Փաստ ինֆո

Ընթացիկ էսկալացիայի համար որպես պատրվակ Ադրբեջանն օգտագործում է Լաչինի միջանցքի նոր երթուղու հարցը, իբր ինքն ավարտել է նոր երթուղու կառուցման աշխատանքները և գործող միջանցքի մի շարք հատվածներ պետք է հանձնվեն իր վերահսկողությանը:

Ադրբեջանի նման հայտարարությունները և ձևակերպումները նույնպես 2020թ-ի նոյեմբերի 9-ի եռակողմ հայտարարության կոպիտ խախտում են: Կառավարության նիստին հայտարարեց Նիկոլ Փաշինյանը՝ հիշեցնելով եռակողմ հայտարարության 6-րդ կետը, որտեղ ասվում է, որ Լաչինի միջանցքով երթևեկության նոր երթուղում կառուցման պլանը պետք է որոշվի մինչև 2023թ–ի նոյեմբերի 9-ը` այդ երթուղում պաշտպանության համար ՌԴ խաղաղապահ կոնտինգենտի հետագա վերատեղաբաշխմամբ։

Նա նաև հայտարարեց, որ այս պահի դրությամբ Հայաստանի, Ադրբեջանի ու ՌԴ–ի կողմից հաստատված որևէ պլան գոյություն չունի, և Հայաստանը մի քանի անգամ առաջարկել է հաստատել եռակողմ ֆոմատով պլան.

«Ուշադրություն դարձրեք, որ հայտարարության մեջ խոսքը ոչ թե պարզապես նոր ճանապարհի կառուցման մասին է, այլ այդ կառուցման պլանի և ռուս խաղապահների վերատեղաբաշխման մասին »,– ասաց Փաշինյանը՝ հավելելով, որ Հայաստանը որևէ պլանի հավանություն չի տվել, քանի որ այն Հայաստանին չի էլ ներկայացվել։

Փաշինյանը նաև հայտնեց, որ Հայաստանն արդեն սկսել է Կոռնիձոր– Տեղ Մ-12 մայրուղու վերակառուցումը, որը պետք է միանա Լաչինի միջանցքի նոր երթուղուն։

Նրա խոսքով՝ պլանը միայն ճանապարհին չի վերաբերելու, այլ ԼՂ–ին էլեկտրաէներգիայի, գազի մատակարարման, անվտանգության հետ կապված խնդիրներին։

Աղբյուր` Փաստինֆո