Փաստ ինֆո

Ես կալանքից չեմ վախենում, ինձ դա ընդհանրապես չի անհանգստացնում, ես ուրիշ բանից եմ զարմանում՝ինչո՞ւ երեք ամիս, ցմահ տվեք, ցմահ տվեք, բերանս էլ՝ կապար լցրեք, որ ես այնտեղ սատկեմ, մեռնեմ, Դուք էլ՝ գործից պրծնեք։ Նման հայտարարությամբ է հանդես եկել Ավետիք Չալաբյանը՝ առարկություններ ներկայացնելով դատավոր Մնացական Մարտիրոսյանի գործողությունների դեմ՝ իրեն երեք ամսով կալանավորելու որոշում կայացնելու վերաբերյալ։

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, որոշել է երեք ամսով կալանավորել Ավետիք Չալաբյանին, թեև անգամ հանրային մեղադրողն էր առաջարկել Չալաբյանի նկատմամբ որպես խափանման միջոց կիրառել գրավը։

Չալաբյանը առարկություններ ներկայացրեց դատարանի գործողությունների դեմ՝ հայտարարելով, որ դատավորն օրենքից վեր չէ. «Դուք այստեղ որոշումներ եք կայացնում, կարծես Ձեզ համար օրենք չկա, կարող եք ցանկացած որոշում ընդունել՝ արհամարհելով քրեական դատավարական օրենսգիրքը։ Ակնհայտ է, որ եկել եք այստեղ՝ այդ որոշումը կայացնելու, ոչ հանրային մեղադրողի կարծիքը, ոչ մեր ներկայացված փաստարկներն արժեք չունեն, ինչպես՝ օրենքը։ Ինչը Ձեզ համար արժեք ունի, որ գնում եք տուն՝ քնելու, ինչն է Ձեզ մոտիվացնում, օրենքին ծառայե՞լը։ Ի՞նչ բարձրագույն նպատակի եք ծառայում, օրենքի՞ն, բա ինչու եք շրջանցում օրենքը, ինչն է շարժում։ 2.5 ամիս կալանքի տակ եմ եղել, այսօր դատական նիստի գալիս բոլոր իրերս հավաքել, տվել եմ կնոջս, ասել՝ Մնացական Մարտիրոսյանն այսօր ինձ կալանավորելու է, բոլորն ասել են՝ բացառվում է, հիմք չկա, ասել եմ՝ Մնացական Մարտիրոսյանին պետք չէ իրավական հիմք, պետք է հրահանգ, այդ հրահանգը ցանկացած հիմքից բարձր է։ Նա այդ հրահանգը ստացել է և ինձ կալանավորելու է այսօր, ես կալանքից չեմ վախենում, ինձ դա ընդհանրապես չի անհանգստացնում, ես ուրիշ բանից եմ զարմանում՝ ինչո՞ւ երեք ամիս, ցմահ տվեք, ցմահ տվեք, բերանս էլ՝ կապար լցրեք, որ ես այնտեղ սատկեմ, մեռնեմ պրծնեմ, դուք էլ՝ գործից պրծնեք։ Դուք Ձեզ օրենքից վեր եք դասում, բայց դա օրենքը թույլ չի տալիս, վաղ թե ուշ այս երկրում օրենքը վերականգնվելու է, իմ պայքարը նաև դրա համար է, որ օրենքը վերականգնվի, այս դատալսումները օրենքով լինեն։ Հիշեք, երբ օրենքը վերականգնվի, այսօրվանից սպասեք այդ օրվան, այդ օրենքը Ձեր հետևից գալու է»։

Դատական նիստն ընդմիջվել է՝ մինչև 16.30-ը, կքննարկվի հետազոտման ենթակա ապացույցների ծավալի հարցը։

Հիշեցնենք, որ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում հարուցվել է քրեական գործ՝ ընդդիմության հավաքներին Հայաստանի ազգային ագրարային համալսարանի ուսանողների մասնակցության դիմաց նույն համալսարանի ուսանողական խորհրդի նախագահին նյութապես շահագրգռելու դեպքի առթիվ: Ենթադրյալ դեպքի վերաբերյալ 2022 թվականի մայիսի 9-ին լրատվական կայքերից մեկում ձայնագրություն է հրապարակվել՝ «1000 դրամ յուրաքանչյուր ուսանողի համար, Ագրարային համալսարանի դասախոսը դրդում է ուսխորհրդի նախագահին գումարի դիմաց կազմակերպել, որպեսզի ուսանողները մասնակցեն ընդդիմության հավաքներին՝ յուրաքանչյուր ուսանողի դիմաց առաջարկելով 1000 դրամ» վերտառությամբ:

Ըստ նախաքննական մարմնի՝ քաղաքական ընդդիմության կողմից կազմակերպվող հավաքներին մասնակցելու և որոշակի գործողություններ կատարելու դիմաց Հայաստանի ազգային ագրարային համալսարանի ուսանողական խորհրդի նախագահին նյութապես շահագրգռել են՝ առաջարկելով երկու հազար ուսանողի հավաքներին ներգրավելու դիմաց տրամադրել 2.000.000 ՀՀ դրամ գումար:

Հուլիսի 6-ին ՔԿ-ն հաղորդագրություն տարածեց՝ նախաքննության ավարտ հայտարարելու մասին, սակայն դատախազը չէր հաստատել մեղադրական եզրակացությունը և գործի նյութերը վերադարձրել նախաքննական մարմին՝ նախաքննությունը շարունակելու ցուցումով, մասնավորապես, անհրաժեշտ էր առաջադրված մեղադրանքը համապատասխանեցնել ՀՀ քրեական նոր օրենսգրքին: Դատախազի ցուցումը արագ քննիչն իրականացրել է ու մինչ գործը կուղարկվեր դատարան հապճեպ միջնորդել է երկարացնել Ավետիք Չալաբյանի կալանավորման ժամկետը, որը դատարանը բավարարել է՝ կալանավորման ժամկետը երկարացնելով 15 օրով։

Հեղինակ՝ Իզաբել Սահակյան

Աղբյուր` Փաստինֆո