Փաստ ինֆո

2021թ օգոստոսին մարտական հենակետում երեք զինծառայողի սպանության վերաբերյալ քրեական գործն արդեն դատարանում է. այն կքննի Սյունիքի մարզի ընդհանուր իրավասության դատարանի դատավոր Մուշեղ Արամյանը։ Գործն, ամենայն հավանականությամբ, կքննվի դռնփակ։

Հիշեցնենք, որ 2021թ օգոստոսի 19-ին մարտական հենակետերից մեկում հայտնաբերվել էր երեք զինծառայողի դի՝ կյանքի հետ անհամատեղելի մարմնական վնասվածքներով։

Հարուցված քրեական գործով նախ ձերբակալվել, ապա կալանավորվել է զինծառայողների համածառայակիցը։ Օգոստոսի 23-ին պաշտոնապես հայտնի դարձավ, որ զինծառայողների սպանության գործով ձերբակալվել է նաև դիրքի ավագը՝ զինծառայողներին կյանքից զրկելուն դրդելու և ծառայակցի նկատմամբ սեքսուալ բնույթի բռնի գործողություններ կատարելու կասկածանքով, այժմ՝ դիրքի ավագին մեղսագրվում է միայն զինծառայողներին կյանքից զրկելուն դրդելը։ Մեղադրյալներն արդեն մեկ տարի է՝ կալանքի տակ են։

Նախաքննության ընթացքում, սակայն, ըստ կողմերի, պատշաճ քննություն չի իրականացվել։ Զինծառայողների սպանության մեջ մեղադրվող Ա. Հ.-ի պաշտպան Գարիկ Գալիկյանը «Փաստինֆո»-ի հետ զրույցում հայտնեց, որ մեղադրանքի հիմքում դրված է բացառապես ինքնախոստովանական ցուցմունքը, որից Ա. Հ.-ն հրաժարվել է և նշել, որ դեպքի հետ կապ չունի։

«Թե ինչու է ի սկզբանե մի քանի անգամ ինքնախոստովանական ցուցմունք տվել՝ որոշակի պատճառներ է մատնանշել, որը քննության առարկա չի դարձվել։ Ամբողջ գործում բացառապես իր ինքնախոստովանական ցուցմունքն է, ուրիշ ոչինչ»,- նշեց Գալիկյանը։

Ճշգրտող հարցին՝ ստիպե՞լ են ինքնախոստովանական ցուցմունք տալ՝ պաշտպանը նշեց. «Ոչ թե ստիպել են, այլ՝ ասել են, որ իր համար լավ կլինի այդպես»։ Նշենք, որ մեղադրյալներ Ս. Գ.-ի և Ա. Հ.-ի միջև առերես հարցաքննություններ են տեղի ունեցել, սակայն գործի վերաբերյալ այլ մանրամասներ հայտնելուց այս պահին պաշտպանը զերծ մնաց։

Նախաքննության ընթացքից դժգոհ է նաև սպանված զինծառայողներից Մուրադ Մուրադյանի ընտանիքը։ Վերջինիս իրավահաջորդի ներկայացուցիչ Հայարփի Սարգսյանը «Փաստինֆո»-ի հետ զրույցում հայտնեց, որ Մուրադյանի ընտանիքը գտնում է, որ պատշաճ քննություն չի իրականացվել։

«Հուլիսի 11-ին ծանոթացել ենք քրեական գործի նյութերին, որից ակնհայտ է դառնում, որ դեպքի իրական հանգամանքները պարզված չեն, հանցագործությունն իրականացրած անձանց շրջանակը բացահայտված չէ»,- նշեց Հայարփի Սարգսյանը՝ մտահոգություն հայտնելով առ այն, որ գործը ծածկադմփոց է արվել, և հաշվի առնելով վարույթն իրականացնող մարմնի ակնհայտ շահագրգռվածությունը սույն քրեական գործի ելքով՝ պաշտոնատար անձանց հնարավոր ներգրավման հանգամանքը չեն կարող շրջանցել։

Տուժողի իրավահաջորդի ներկայացուցչը նախաքննության ընթացքում բարձրաձայնել է նաև դատագենետիկական փորձաքննության անցկացման անհրաժեշտության մասին, միջնորդություն ներկայացրել, սակայն փորձաքննություն այդպես էլ չի նշանակվել։ Փաստաբանը հայտնեց, որ անգամ բողոք է ներկայացրել գլխավոր դատախազին, սակայն բողոքը մերժվել է իբրև անհիմն լինելու պատճառաբանությամբ, մինչդեռ, փաստաբանը նշել էր, որ ինչպես մյուս գործերով, այնպես էլ՝ այս գործով ևս անհրաժեշտ է դա իրականացնել՝ հետքերը չոչնչացնելու նպատակով։

«Անգամ մատնադրոշմային փորձաքննություն չի իրականացվել, այլ միայն՝ դատաձգաբանական»,- նշեց Սարգսյանը՝ հավելելով. «Այս պահին, քանի որ, դատագենետիկական և մատնադրոշմային փորձաքննություններ չեն իրականացվել, հնարավոր չէ ասել, թե ով որ զենքից է կրակել, բայց որ դիրքից առգրավված բոլոր զենքերից կրակոցներ արձակվել են, դա հաստատվել է, իսկ դեպքի վայրից վերցված 17 պարկուճները կրակվել են 2 տարբեր զենքերից։ Նշեմ նաև որ 20 պահեստատուփ է ուսումնասիրվել, որից պարզ դարձավ, որ մի քանի տասնյակ փամփուշտներ են պակասում, որոնց պարկուճները դեպքի վայրի զննությամբ չեն առգրավվել»։

Ի դեպ, նախաքննության ընթացքում իրականացված դատաբժշկական փորձաքննության եզրակացությամբ արձանագրվել է, որ սպանված զինծառայողները, բացի հրազենային վնասվածքներից այլ մարմնական վնասվածքներ ևս ունեցել են։

«Բողոք էի ներկայացրել սպանված զինծառայողների մարմնական ոչ հրազենային վնասվածքների առաջացման պատճառների ուղղությամբ քննություն իրականացնելու մասին, մինչդեռ պատասխանել էին, թե ժամանակավրեպ է բողոքս, քանի որ արդեն իսկ հարուցված քրեական գործով իրականացվում է համապատասխան քննություն։

Սակայն ինչպես քրեական գործի նյութերից պարզ դարձավ, ոչ մի քննություն էլ չի իրականացվել»,- ընդգծեց Սարգսյանը։

Հեղինակ՝ Իզաբել Սահակյան

Աղբյուր` Փաստինֆո