Փաստ ինֆո

Հասարակական-քաղաքական գործիչ Ավետիք Չալաբյանը կրկին կկալանավորվի։ «Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, ընթացող դատական լսումների ընթացքում քննարկման առարկա է դարձվել Ավետիք Չալաբյանի խափանման միջոցի հարցը։ Հանրային մեղադրողը միջնորդել է Ավետիք Չալաբյանի նկատմամբ որպես խափանման միջոց կիրառել գրավը։ Պաշտպան Արմեն Անդրիկյանն էլ արձանագրեց՝ Ավետիք Չալաբյանը ազատության մեջ գտնվելով պատշաճ վարքագիծ է ցուցաբերել, ուստի խնդրում են Ավետիք Չալաբյանի նկատմամբ առհասարակ որևէ խափանման միջոց չկիրառել։

Թեև նույնիսկ հանրային մեղադրողը՝ դատախազը, միջնորդել էր գրավ կիրառել Չալաբյանի նկատմամբ. նախագահող Մնացական Մարտիրոսյանը որոշեց երեք ամսով կալանավորել նրան՝ գտնելով, թե կարող է հիմնավորված համարվել, որ մեղադրյալ Ավետիք Չալաբյանը ենթադրաբար կարող է կատարած լինել իրեն մեղսագրված հանրորեն վտանգավոր արարքը և կարող է առնչություն ունենալ դեպքին, այսինքն՝ առկա է հիմնավոր կասկած՝ մեղադրյալի կողմից իրեն մեղսագրվող հանրային վտանգավոր արարքը ենթադրաբար կատարելու վերաբերյալ, միևնույն ժամանակ, դատարանն արձանագրել է, որ բարձր է հավանականությունը, որ մեղադրյալը ազատության մեջ գտնվելով կարող է խախտել գործի քննությանը չխոչընդոտելու պարտավորությունը, ուստի, առկա է մեղադրյալի նկատմամբ խափանման միջոց կալանք կիրառելու իրավաչափ պայմաններ։ Դատարանը որոշեց կալանք կիրառել՝ երեք ամիս ժամկետով։

Հիշեցնենք, որ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում հարուցվել է քրեական գործ՝ ընդդիմության հավաքներին Հայաստանի ազգային ագրարային համալսարանի ուսանողների մասնակցության դիմաց նույն համալսարանի ուսանողական խորհրդի նախագահին նյութապես շահագրգռելու դեպքի առթիվ: Ենթադրյալ դեպքի վերաբերյալ 2022 թվականի մայիսի 9-ին լրատվական կայքերից մեկում ձայնագրություն է հրապարակվել՝ «1000 դրամ յուրաքանչյուր ուսանողի համար, Ագրարային համալսարանի դասախոսը դրդում է ուսխորհրդի նախագահին գումարի դիմաց կազմակերպել, որպեսզի ուսանողները մասնակցեն ընդդիմության հավաքներին՝ յուրաքանչյուր ուսանողի դիմաց առաջարկելով 1000 դրամ» վերտառությամբ:

Ըստ նախաքննական մարմնի՝ քաղաքական ընդդիմության կողմից կազմակերպվող հավաքներին մասնակցելու և որոշակի գործողություններ կատարելու դիմաց Հայաստանի ազգային ագրարային համալսարանի ուսանողական խորհրդի նախագահին նյութապես շահագրգռել են՝ առաջարկելով երկու հազար ուսանողի հավաքներին ներգրավելու դիմաց տրամադրել 2.000.000 ՀՀ դրամ գումար:

Հուլիսի 6-ին ՔԿ-ն հաղորդագրություն տարածեց՝ նախաքննության ավարտ հայտարարելու մասին, սակայն դատախազը չէր հաստատել մեղադրական եզրակացությունը և գործի նյութերը վերադարձրել նախաքննական մարմին՝ նախաքննությունը շարունակելու ցուցումով, մասնավորապես, անհրաժեշտ էր առաջադրված մեղադրանքը համապատասխանեցնել ՀՀ քրեական նոր օրենսգրքին: Դատախազի ցուցումը արագ քննիչն իրականացրել է ու մինչ գործը կուղարկվեր դատարան հապճեպ միջնորդել է երկարացնել Ավետիք Չալաբյանի կալանավորման ժամկետը, որը դատարանը բավարարել է՝ կալանավորման ժամկետը երկարացնելով 15 օրով։

Հեղինակ՝ Իզաբել Սահակյան

Աղբյուր` Փաստինֆո