Փաստ ինֆո

Դեպի Հայաստան տանող նոր երթուղու այն ճանապարհահատվածը, որն անցնում է Լաչինի միջանցքով, Հին շեն, Մեծ շեն, Կանաչ Թալա բնակավայրերով արդեն պատրաստ է,բայց սահմանից Կոռնիձոր տանող 11 կիլոմետրանոց ճանապարհաhատվածը դեռևս պատրաստ չէ։ Այս մասին Արցախի հանրային հեռուստատեսության հետ զրույցում հայտնել է Արցախի Հանրապետության տարածքային կառավարման և ենթակառուցվածքների նախարար Հայկ Խանումյանը ու հավելել,որ օգոստոսի 1-ին Հայաստանում տենդեր է կազմակերպվել, որի արդյունքում՝ երեք ընկերություններ կսկսեն ճանապարհահատվածի կառուցումը.

«Ենթադրվում է, որ գործող ճանապարհի փակվելուց հետո, նոր երթուղու՝ Հայաստանի սահմանից 3-4 կիլոմետրանոց գրունտային հատվածով կփորձենք միանալ մայրուղուն՝ այս կերպ ժամանակավոր լուծում տալով խնդրին՝ մինչև հայաստանյան հատվածում ճանապարհը կառուցվի»,-ասել է Խանումյանը:

Նա ընդգծել է, որ դեպի Հայաստան տանող նոր երթուղին գործելու է միջանցքի տրամաբանությամբ:Խանումյանը շեշտել է,որ
5 կիլոմետրանոց ճանապարհահատվածը ամբողջովին գտնվելու է ռուսական խաղաղապահ զորքերի հսկողության տակ, ինչպես Բերձոր- Աղավնո միջանցքի դեպքում, իսկ ադրբեջանական զորքեր կամ այլ ծառայողներ չեն լինելու:

Խանումյանը նշել է,որ այլընտրանքային ճանապարհի հարևանությամբ պետք է կառուցվեն Արցախը սնուցող մի շարք ենթակառուցվածքներ։

Նախարարի հաղորդմամբ՝ այս պահին այլընտրանքային ճանապարհի երկայնքով կապի և բարձրավոլտ գծի անցկացման նախագծման աշխատանքներ ընթանում են:

«Այնպես չէ, որ ներկայում գործող ճանապարհի դեպքում բոլոր ենթակառուցվածքներն ամբողջությամբ անվտանգ տարածքով են անցնում։ Դրանց մեծ մասը, այժմ էլ, Ադրբեջանի վերահսկողության տակ գտնվող տարածքներով է անցնում։ Հետևաբար, այս ամենը կարգավորելու համար անհրաժեշտ են որոշակի ճկունություն, բանակցություններ, ինչպես նաև ռուսական խաղաղապահ զորակազմի գործուն մասնակցությունը»,-ասել է Հայկ Խանումյանը:

Աղբյուր` Փաստինֆո