Փաստ ինֆո

Ադրբեջանը սադրանքներով ու շանտաժով ամեն ինչ անում է, որ Հայաստանն Արցախին կապող միջանցքը փոխարինվի ճանապարհով։ Դա շատ ծանր հետևանքներ է ունենալու։ Ավելի լավ է երթևեկենք կիսաքանդ, քարքարոտ միջանցքով, քան՝ միջազգային ստանդարտներին համապատասխանող ճանապարհով։ «Փաստինֆո»-ի հետ զրույցում նման մտահոգություն հայտնեց Արցախի «Արդարություն» խմբակցության ղեկավար Դավիթ Գալստյանը։

«Մենք տեսնում ենք, թե Ադրբեջանն ինչպես է պայքարում Հայաստանի տարածքով միջանցք ստանալու համար։ Ուղղակի ճանապարհ չի ուզում, այլ՝ միջանցք։ Իսկ մենք մեր իսկ ունեցած միջանցքը պահելու համար բավարար ջանքեր չենք գործադրում։ Պետք է ամեն կերպ պայքարել՝ գոնե Արցախը Հայաստանին կապող միջանցքը պահելու համար։ Ադրբեջանը ցանկացած սադրանքի գնում է՝ իր պահանջները բավարարելու նպատակով։ Իսկ իշխանություններն այնքան ապիկար են, որ չեն կարողանում նոյեմբերի 9-ի փաստաթղթում ամրագրված կետին պահանջատեր լինել։ Այդ փաստաթղթի 6-րդ կետի համաձայն՝ նոր երթուղու համար սահմանված է երեք տարի ժամկետ, իսկ դեռ երկու տարին չլրացած՝ ինչ-որ պահանջներ են դնում ադրբեջանցիները և հրամցնում մի ճանապարհ, որը նույնպես նոյեմբերի 9-ին ստորագրված եռակողմ համաձայնագրի պահանջի խախտում է. կառուցվող այդ այլընտրանքային կոչվող ճանապարհը չի անցնում Լաչինի միջանցքով»,-ասում է Գալստյանը։

Արցախի Աժ պատգմավորն ուշադրություն է հրավիրում այն փաստի վրա, որ եռակողմ համաձայնագրի մեջ սևը սպիտակի վրա գրված է՝ նոր երթուղին պետք է կառուցվի Լաչինի միջանցքով և որևէ խոսք չկա այն մասին, որ այլ կոորդինատներով ինչ-որ ճանապարհ պետք է փոխարինի միջանցքին։

Արձանագրելով Գորիս-Կապան ճանապարհի հետ կապված արդեն իսկ ունեցած դառը փորձը՝ Գալստյանը կանխատեսում է, որ ադրբեջանական շանտաժին տեղի տալու դեպքում նույն ճակատագրին է արժանանալու նաև միջանցքի փոխարեն ադրբեջանական կողմից պարտադրվող այլընտրանքային ճանապարհը։

«Եթե պատերազմից դասեր չենք քաղել, ապա գոնե Գորիս-Կապան ճանապարհի հետ տեղի ունեցածից պետք է հետևություններ արած լինեինք։ Պարտված իշխանություններին բնորոշ է տեղի տալ շանտաժին, բայց իշխանությունները պարտավոր են ապահովել ժողովրդի անվտանգությունը։ Եթե չեն կարողանում դա անել, պետք է անկեղծություն ու համարձակություն ունենան, հայտարարեն, որ հեռանում են, որպեսզի կարող ուժերը գան ու փորձեն ելքեր գտնել ստեղծված իրավիճակից»,-նշում է Գալստյանն ու հավելում, որ միայն իշխանություններն են մանրամասն տիրապետում իրավիճակին, հետևաբար և՝ հնարավորինս քիչ կորուստերով ելքեր փնտրելու հնարավորություն մյուս ուժերը չունեն։

Գալստյանի խոսքով՝ հայկական երկու պետությունների ներկա իշխանությունների ձեռնարկած քայլերը ոչ միայն բավարար չեն որևէ հայանպաստ որոշում ունենալու համար, այլև պարտվողական հայտարարություններով վախի մթնոլորտ են ձևավորում նաև ազգաբնակչության մոտ, ինչն անթույլատրելի է և հղի՝ շատ վտանգավոր հետևանքներով։

Աղբյուր` Փաստինֆո