Փաստ ինֆո

Ադրբեջանը ունի ռազմավարական նպատակների փաթեթ, որը ձգտում է իրականացնել եւ այն արագացնելու համար սահմանային միջադեպերի է դիմում՝ հայկական կողմին ճնշելու համար: «Փաստինֆո»-ի հետ զրույցում նման տեսակետ է հայտնել քաղաքագետ Դավիթ Հարությունովը:

Փորձագետն արձանագրում է ՝ Ադրբեջանի առաջնային նպատակներն են՝ խաղաղության պայմանագրրի կնքում, սահմանների ճշգրտումը, կոմունիկացիների բացումը: Դավիթ Հարությունովի դիտարկմամբ՝Ադրբեջանը շատ ակտիվ ճնշումներ է գործադրում, հատկապես, Արցախից հայկական զորքերի ամբողջությամբ դուրսբերման համար.

«Ըստ երևույթին, այս դեպքում Ադրբեջանի նպատակն է, որ ցանկացած զինված ուժեր, որը կա Արցախում, զինաթափվի՝ խոսքը Արցախի ՊԲ-ի մասին է, իրենք չեն տարանջատում հայկական զինված ուժեր կամ պաշտպանության բանակ, իրենց նպատակն է, որ Արցախում որևէ զինված կառույց չլինի »,-ասաց քաղաքագետը:

Զրուցակցի խոսքով՝ Ադրբեջանի նախապայմանների մի մասը հայկական կողմն ինքն է պարտավորվել կատարել՝ նոյեմբերի եռակողմ հայտարարությամբ, սակայն այստեղ նշանակություն ունի՝ ինչպես են կողմերն ընկալում այդ պահանջների կատարումը.

«Օրինակ՝ Սյունիքով միջանցքի հետ կապված, Ադրբեջանը դա ընկալում է միջանցք, որը Երևանը չի վերահսկում, իսկ Երևանը բացառում է միջանցքային տրամաբանությունը»,-ասաց Հարությունովը:

Ըստ քաղաքագետի՝ Ադրբեջանը սադրանքների միջոցով ոչ միայն Հայաստանի վրա ճնշումներ է գործադրում, այլ նաև միջազգային հանրության.՝ Ադրբեջանը հստակ մեսիջ է տալիս միջազգային հանրությանը, որ պատրաստ են լարել իրավիճակը, եթե Հայաստանին չպարտադրվի այն պահանջները, որոնք իրենք են ցանկանում:

Դավիթ Հարությունովը նաև նկատում է, որ Ադրբեջանը իր գործողությունները մշտապես գլոբալ լարվածությամբ է պայմանավորում.

«Փառուխի դեպքերը եղան ուկրաինական ճգնաժամի սկսվելուց հետո, հիմա էլ աշխարհը զբաղված է Չինաստանում և ԱՄՆ-ում ստեղծված իրավիճակով, հայկական կողմը պետք է նկատի ունենա, եթե առկա է գլոբալ լարվածություն, ռիսկերը մեծանում են»,-ասաց նա:

Ինչ վերաբերվում է այս ֆոնին հայկական կողմից հնչող «խաղաղության կոչերին»՝ քաղաքագետը նկատում ՝ադրբեջանական կողմը չի ձգտում խաղաղության, իրենք ձգտում են Հայաստանը ենթարկեցնել իրենց, որպեսզի, լավագույն դեպքում Հայաստանը լինի կրտսեր գործընկերը այս տարածաշրջանում.

«Սա ռիսկեր է պարունակում, քանի որ երաշխիք չկա, որ եթե իրենց այս նպատակին հասնեն, այդքանով կսահմանափակվեն, կարճ ժամանակահատվածում կարող է խաղաղություն լինել, բայց գլոբալ առումով Թուրքիան և Ադրբեջանը չեն ձգտում խաղաղության, իրենք ձգտում են գերիշխել տարածաշրջանում»,-ասաց Հարությունովը:

Աղբյուր` Փաստինֆո