Փաստ ինֆո

Այս դեպքում ընդհանրապես գործ չունենք օրենքի հիման վրա ստեղծված դատարանի հետ, հետեւաբար ամբողջ պրոցեսը կլինի անօրինական,- լրագրողների հետ զրույցում հայտարարել է ՀՀ նախկին գլխավոր դատախազ Աղվան Հովսեփյանի փաստաբան Երեմ Սարգսյանը։

«Փաստինֆո»-ի հաղորդմամբ՝ պաշտպաններն այսօր ինքնաբացարկի միջնորդություն են ներկայացրել ՀՀ վերաքննիչ քրեական դատարանի դատավոր Ռուբիկ Մխիթարյանին։

Ինչպես արդեն տեղեկացրել ենք՝ Աղվան Հովսեփյանի և Վրեժ Մարկոսյանի գործով դատաքննության՝ նախապատրաստման փուլում պաշտպանության կողմը միջնորդել էր գրավ կիրառել Հովսեփյանի նկատմամբ, ինչը Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, մերժել էր՝ անփոփոխ թողնելով Աղվան Հովսեփյանի կալանավորումը։

Պաշտպանները վերաքննիչ բողոք են ներկայացրել՝ պահանջելով բեկանել առաջին ատյանի դատարանի որոշումը և Աղվան Հովսեփյանի նկատմամբ որպես խափանման միջոց կիրառել գրավը։ Այն, օրենքով սահմանված կարգով, էլեկտրոնային եղանակով մակագրվել է Վերաքննիչ քրեական դատարանի դատավոր Արշակ Վարդանյանին։ Սակայն մակագրումն ավելի ուշ անհետացել է «Դատալեքս» դատական տեղեկատվական համակարգից ու վերաքննիչ քրեական դատարանի նախագահ Տիգրան Սահակյանի ձեռամբ վերամակագրվել  Ռուբիկ Մխիթարյանին։

 «Շատ ակնհայտ է, որ, այո, սա միտումնավոր է, չի բացառվում նույնիսկ ԲԴԽ-ն հատուկ որոշում կայացրած լինի։ Ողջ իրավական հանրությունը, դատախազությունը, ԲԴԽ-ն ասում են, որ շատ կարեւոր է մակագրման համակարգը եւ ամեն ինչ արվում է, որպեսզի վերականգնվի այն։  Արդեն վերականգնվել է,  լավ, բայց հետո մտածեցին՝ ինչպես անեն, որ կալանքների գործերը, որոնք դատարանների վարույթում են, դարձյալ իրենց հսկողության տակ լինեն։ Համակարգիչը, օրենքով սահմանված կարգով, մակագրում է Արշակ Վարդանյանին։ Որոշում են, որ գործը չեն տա Վարդանյանին, մի նոր մակագրություն է դնում դատարանի նախագահը եւ ասում՝ չէ, այս գործը պետք է քննի Ռուբիկ Մխիթարյանը։ Մենք ասում ենք, որ օրենքն ասում է, որ դատարանի նախագահի կողմից միայն բացառիկ դեպքերում կարող է ձեռքով մակագրվել, եթե անհաղթահարելի ուժ կա, բայց ուր է այդ անհաղթահարելի ի ուժը, եթե համակարգը մակագրել է։  Ի՞նչն էր խանգարում, որ մակագրության դատավորը քններ։ Խանգարում էր, որովհետեւ պետք է քններ իրենց նախընտրած անձը»,- լրագրողների հետ զրույցում ասել է Երեմ Սարգսյանը։

Նրա արձանագրմամբ՝ Ռուբիկ Մխիթարյանի նախագահությամբ դատարանը, օրենքի հիման վրա ստեղծված դատարան չէ, հետեւաբար դատարանը պետք է ինքնաբացարկ հայտնի։ «Չնայած վստահ եմ, որ չի հայտնի, որովհետեւ ինքն էլ որոշումը վարույթ է ընդունել։ Մենք գտնում ենք, որ այս դեպքում ընդհանրապես գործ չունենք օրենքի հիման վրա ստեղծված դատարանի հետ, հետեւաբար ամբողջ պրոցեսը կլինի անօրինական»,- նշել է նա։

Մանրամասները՝ տեսանյութում

Աղբյուր` Փաստինֆո