Փաստ ինֆո

«Դիմադրության» շարժման հանրահավաքի ժամանակ Իշխան Սաղաթելյանը ներկայացրեց շարժման նպատակները և խնդիրները:

Սաղաթելյանի խոսքով՝ առաջին նպատակն է կանխել կենսական զիջումներ պարտադրող կապիտուլյացիոն նոր պայամանգրի ընդունումը՝ բացառելով առանց ժողովրդի անմիջական մասնակցության որևէ համաձայնության կայացում.

«Նիկոլ Փաշինյանը հայ ժողովրդի անունից բանակցություններ վարելու մանդատ չունի»,-ասաց նա:

Հաջորդ նպատակն է համաժողովրդական անհնազանդության շարժման միջոցով հասնել Նիկոլ Փաշինյանի հեռացմանը՝ հրաժարականի կամ պաշտոնանկության միջոցով.

«Պայքարը այս երկու ուղղություններով պետք է ընթանա և լինի փոխլրացնող»,-ասաց Սաղաթելյանը:

Նա շեշտեց, որ եթե գնան պաշտոնանկության ճանապարհով, ապա անհրաժեշտ է լինելու բավարարել օրենքով նախատեսված երկու պահանջ՝պաշտոնանկության իրավական- քաղաքական հիմքեր և ժողովրդի կողմից պետք է առաջադրվի վարչապետի թեկնածու.

«Նիկոլի հեռացման իրավական-քաղաքական հիմքերն ամբողջությամբ ձևակերպված են, իսկ ինչ վերաբերվում է ժողովրդի կողմից վարչապետի միասնական թեկնածու առաջադրելու հարցին, ապա դա որոշելու ենք միասին՝ այս հարթակից»,-ասաց Սաղաթելյանը:

Նա նաև շեշտեց, որ խորհրդարանում պաշտոնանկության գործընթաց կսկսեն այն ժամանակ, երբ հաջողության հասնելու համար հիմքեր լինեն.

«Նիկոլի հեռացման երկու ճանապարհ գոյություն ունի՝ մեկը համաժողովրդական ճնշման տակ հասնել նրա հրաժարականին, երկրորդ ՝խորհրդարանի միջոցով հասնել պաշտոնանկության, այս երկու ճանապարհներն էլ մեզ համար ընդունելի են»,-ասաց Սաղաթելյանը:

Աղբյուր` Փաստինֆո