Փաստ ինֆո

Հայաստանն ակնհայտորեն այլևս չունի գերագույն գլխավոր հրամանատար և մենք ապրում ենք աննախադեպ լարված պատասխանատու ժամանակաշրջան՝ միասին։ Այս մասին լրագրողների հետ հանդիպման ընթացքում ցավով արձանագրեց «Ժառանգություն» կուսակցության նախագահ Րաֆֆի Հովհաննիսյանը։

Նրա խոսքով՝ այս շրջանում պետք է լինենք խիստ պատասխանատու, հաղթահարենք մեր ներքին բևեռվածությունը, հայհոյախոսությունը, ցավը, բաժանումները և քաղաքական նոր լուծում գտնել։

«Ստատուսները, խայթոցները կշարունակվեն, վստահ եմ, բայց այս ինքնահոսը, եթե շարունակվի այնպես, ինչպես կա, այս հրամանատարությամբ, կառավարական նիստերի միջոցով դեպի Բաքու ուղարկված ազդակներով, մեր ինքնիշխանությունը կնվազի, կդառնա զրո, մեր տարածքային ամբողջականությունը պետք է գնալով կրճատվի, որ բռնազավթված է մեր հանրապետության մի մասը, Արցախը՝ ակնհայտորեն, դրանք կօրինականացվեն, առավել ևս՝ Սյունիքը, Գեղարքունիքը, հետո՝ Տավուշ, Վայոց Ձոր, հետո՝ Արարատ։ Սա մեկ հոգու ահազանգ չէ, ես մենակ չեմ սրա մեջ»,- նշեց Հովհաննիսյանը՝ հավելելով, որ սա սրտի պոռթկում է, վերլուծություն և պետք է ազգովի գտնենք լուծումը. «Բնավ օրինաչափություն չէ՝ ինչպես ինքն էր նշել։ Օրինաչափություն չէ այն ինչ եղել է՝ հայրենիքի հանձնում, 4000 զոհեր, հետո արդեն՝ խաղաղության օրերին, որ ուղարկում ենք մեր տղաներին»։

Րաֆֆի Հովհաննիսյանի խոսքով՝ քստմնելի է, որ ՀՀ-ից վտարվում են Սփյուռքի մեր հայրենակիցները, անընդունելի է, որ իրենց քաղաքական հայացքների համար ունենք քաղաքական բանտարկյալներ, մեր ազգային շահերին նվիրված մտավորականներ, շարքային զինվորականներ։

«Դրանք Ձերն են՝ Փաշինյան, իմն են, բոլորինս են։ Մենք պայքարել ենք Ձեզ համար, երբ Դուք էիք բանտարկյալ և դրանք չպետք է այլևս երբեք լինեն։ Այն արատները, որոնք եղել են Ձեր ասած նախկինների օրոք, այսօր ևս կան և դրանք օրինաչափ չեն»,- նշեց Հովհաննիսյանը։

Րաֆֆի Հովհաննիսյանի խոսքով՝ այսօր ՀՀ-ն չունի գերագույն գլխավոր հրամանատար, ունի տապալված ղեկավար, ինչի համար ցավում է։

Հովհաննիսյանը նշեց, որ այսպես շարունակվելու դեպքում սեպտեմբերի 2-ին կունենանք հերթական հանձնումը, զոհերը, լարումները և այս իշխանության օրոք՝ կամ կունենանք ժամանակավոր, խեղված, խաբուսիկ խաղաղություն, կամ պարտադրված պատերազմ՝ բոլոր դեպքերում։

«Նրա օրոք՝ նրա փաստացի ղեկավարությամբ թե՛ խաղաղությունը, թե պատերազմը նշանակում է, որ չկա ինքնիշխան, տարածքով ամբողջական հայրենիք։ Նա դրժել է իր սահմանադրական երդումը՝ ամբողջականության, ինքնիշխանության, իր քաղաքացիների պաշտպանության»,- նշեց նա՝ հայտարարելով պայքարի նոր փուլ սկսելու մասին։

«Օգոստոսի 8-ին ես կլինեմ Հանրապետության Հրապարակում»,- նշել է  Հայաստանի նախկին արտգործնախարարը։

Աղբյուր` Փաստինֆո