Փաստ ինֆո

Մարտիրոսյան Մնացի տեսքով օրինական դատարան չունենք։ Ափսոսում եմ, որ պետությունը հնարավորություն է ընձեռել Մարտիրոսյանին կրել պատմուճան, նա ինձ համար այնտեղ նստած՝ ուղղակի ֆիզիկական միավոր է։ Այս մասին լրագրողների հետ զրույցում ասաց ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի պաշտպան Էրիկ Ալեքսանյանը։

Ինչպես արդեն տեղեկացրել ենք՝ դատավոր Մնացական Մարտիրոսյանն այսօր որոշել է առանց քննության թողնել Աղվան Հովսեփյանի նկատմամբ ընտրված խափանման միջոց կալանավորումը գրավով փոխարինելու մասին միջնորդությունը, ինչից հետո պաշտպաններն ինքնաբացարկի միջնորդություն են ներկայացրել, պաշտպան Էրիկ Ալեքսանյանը լքել է դատական նիստերի դահլիճը՝ ի նշան բողոքի։

Փաստաբան Էրիկ Ալեքսանյանը լրագրողների հետ զրույցում արձանագրեց, որ շարունակելու է իրականացնել Աղվան Հովսեփյանի պաշտպանությունը, այսօր իր կողմից արված գործողությունը չի նշանակում, որ դադարեցնելու է կատարել պաշտպանությունը, բոլորովին դա չի նշանակում։

«Եվս մեկ անգամ տեսանք պարոն Մարտիրոսյանի ապօրինի գործողությունները, կայացրած ակնհայտ ապօրինի արձանագրային որոշումը։ Չգիտեմ՝ պարոն Մարտիրոսյանն այս միջնորդության հարցն ում հետ է քննարկել, քննարկել է Աննա Վարդապետյանի հետ, Նալբանդյանում գտնվող շեքում համապատասխան ներկայացուցիչների հետ, չգիտեմ ում հետ է քննարկում, չեմ բացառում, որ որևէ մեկի հետ քննարկած լինի։ Գտնում եմ, որ այս որոշման տեսակը պատահական չէր, որովհետև եթե պարոն Մարտիրոսյանը քննարկեր և մերժեր մեր միջնորդությունը, ապա պարզ տրամաբանությունը հուշում է, որ այդ որոշումը վերաքննության կարգով այն չէր ապրի։ Իրականում ներկայացրել ենք ծանրակշիռ փաստեր առ այն, որ պարոն Հովսեփյանի՝ հետագա կալանքի տակ գտնվելը ոչ միայն իրավաչափ չէր, այլև՝ ստեղծում է ծանր վտանգներ։ Դրանով է պայմանավորված, որ քաղաքական իշխանությունը փորձել է նման ձևով լուծում տալ, որ պաշտպանության կողմը հնարավորություն չունենա նաև բողոքարկելու որոշումը»,-նշեց Ալեքսանյանը՝ հավելելով. «Մարտիրոսյան Մնացը մնում է Մարտիրոսյան Մնաց»։

Փաստաբանի խոսքով՝ ի սկզբանե գործով մակագրությունն այնպես էր իրականացվել, որ գործը քննի Մնացական Մարտիրոսյանը։

«Պարոն Մարտիրոսյանը թող Աստծուց վախենա, ամեն ինչ հավերժ չէ։ Նույնը՝ Ջհանգիրյանի հետ կապված, ճակատագիրը տեսանք, հազար անգամ ասում էին՝ պարոն Ջհանգիրյան ոչինչ հավերժ չէ, մի օր կարժանանաք շատ վատ ճակատագրի, արժանացավ՝ խայտառակ ձևով։ Այդ ճակատագրին վաղ թե ուշ կարժանանա նաև Մարտիրոսյանը»,- ընդգծեց փաստաբանը։

Աղբյուր` Փաստինֆո