Փաստ ինֆո

Բացառում եմ, որ Ռուսաստանի և Թուրքիայի նախագահներ իրենց երեկվա հանդիպման ընթացքում ԼՂ հարցը քննարկած չլինեն: «Փաստինֆո»-ի հետ զրույցում նման տեսակետ է հայտնել ռազմական փորձագետ Հայկ Նահապետյանը:

Նշենք, որ երեկ 4 ժամ տեւած բանակցությունների արդյունքում Պուտինն ու Էրդողանը համատեղ հայտարարությամբ են հանդես եկել՝ ձեռք բերված պայմանավորվածությունների մասին, որտեղ խոսք անգամ չկար Լեռնային Ղարաբաղում ստեղծված վիճակի մասին, թեեւ մինչ այդ ՌԴ նախագահի խոսնակը հայտարարել էր, որ հանդիպման ժամանակ քննարկվելու է նաեւ Լեռնային Ղարաբաղին վերաբերող հարցեր։

Փորձագետ Հայկ Նահապետյանը, սակայն, մեզ հետ զրույցում նկատում է՝ հարցի կարևորությունն այնքան մեծ է, որ անգամ ՌԴ Անվտանգության խորհրդի նիստում է քննարկվել, ուստի եթե հարցը այդ մակարդակին է բարձրացել, ապա բացառվում է, որ հանդիպմանը քննակված չլինի Արցախի հարցը.

«Կարող եմ ենթադրել, որ քննարկում եղել է, բայց արդյունքների մասին առայժմ հրապարակային որևէ հայտարարություն չի արվում, քանի որ հայտարարությունները սովորաբար քարոզչական նպատակ ունեն, իսկ գործնական պայմանավորվածությունները կյանքի կոչելու համար են: Կարծում եմ, քննարկել են հարցեր՝ տարածաշրջանում կայունության և անվտանգության ապահովման հետ կապված և յուրաքանչյուր կողմը նոր բանավոր պարտավորություն է վերցրել՝ ապահովել տարածաշրջանում կայունություն, բայց սա հրապարակային չի ասվել, քանի որ հրապարակային հայտարարությունները կարող են խանգարել կոնկրետ գործողություններին»,-ասաց Նահապետյանը:

Փոխարենը վերջին օրերին հրապարակային դաշտ են տեղափոխվում Հայաստանի ու Ռուսաստանի միջեւ առկա տարաձայնությունները: Ինչպես հայտնել ենք` կառավարության վերջին նիստում Նիկոլ Փաշինյանը հայտարարել էր, որ Արցախում էսկալացիայի ֆոնին անհրաժեշտ է քննարկել Լեռնային Ղարաբաղում խաղաղապահ օպերացիայի մանրամասների ճշգրտումը և խաղաղապահներին ավելի լայն միջազգային մանդատով օժտել, ինչից հետո ՌԴ ԱԳ նախարար Սերգեյ Լավրովը հայտարարեց, թե Ռուսաստանը խաղաղապահ առաքելության վերաբերյալ առաջարկներ դեռ չի ստացել: Իսկ ՀՀ ԱԳՆ-ն էլ երեկ իր հերթին հայտարարությամ հանդես եկավ, որ Խաղաղապահների վերաբերյալ հայկական կողմի մտահոգությունները դեռևս 2021 թ․ գրավոր փոխանցվել են ՌԴ-ին:

Հայկ Նահապետյանը կարծում է, որ ճիշտ կլիներ, գոնե իր ճշմարտացիությունն ապացուցելու համար, ՀՀ ԱԳՆ-ն ընդհանուր գծերով ասեր՝ կոնկրետ ի՞նչ են առաջարկներ են ներկայացրել ռուսական կողմին՝ խաղապահների գործունեության հետ կապված.

« Զուտ այս հայտարարությունն առ ոչինչ է: Սա առաջին դեպքը չէ, երբ Հայաստանի կառավարության անդամները հայտարարում են բաներ, որոնք իրականության հետ աղերս չունեն, ՌԴ ԱԳ նախարարը որևէ խնդիր չուներ ասելու մի բան, որը իրականությանը չի համապատասխանում՝իմանալով, որ հայկական կողմը կարող է փաստական ապացույցներ բարել, չեմ կարծում, Լավրովը այս մանր հարցերում ստեր:

Այս կառավարության գործունեությունը ես բնութագրում եմ մի բառով՝ «կռուտիտի» քաղաքականությունը, հիմա էլ հերթական «կռուտիտն է անում», հերթական մանիպուլատիվ հնարքն է օգտագործում»,-ասաց Նահապետյանը:

Աղբյուր` Փաստինֆո