Փաստ ինֆո

Բաքուն, շատ լավ հասկանալով, որ Հայաստանում իշխանության են իրենց կամակատարները, լկտիաբար, Թուրքիայի թողտվությամբ, փորձում է Հայաստանից ստանալ առավելագույնը՝ Բերձորը, փորձում է նաև Հայաստանի և Արցախի միջև հաղորդակցություն ապահովել մի ճանապարհով, որը ապագայում ցանկացած պահի կարող է փակվել, այս ամենից հետո նա հաղթաթուղթ կստանա՝ Զանգեզուրի միջանցքի ծրագիրն իրականացնելու համար: «Փաստինֆո»-ի հետ զրույցում նման տեակետ է հայտնել ռազմական փորձագետ Դավիթ Ջամալյանը:

Նշենք, որ օգոստոսի 1-ից թշնամին կրկին սադրանքի է դիմել Արցախում, ինչի հետևանքով հայկական կողմն ունի երկու զոհ և 19 վիրավոր:

Ըստ Ջամալյանի՝ հայկական կողմի երեկվա զոհերը հետևանք էին այն բանի, որ գործող իշխանությունը 44-օրյա պատերազմից հետո ոչինչ չի արել՝ ռադիոէլեկտրոնային պայքարի միջոցներ և ՀՕՊ միջոցներ ձեռք բերելու համար.

«Եթե նրանք համապատասխան սարքեր ձեռք բերեին ու փակեին հիմնական ուղղությունները, անօդաչու սարքերը չէին թռնի, ամսի 1-ին էլ էր բախում եղել, բայց մենք մի վիրավոր ենք ունեցել, քանի որ ԱԹՍ-ներ չեն օգտագործվել, սովորական մարտ է եղել, ադրբեջանական կողմը հետ է մղվել կորուստներով, իսկ երեկ կիրառել են ԱԹՍ-ներ, քանի որ այս իշխանությունը ոչինչ չի արել ԱԹՍ-ի դեմ պայքարելու միջոց ձեռք բերելու համար: Ենթադրելի է, որ միտումնավոր ձեռք չի բերել, քանի որ անընդունելի զիջումների գանալու համար պետք է ստեղծել պատերազմի սպառնալիք, իսկ պատերազմի սպառնալիքը որպեսզի ապացուցելի լինի, պետք են զոհեր, այս ֆոնին զիջումների գնալը հեշտ կլինի »,-ասաց փորձագետը:

Նրա դիտարկմամբ՝ բացի Հայաստանի վրա ճնշում գործադրելուց՝ Թուրքիայի և Ռուսաստանի նախագահների հանդիպումից առաջ, Թուրքիայի նախագահի դրդմամբ, Ադրբեջանը շանտաժ է անում Ռուսաստանին, հարվածում է Ռուսաստանի հեղինակությանը՝ իբրև խաղաղապահ առաքելություն իրականացնող երկիր և փակուղու առջև է նրան կանգնեցնում՝ փորձելով պատեհ պահը օգտագործել և շահել առավելագույնը:

Դավիթ Ջամալյանը շեշտում է՝ պետք է հնարավորինս ձգձգել Բերձորի հանձնումը, այնքան ժամանակ, քանի դեռ ռուսական կողմն իր հարցերը չի լուծել ուկրաինական ճակատում և չի ուղղել իր ուշադրությունը Հարավային Կովկասին:

Կառավարության այսօրվա նիստում Նիկոլ Փաշինյանը հայտարարել էր՝ Եթե ՌԴ խաղաղապահ զորախումբը և Ադրբեջանը երաշխավորեն շփման գծի անձեռնմխելությունը, ապա Արցախի ՊԲ-ն մարտական հերթապահություն իրականացնելու անհրաժեշտություն չի ունենա:

Դավիթ Ջամալյանը, անդրադառնալով Նիկոլ Փաշինյանի այս հայտարարությանը, ընդգծում է՝ Արցախ ՊԲ-ի հետ կապված հարցերը Նիկոլ Փաշինյանը չպետք է որոշի, Արցախը պետք է սուբյեկտայնություն ցուցաբերի.

«Արցախը պետք է իր հատուկ խոսքն ասի, ՊԲ-ի հետ որևէ գործառույթ ՀՀ կառավարությունը չի որոշում: Եթե ժամկետայիններին դուրս է բերում, ձեռքերը լվանում է Արցախից, այսքանից հետո ի՞նչ բարոյական կամ իրավական իրավունք ունի Արցախի ՊԲ-ի ֆունկցիաների հետ կապված պահանջ ներկայացնի: Եթե Հայաստանի գրանցում ունեցող ժամկետայինի դուրսբերումը Արցախից որպես փոխզիջում լիներ, և սա արվեր այն բանի դիմաց, որ Ադրբեջանն էլ Բերձորի հանձնումից հրաժարվեր, ինչ-որ տեղ հասկանալի կլիներ, այսինքն՝ մենք մեր ՀՀ քաղաքացիություն ունեցողներին դուրս ենք բերում Արցախից, փոխարենը՝ Ադրբեջանը հրաժարվում է Բերձորը վերցնելու մտադրությունից, այս իրավիճակում ընկալելի փոխզիջում կլիներ: Բայց սա արվում է ադրբեջանական ճնշման տակ, սա նախօրոք ծրագրված կապիտուլյացիոն սցենարի հերթական արարն է, պարզապես արվում է դիմադրության իմիտացիա ստեղծելու համար: Իրենք իմիտացիա են ստեղծում, թե դիմադրում են Բերձորի հանձնմանը, բայց սա արվում է բնակչության ուշադրությունը բթացնելու և ընդվզումը կանխելու համար, իրականում՝ ամեն ինչ գնում է Բերձորը հանձնելուն, պարզապես կա ռուսական և Արցախի դիմադրություն»,-ասաց Դավիթ Ջամալյանը:

Աղբյուր` Փաստինֆո