Փաստ ինֆո

2020 թվականի նոյեմբերի 9-ից հետո Նիկոլ Փաշինյանի հետ աշխատել շարունակող դեսպանները հայ ժողովրդի թշնամիններն են։ Նման հայտարարությամբ է հանդես եկել Լեհաստանում ՀՀ նախկին դեսպան Էդգար Ղազարյանը։ Նրա արձանագրմամբ՝ դեսպանները շատ լավ գիտեն, թե ինչ քաղաքականություն է վարում Նիկոլ Փաշինյանը ու եթե պատրաստ են ներկայացնել նրա քաղաքականությունը, նշանակում է, որ համակարծիք են։

Նա հիշեցրեց Նիկոլ Փաշինյանի 2018 թվականի խոսքերը, որ պետք է վերանայվի ոչ կադրային դեսպանների ու գլխավոր հյուպատոսների նշանակման ավանդույթը, մինչդեռ նրա պաշտոնավարման օրոք դա ավելի մեծ զարգացում է ստացել։ Ավելին, որոշ դեսպանների պարտականությունն է դարձել Աննա Հակոբյանին գնումների ուղեկցելը։ Որպես օրինակ Էդգար Ղազարյանը մատնանշել է Ֆրանսիայի դեսպանին՝ Հասմիկ Տոլմաջյանին, որի անվան հետ են կապվում մի շարք սկանդալային դեպքեր

«2020թ. նա նաեւ դեսպան է նշանակվել Մոնակոյում։ Իսկ 2018թ. իր հավատարմագրերը դեռ Ֆրանսիայի նախագահին չհանձնած, նույն թվականի հուլիսի 11-ին Նիկոլ Փաշինյանի կողմից հրավիրվում է Բրյուսել եւ այնտեղ՝ ՆԱՏՕ-ի գրասենյակում, ներկա է լինում Էմանուել Մակրոնի եւ Նիկոլ Փաշինյանի հանդիպմանը որպես թարգմանչուհի։ Նման սկանդալ համաշխարհային դիվանագիտության պատմության մեջ երեւի գոյություն չունի։ Դիվանագիտության մեջ արարողակարգային շատ նուրբ բան գոյություն ունի։ Դեսպանը երկրի նախագահի հետ իր առաջին հանդիպումը պետք է ունենա հավատարմագիրը հանձնելու ժամանակ։ Եվ քան դեռ դա չի արվել, դեսպանը որեւէ միջոցառման մասնակցելու իրավունք չունի»,- պարզաբանել է Ղազարյան հավելելով, որ սա խայտառակություն է, որն արվում է դիվանագիտության հայրենիք համարվող Ֆրանսիայի հանդեպ։

«Մյուս սկանդալային պատմությունը պայմանավորված է վարչապետի տիկնոջ Աննա Հակոբյանի հետ։ 2018 թվին Աննա Հակոբյանը այցելել է Փարիզ եւ մեծ սկանդալ է տեղի ունեցել։ Մամուլում գրել են, որ նա գնացել է գնումների՝ «շոփինգի», եւ նրան այդ գնումների ժամանակ ուղեկցել է Հայաստանի դեսպանը։ Այսինքն՝ մեր պետության հաշվին առաքելությունը, քաղաքական ֆունկցիաներ իրականացնող պետության ներկայացուցիչն ուղեկցել է վարչապետի կնոջը «շոփինգ» անելու։ Հերիք չէ, ուղեկցել է, պարզվում է, որ նաեւ այդ գնումների մի մասն էլ ինքն է արել վարչապետի երեխուն մարզակոշիկներ գնելու համար։ Ցանկացած նորմալ երկրում սա ոչ միայն պատճառ է դեսպանին հետ կանչելու, այլեւ վարչապետի հրաժարականի համար»,- հայտարարել է Էդգար Ղազարյանը։

Նրա փոխանցմամբ՝ Աննա Հակոբյանը այդ ժամանակ գրել էր. «Ի դեպ, Փարիզ մեկնելիս ունեցել եմ 300 եվրո, որից ծախսել եմ 100-ը։ Գնել եմ նվերներ Մարիամի, Շուշանի եւ Արփիի համար։ Սպորտային կոշիկ Մարիամին, պայուսակ Շուշանին։ Արփիի եւ Շուշանի նվերների ծախսն իր վրա վերցրեց Ֆրանսիայում ՀՀ դեսպանը։ Այնպես, որ ես անձամբ Փարիզում գնել եմ մեկ զույգ սպորտային կոշիկ»։

«Այսինքն՝ մեր դեսպանը վարչապետի ընտանիքի համար իր միջոցներից գնումներ է արել։ Եվ սա պաշտոնապես հաստատում է վարչապետի կինը։ Նման խայտառակություն դժվար թե հնարավոր է գտնել որեւէ երկրում եւ որեւէ դեսպանի պարագայում»,- նշել է Լեհաստանում ՀՀ նախկին դեսպանը։

Մանրամասները՝ տեսանյութում։

Աղբյուր` Փաստինֆո