Փաստ ինֆո

Վերջին օրերին Արցախի բռնազավթված տարածքներում դիրքավորված ադրբեջանական ստորաբաժանումների կողմից կրկնվող սադրանքները՝ մասնավորապես Կարմիր Շուկայի, Թաղավարդի, Տոնաշենի հատվածում տեղակայված ՊԲ մարտական դիրքերի ուղղությամբ կրակահերթերը, ամենայն հավանականությամբ, նպատակ ունեն հասարակության շրջանում վախի մթնոլորտ ձևավորելով՝ ստիպել հրաժարվել Բերձորի միջանցքից։

«Փաստինֆո»-ի հետ զրույցում նման համոզմունք հայտնեց Արցախի ԱԺ պատգամավոր Դավիթ Գալստյանը։

«Տարբեր քաղաքական ուժերի ու գործիչների կողմից հայտարարություններ են արվել և արվում, որ Բերձորի միջանցքը չի կարելի փոխարինել այլընտրանքային ճանապարհով, որը առաջարկվում է՝ առաջին հերթին այն հիմնավորմամբ, որ դա նոյեմբերի 9-ի եռակողմ համաձայնագրի 6-րդ կետից շեղում է։ Այդ համաձայնագրի բնօրինակում նշված է, որ ճանապարհը պետք է կառուցվի «Լաչինի միջանցքով» և ոչ թե երկայնքով, ինչպես հայերեն տարբերակում է նշվել։ Որպեսզի այդ հարցն իրենց ոչ ձեռնտու ուղով չընթանա, Ադրբեջանը նման սադրանքներով փորձում է վախի մթնոլորտ ձևավորել և թույլ չտալ, որ իրադարձությունները զարգանան իր համար անցանկալի ձևով»,-ասում է Գալստյանը։

Եռակողմ համաձայնագրի հայերեն տարբերակում «երկայնքով» բառի ավելացումը, որը, ըստ էության, համաձայնագրի խմբագրում է՝ արված ոչ հայանպաստ դիրքերից, մեր զրուցակցի խոսքով՝ հիմք է տալիս մտածելու, որ Հայաստանի և Ադրբեջանի իշխանությունների միջև այդ հարցի շուրջ եղել է գաղտնի, հանցավոր պայմանավորվածություն։

«Մի կողմից ՀՀ և Արցախի իշխանությունների այն պնդումները, թե այդ այլընտրանքային ճանապարհը, իբր, ավելի անվտանգ է լինելու, մյուս կողմից էլ իշխանամետ տարբեր խոսափողներով տարածվող այն թեզերը, թե ինքնաձիգով բայրաքթա՞ր ենք որսալու, ըստ երևույթին՝ Ադրբեջանի իրենց գործընկերներն օգտագործում են, որ վախ սերմանեն արցախահայության մոտ և թույլ չտան ժողովուրդը ըմբոստանա։ Ինչպես տեսնում ենք, անկախ ամեն ինչից, Ադրբեջանը պարբերաբար սադրում է, և այստեղ հարց է առաջանում՝ եթե վաղը Ադրբեջանն ասի Ստեփանակերտի գլխին պետք է ծածանվի Ադրբեջանի դրոշը, այդ ժամանակ է՞լ են ասելու՝«ինքնաձիգով բայրաքթա՞ր ենք որսալու», թե՞ գործուն քայլեր են անելու, պահանջատեր են լինելու իշխանությունները, որ արցախահայությունն անվտանգ ապրի իր հողում»,-նշում է Արցախի ԱԺ ընդդիմադիր պատգամավորը։

Դավիթ Գալստյան շեշտում է՝ Արցախի իշխանությունները, որոնք սերտ կապերի մեջ են ռուսական խաղաղապահ զորախմբի հետ, պետք է հետամուտ լինեն, որպեսզի ադրբեջանական կողմի սադրանքներն ու նախահարձակ գործողություններն անհապաղ համապատասխան արձագանք ստանան և կանխվի հետագայում դրանց կրկնությունը։

Աղբյուր` Փաստինֆո