ այս դահլիճում, բարձրագույն կրթություն ստացած անձանցից որևէ մեկի մտքով կարո՞ղ է անցնի, որ առավոտյան զարթնի ու ասի՝ ես այսօր ունեմ նպատակ, որոշել եմ 2000 հոգու նյութապես շահագրգռել։ Դրե՞լ են մեղադրանքի հիմքում՝ դրել են։ Իրականացրե՞լ ենք 2000 հոգու հարցաքննությունները, ոչ, իհարկե, որովհետև իրենք էլ իրենց առաջադրած մեղադրանքին չեն հավատացել։ Ի՞նչ են արել․ ծանուցագրեր են պատրաստել, ուղարկել համալսարանի ուսխորհրդի անդամների, նրանցից մեկը կամ երկուսը եկել, ներկայացել են, մնացածը չեն էլ եկել։ Ինչ է անում քննիչը՝ բնականաբար հետևողականություն չի ցուցաբերում, որ այդ վկաներին կանչի, ի վերջո հարցաքննի, հասկանա՝ Ավետիք Չալաբյանը երբևէ իրեն կամ միջնորդավորված կերպով նյութական շահագրգռություն առաջարկել է, թե չէ»։

Պաշտպանը նաև հռետորական հարց հնչեցրեց, որ եթե այդ հարցն ուղղեին ուսանողներին, արդյո՞ք նրանք հասկանալու էին, թե ինչ է նյութական շահագրգռումն առհասարակ։

Դատավոր Մնացական Մարտիրոսյանն ընդհատեց նրա խոսքը՝ նշելով, որ պաշտպանական կողմը բացման խոսքում պետք է ներկայացնի մեղադրանքի վերաբերյալ դիրքորոշում, այլ ոչ՝ նախաքննության մարմինների վերաբերյալ։

«Համամի՞տ են մեղադրանքի հետ, թե՝ ոչ, ընդունու՞մ են մեղադրանքը, թե՝ ոչ։ Մնացած հանգամանքների վերաբերյալ, երբ եզրափակիչ ելույթներ կամ այլ հնարավորություն կընձռնվի՝ կհայտարարեք»,-ասաց դատավորը՝ հայտնելով, որ պաշտպանը շեղվում է բացման խոսքին վերաբերելի պահանջներից։

Վարազդատ Հարությունյանն իր պաշտպանյալին առաջադրած մեղադրանքի վերաբերյալ արձանագրեց, որ այն, ինչ-որ մեղսագրվում է Ավետիք Չալաբյանին՝ մեղսագրվում է հակասահմանադրական նորմի հիման վրա, չկա գործի գեթ մեկ ապացույց, որը վկայում է Ավետիք Չալաբյանին մեղսագրվող արարքը Չալաբյանի կողմից կատարված լինելու մասին։  Ավետիք Չալաբյանի նկատմամբ իրականացվում է քաղաքական հետապնդում։ Նա էլ այս պահին հանդիսանում է քաղաքական բանտարկյալ, իսկ քաղաքական բանտարկյալ է հանդիսանում, որովհետև իրեն բանտարկել են միայն այն բանի համար, որ նա, օրինակ, իշխանական քաղաքական հասարակական գորիչ չէ, պետպաշտոնյա չէ, այլ՝ ընդդիմադիր հասարակական քաղաքական գործիչ է։

Հիշեցնենք, որ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում հարուցվել է քրեական գործ՝ ընդդիմության հավաքներին Հայաստանի ազգային ագրարային համալսարանի ուսանողների մասնակցության դիմաց նույն համալսարանի ուսանողական խորհրդի նախագահին նյութապես շահագրգռելու դեպքի առթիվ: Ենթադրյալ դեպքի վերաբերյալ 2022 թվականի մայիսի 9-ին լրատվական կայքերից մեկում ձայնագրություն է հրապարակվել՝ «1000 դրամ յուրաքանչյուր ուսանողի համար, Ագրարային համալսարանի դասախոսը դրդում է ուսխորհրդի նախագահին գումարի դիմաց կազմակերպել, որպեսզի ուսանողները մասնակցեն ընդդիմության հավաքներին՝ յուրաքանչյուր ուսանողի դիմաց առաջարկելով 1000 դրամ» վերտառությամբ:

Ըստ նախաքննական մարմնի՝ քաղաքական ընդդիմության կողմից կազմակերպվող հավաքներին մասնակցելու և որոշակի գործողություններ կատարելու դիմաց Հայաստանի ազգային ագրարային համալսարանի ուսանողական խորհրդի նախագահին նյութապես շահագրգռել են՝ առաջարկելով երկու հազար ուսանողի հավաքներին ներգրավելու դիմաց տրամադրել 2.000.000 ՀՀ դրամ գումար:

Հուլիսի 6-ին ՔԿ-ն հաղորդագրություն տարածեց՝ նախաքննության ավարտ հայտարարելու մասին, սակայն դատախազը չէր հաստատել մեղադրական եզրակացությունը և գործի նյութերը վերադարձրել նախաքննական մարմին՝ նախաքննությունը շարունակելու ցուցումով, մասնավորապես, անհրաժեշտ էր առաջադրված մեղադրանքը համապատասխանեցնել ՀՀ քրեական նոր օրենսգրքին: Դատախազի ցուցումը արագ քննիչն իրականացրել է ու մինչ գործը կուղարկվեր դատարան հապճեպ միջնորդել է երկարացնել Ավետիք Չալաբյանի կալանավորման ժամկետը, որը դատարանը բավարարել է՝ կալանավորման ժամկետը երկարացնելով 15 օրով։

Հեղինակ՝ Իզաբել Սահակյան

Աղբյուր` Փաստինֆո